കൊല്ലം തുളസി ഡയലോഗുകള്‍ കത്തിച്ചു വിടുമ്പോള്‍ ഇങ്ങനെയൊരു പുലിവാല്‍ ഉണ്ടാകുമെന്ന് വിചാരിച്ചതേയില്ല. ഇപ്പോള്‍ അന്ന് ഡയലോഗടിച്ച കേസില്‍ നിന്നും ഊരാനായി പാര്‍ട്ടി മാറാന്‍ പോലും ഇരിക്കുകയാണ്.

ബിജെപിയിലേക്ക് പോയത് തെറ്റായിപ്പോയി എന്നും ശബരിമല വിഷയത്തില്‍ നടത്തിയ പരാമര്‍ശവുമായി ബന്ധപ്പെട്ടുള്ള കേസില്‍ നിന്നും രക്ഷപ്പെടുകയാണ് വേണ്ടതെന്നും കൊല്ലം തുളസി പറഞ്ഞു. 2016ലെ നിയമസഭാ തെരഞ്ഞെടുപ്പില്‍ കുണ്ടറയില്‍ നിന്നും ബിജെപി സ്ഥാനാര്‍ത്ഥിയായി ജനവിധി തേടിയ ആളാണ് കൊല്ലം തുളസി.

ശബരിമലയുമായി ബന്ധപ്പെട്ട് നടത്തിയ വിവാദ പരാമര്‍ശത്തില്‍ ബിജെപി തന്നെ പിന്തുണച്ചില്ലെന്നും പാര്‍ട്ടിയുമായി ഇപ്പോള്‍ താന്‍ സഹകരിക്കുന്നില്ലെന്നും അദ്ദേഹം പറയുന്നു. തനിക്ക് സിപിഐ സ്ഥാനാര്‍ത്ഥിയാകാന്‍ ആഗ്രഹമുണ്ടെന്നും കൊല്ലം തുളസി പറയുന്നു.

ശബരിമലയില്‍ പ്രശ്‌നം വന്നപ്പോള്‍ തനിക്കെന്ത് പറ്റിയെന്ന് ഒരു ലോക്കല്‍ നേതാവ് പോലും ചോദിച്ചില്ലെന്നും അതില്‍ തനിക്ക് വിഷമമുണ്ടെനും കൊല്ലം തുളസി പറഞ്ഞു. തന്നെ ആര്‍ക്കും വേണ്ടെന്നും താന്‍ കുടുങ്ങിക്കിടക്കുന്ന കേസില്‍ നിന്നും രക്ഷപ്പെടുകയാണ് ഇപ്പോള്‍ വേണ്ടതെന്നും നടന്‍ പറയുന്നു. ബിജെപിയിലെ നേതാക്കള്‍ക്ക് പാര്‍ട്ടിയോട് കൂറില്ലെന്ന് കുറ്റപ്പെടുത്തിയ കൊല്ലം തുളസി തനിക്ക് പൊതുരംഗത്ത് സജീവമാകാന്‍ താത്പര്യമുണ്ടെന്നും പറയുന്നു.



സ്ത്രീകള്‍ക്കെതിരെ മോശം പരാമര്‍ശം നടത്തിയ കേസിലാണ് നടന്‍ കൊല്ലം തുളസി പെട്ടു പോയത്. അവസാനം ചവറ പൊലീസില്‍ കീഴടങ്ങി. ബിജെപി സംസ്ഥാന പ്രസിഡന്റ് എസ്. ശ്രീധരന്‍പിള്ള നടത്തിയ ശബരിമല സംരക്ഷണ യാത്രയ്ക്ക് 2018 ഒക്ടോബര്‍ 12ന് ചവറയില്‍ നടത്തിയ സ്വീകരണത്തിനിടെയാണു 'സ്ത്രീകളെ വലിച്ചുകീറുമെന്ന' പരാമര്‍ശം അദ്ദേഹം നടത്തിയത്. സംഭവം വിവാദമായതോടെ നടന്‍ പരസ്യമായി മാപ്പ് അപേക്ഷിച്ചിരുന്നു.

