മലയാളത്തില്‍ മഹാവിജയം നേടിയ ദൃശ്യത്തിന്പെ രണ്ടാംഭാഗം കഴിഞ്ഞ ദിവസം ഒടിടിയില്‍ റിലീസ് ചെയ്തിരുന്നു. ദൃശ്യം 2വിനും ആരാധക‌ര്‍ വന്‍വരവേല്‍പ്പാണ് നല്‍കിയത്. സിനിമയുടെ വന്‍വിജയത്തിന് പിന്നാലെ റീമേക്കുകള്‍ ഉണ്ടാകുമെന്നും മൂന്നാംഭാഗത്തിന്റെ സാദ്ധ്യതകളെക്കുറിച്ചും നിര്‍മ്മാതാവ് ആന്റണി പെരുമ്ബാവൂര്‍ പ്രതികരിച്ചിരുന്നു. അതിനിടെ ദൃശ്യം 2വിന്റെ വിജയത്തിനു കാരണം നോട്ടുനിരോധനവും വര്‍ദ്ധിച്ചുവരുന്ന ജിറ്റല്‍ പണമിടപാടുമാണെന്ന് ബി.ജെ.പി നേതാവ് സന്ദീപ് വാര്യര്‍ ഫേസ്ബുക്കില്‍ കുറിച്ചു. ദൃശ്യത്തിന്റെ വിജയത്തില്‍ മോഹന്‍ലാലിനെ അഭിനന്ദിച്ച്‌ പങ്കു വച്ച്‌ കുറിപ്പിലാണ് സന്ദീപ് ഇക്കാര്യം വ്യക്തമാക്കിയത്.

'ലാലേട്ടാ ദൃശ്യം 2 കണ്ടു. ഗംഭീരം. ആദ്യ സിനിമ പോലെ തന്നെ സസ്‌പെന്‍സ് നിലനിര്‍ത്താന്‍ കഴിഞ്ഞിരിക്കുന്നു. അഭിനന്ദനങ്ങള്‍. മലയാള സിനിമ പുതിയൊരു നോര്‍മലിലേക്ക് വിജയകരമായി കടന്നിരിക്കുകയാണ്.

ഒ.ടി.ടി പ്ലാറ്റ് ഫോം വഴി റിലീസിംഗിന് ഇനി കൂടുതല്‍ സിനിമകളെത്തും . ഡിജിറ്റല്‍ ഇന്ത്യക്ക് നന്ദി. ഡിജിറ്റല്‍ ബാങ്കിംഗ് ട്രാന്‍സാക്ഷനിലെ വര്‍ദ്ധനവുണ്ടായിരുന്നില്ലെങ്കില്‍ ഒ.ടി.ടി റിലീസിംഗ് ജനകീയവും വിജയവുമാകുമായിരുന്നില്ല. 2016ലെ ഡിമോണിറ്റൈസേഷന്‍, കോവിഡ് മഹാമാരിയുടെ കാലത്തും ഇന്ത്യയുടെ സാമ്ബത്തിക രംഗത്തെ സജീവമാക്കി നിര്‍ത്താന്‍ സഹായിച്ചതിന്റെ നേര്‍സാക്ഷ്യമാണ് ദൃശ്യം 2 ഒ.ടി.ടി റിലീസിങ്.' സന്ദീപ് പറയുന്നു.