ആറ്റുകാല്‍ പൊങ്കാല മഹോത്സവവുമായി ബന്ധപ്പെട്ട എല്ലാ ചടങ്ങുകളിലും കൊവിഡ് മാനദണ്ഡങ്ങള്‍ കര്‍ശനമായി പാലിക്കണമെന്ന് ജില്ലാ കളക്ടര്‍ ഡോ. നവ്ജ്യോത് ഖോസ പറഞ്ഞു.

ക്ഷേത്ര ദര്‍ശനത്തിനെത്തുന്ന ഭക്തര്‍ സാമൂഹിക അകലം പാലിക്കുന്നതിലും മാസ്‌ക്, സാനിറ്റൈസര്‍ എന്നിവ ഉപയോഗിക്കുന്നതിലും ജാഗ്രത പുലര്‍ത്തണം.

മാനദണ്ഡങ്ങള്‍ ഉറപ്പാക്കാന്‍ ഉത്സവം അവസാനിക്കുന്നതുവരെ സെക്ടറല്‍ മജിസ്ട്രേറ്റുമാരെ സ്പെഷ്യല്‍ ഡ്യൂട്ടിയില്‍ നിയോഗിച്ചതായും കളക്ടര്‍ അറിയിച്ചു. പൊതുനിരത്തുകളിലും പൊതുസ്ഥലങ്ങളിലും പൊങ്കാല ഇടരുതെന്ന കാര്യം ക്ഷേത്ര ഭരണസമിതിയും ഉറപ്പാക്കണം. ക്ഷേത്ര ചടങ്ങുകള്‍ ടെലിവിഷനിലെ തത്സമയ സംപ്രേഷണത്തിലൂടെ ഭക്തര്‍ക്കു കാണാം.

പൊങ്കാലയിട്ട ശേഷം ഭക്തര്‍ ക്ഷേത്രത്തിലേക്ക് കൂട്ടമായി എത്തുന്നതും നിര്‍ബന്ധമായി ഒഴിവാക്കണം. തിരക്ക് നിയന്ത്രിക്കുന്നതിന് ക്ഷേത്ര പരിസരത്ത് പൊലീസ് ഉദ്യോഗസ്ഥരെ നിയോഗിച്ചിട്ടുണ്ട്. ഇവരുടെ നിര്‍ദ്ദേശങ്ങള്‍ പാലിക്കാന്‍ എല്ലാവരും തയ്യാറാകണം. ക്ഷേത്രപ്രവേശനത്തിന് മുമ്പായി തെര്‍മ്മല്‍ സ്‌കാനിംഗ് ഉണ്ടാകും.

ഉത്സവത്തിന്റെ ഭാഗമായി നഗരത്തിന്റെ വിവിധ ഭാഗങ്ങളില്‍ സ്റ്റേജ് കെട്ടിയുള്ള പരിപാടികളും അനുബന്ധ പ്രവര്‍ത്തനങ്ങളും നിയന്ത്രിക്കും. ക്ഷേത്ര പരിസരത്ത് നിലവിലുള്ള കച്ചവട സ്ഥാപനങ്ങള്‍ക്കു പുറമേ പുതുതായി കടകള്‍ തുറക്കാന്‍ അനുവാദമില്ല.


ഉത്സവം അവസാനിക്കുന്നതുവരെയുള്ള ദിവസങ്ങളില്‍ പൂര്‍ണ സജ്ജമായ മെഡിക്കല്‍ സംഘം ക്ഷേത്ര പരിസരത്ത് ക്യാമ്പ് ചെയ്യും. ടോയ്ലെറ്റുകള്‍ സജ്ജമാക്കല്‍, ശുചീകരണ പ്രവര്‍ത്തനങ്ങള്‍ എന്നിവ പൂര്‍ത്തിയായിട്ടുണ്ട്.

ക്ഷേത്രത്തിലും പരിസര പ്രദേശങ്ങളിലും ഉത്സവ കാലയളവില്‍ ഹരിതചട്ടം കര്‍ശനമായി പാലിക്കണമെന്നും കളക്ടര്‍.