ഡിവൈഎഫ്‌ഐ ചവറ മേഖലാ സെക്രട്ടറി രതീഷ് നല്‍കിയ പരാതിയിലാണു ചവറ പൊലീസ് കേസെടുത്തത്. ജില്ലാ കോടതിയും ഹൈക്കോടതിയും തുളസിയുടെ മുന്‍കൂര്‍ ജാമ്യാപേക്ഷ നിരസിച്ചിരുന്നു. സംസ്ഥാന വനിതാ കമ്മിഷന്‍ റജിസ്റ്റര്‍ ചെയ്ത കേസില്‍ നടന്‍ കമ്മിഷനു മുന്‍പാകെ ഹാജരായി മാപ്പപേക്ഷിച്ചിരുന്നു. പക്ഷെ കേസ് കടുപ്പിച്ചതോടെയാണ് കൊല്ലം തുളസി പെട്ടു പോയത്.



അതേസമയം ബിജെപി വേദിയില്‍ സ്ത്രീകള്‍ക്കെതിരായ നടത്തിയ വിവാദ പരാമര്‍ശത്തില്‍ മാപ്പുപറഞ്ഞ് കൊല്ലം തുളസി രംഗത്തെത്തിയിരുന്നു. പറയാന്‍ പാടില്ലാത്തതാണ് പറഞ്ഞത്. ഭക്തി മൂത്ത് പറഞ്ഞുപോയതാണ്. ആ പരാമര്‍ശം പിന്‍വലിക്കുകയാണെന്നും ആര്‍ക്കെങ്കിലും മാനസിക വിഷമം ഉണ്ടായെങ്കില്‍ നിരുപാധികം മാപ്പുപറയുന്നുവെന്നും കൊല്ലം തുളസി പറഞ്ഞു.

വനിതാ കമ്മിഷന്‍ കേസെടുത്തതിന് പിന്നാലെയാണ് തുളസിയുടെ മാപ്പപേക്ഷ. ശബരിമലയില്‍ വരുന്ന യുവതികളെ രണ്ടായി വലിച്ചുകീറണമെന്നായിരുന്നു കൊല്ലം തുളസിയുടെ പരാമര്‍ശം. കൊല്ലം ചവറയില്‍ എന്‍ഡിഎയുടെ ശബരിമലസംരക്ഷണ റാലിയിലാണ് കൊല്ലം തുളസി വിവാദ പരാമര്‍ശം നടത്തിയത്.

അതൊരു അബദ്ധ പ്രയോഗമാണ്. പ്രാര്‍ത്ഥനായോഗത്തില്‍ പങ്കെടുത്ത ചില അമ്മമാരുടെ പ്രയോഗത്തില്‍ ആവേശം തോന്നിയപ്പോള്‍ നടത്തിയ പരാമര്‍ശം ആണത്. അയ്യപ്പ സ്വാമി എന്റെ ദൈവമാണ്. ആചാരങ്ങള്‍ ലംഘിക്കപ്പെടുന്നത് ശബരിമലയുടെ പവിത്രത നശിപ്പിക്കും. അയ്യപ്പഭക്തന്‍ എന്ന നിലയിലെ ഒരു വേദനയായിരുന്നു താന്‍ പങ്കു വച്ചതെന്നും കൊല്ലം തുളസി വിശദീകരിച്ചു. കൊല്ലം തുളസി പറഞ്ഞത് ബിജെപി നിലപാടല്ലെന്ന് പാര്‍ട്ടി സംസ്ഥാന അധ്യക്ഷന്‍ പി.എസ്.ശ്രീധരന്‍ പിള്ള പ്രതികരിച്ചു. അതോടെ കൊല്ലം തുളസി ഒറ്റപ്പെട്ടു. ഇതിനവസാനമാണ് കൊല്ലം തുളസി ബിജെപിയിലെത്തുന്നത്.