ദേവിയെ കാപ്പുകെട്ടി കുടിയിരുത്തിയതോടെ ആറ്റുകാല്‍ പൊങ്കാല മഹോത്സവത്തിന് തുടക്കമായി. കുംഭത്തിലെ കാര്‍ത്തിക നക്ഷത്രമായ ഇന്നലെ രാവിലെ 9.45നാണ് കാപ്പുകെട്ടി കുടിയിരുത്തല്‍ ചടങ്ങ് നടന്നത്. കൊവിഡ് നിയന്ത്രണങ്ങള്‍ പാലിച്ചായിരുന്നു ചടങ്ങുകളെല്ലാം.

ഇതേസമയം പുറത്തെ പന്തലില്‍ തോറ്റംപാട്ടുകാര്‍ കണ്ണകി ചരിതം പാട്ടി തുടങ്ങി. ആള്‍ക്കൂട്ടത്തിന് നിയന്ത്രണമുണ്ടെങ്കിലും നിരവധി പേര്‍ ദര്‍ശനത്തിനെത്തി. പഞ്ചലോഹത്തില്‍ നിര്‍മ്മിച്ച രണ്ടു കാപ്പുകളാണ് കെട്ടിയത്.

ക്ഷേത്രം തന്ത്രി തെക്കേടത്ത് കുഴിക്കാട്ടില്ലത്ത് പരമേശ്വരന്‍ വാസുദേവന്‍ ഭട്ടതിരിപ്പാട് കാപ്പുകളിലൊന്ന് ഭഗവതിയുടെ ഉടവാളിലും മറ്റൊന്ന് മേല്‍ശാന്തി പി. ഈശ്വരന്‍ നമ്പൂതിരിയുടെ കൈയിലും കെട്ടി. പുണ്യാഹം തളിച്ച് ശുദ്ധിവരുത്തിയശേഷമാണ് തന്ത്രി കാപ്പണിയിച്ചത്.

വൈകിട്ട് 6.30ന് പ്രധാന വേദിയായ അംബാ ഓഡിറ്റോറിയത്തില്‍ കലാപരിപാടികളുടെ ഉദ്ഘാടനം നടന്‍ നെടുമുടി വേണു നിര്‍വഹിച്ചു. ആറ്റുകാല്‍ അംബാ പുരസ്‌കാരം അദ്ദേഹത്തിന് സെക്രട്ടറി കെ. ശിശുപാലന്‍ നായര്‍ സമ്മാനിച്ചു.

രാത്രി വിവിധ കരകളില്‍ നിന്നും അലങ്കരിച്ച വിളക്കുകെട്ടുകള്‍ ക്ഷേത്രത്തിലേക്ക് എഴുന്നെള്ളിച്ചു. കൊവിഡ് നിയന്ത്രണമുള്ളതിനാല്‍ ഘോഷയാത്രകള്‍ ഒഴിവാക്കി മുന്‍കൂട്ടി അറിയിച്ചത് പ്രകാരം ലോറികളില്‍ എത്തിച്ച വിളക്കുകെട്ടുകളുമായി ഭക്തര്‍ നിയന്ത്രണത്തോടെ ക്ഷേത്രം വലംവച്ച് മടങ്ങി.

ക്ഷേത്രം വക കുത്തിയോട്ടത്തിന്റെ വ്രതം ഞായറാാഴ്ച ആരംഭിക്കും. 27നാണ് പൊങ്കാല. കൊവിഡ് വ്യാപനത്തെ തുടര്‍ന്ന് ക്ഷേത്രത്തിലെ പണ്ടാരയടുപ്പില്‍ മാത്രമായിരിക്കും പൊങ്കാല.



കുത്തിയോട്ടം പണ്ടാ ഓട്ടംമാത്രമായി നടത്തും. രാത്രി പുറത്തെഴുന്നെള്ളത്ത്. മണക്കാട് ശാസ്താക്ഷേത്രത്തിലെത്തി രാത്രി തന്നെ മടക്കയെഴുന്നെള്ളത്ത്. 28ന് അര്‍ദ്ധരാത്രി നടക്കുന്ന കുരുതി തര്‍പ്പണത്തോടെ ഇക്കൊല്ലത്തെ ആറ്റുകാല്‍ ഉത്സവം അവസാനിക്കും.