ശബരിമല, പൗരത്വനിയമ കേസുകള് പിന്വലിക്കാന് സംസ്ഥാന മന്ത്രിസഭാ യോഗത്തില് സുപ്രധാന തീരുമാനം.... ഗുരുതര ക്രിമിനല് സ്വഭാവം ഇല്ലാത്ത കേസുകള് പിന്വലിക്കാനാണ് തീരുമാനം
ശബരിമല, പൗരത്വനിയമ കേസുകള് പിന്വലിക്കാന് സംസ്ഥാന മന്ത്രിസഭാ യോഗത്തില് സുപ്രധാന തീരുമാനം. ശബരിമല സ്ത്രീപ്രവേശനവുമായി ബന്ധപ്പെട്ട പ്രതിഷേധങ്ങളില് എടുത്ത കേസുകളും പൗരത്വ നിയമത്തിനെതിരെയുള്ള പ്രതിഷേധം സംബന്ധിച്ച കേസുകളുമാണ് പിന്വലിക്കുക.
ഗുരുതര ക്രിമിനല് സ്വഭാവം ഇല്ലാത്ത കേസുകള് പിന്വലിക്കാനാണ് തീരുമാനം. ശബരിമല സമരവുമായി ബന്ധപ്പെട്ട കേസുകള് പിന്വലിക്കണമെന്ന് എന്.എസ്.എസ് അടക്കമുള്ള സംഘടനകളും കോണ്ഗ്രസും ബിജെപിയും ആവശ്യപ്പെട്ടിരുന്നു.
നിയമസഭാ തിരഞ്ഞെടുപ്പ് നടക്കാനിരിക്കുന്ന പശ്ചാത്തലത്തിലാണ് സര്ക്കാരിന്റെ തീരുമാനം.സര്ക്കാരിന്റെ വൈകിവന്ന വിവേകമാണിതെന്ന് പ്രതിപക്ഷ നേതാവ് രമേശ് ചെന്നിത്തല പ്രതികരിച്ചു.
ഗത്യന്തരമില്ലാതെയുള്ള തീരുമാനമാണിതെന്ന് മുസ്ലിം ലീഗും അഭിപ്രായപ്പെട്ടു. അധികാരത്തില് വന്നാല് ശബരിമല പ്രക്ഷോഭ കേസകുള് പിന്വലിക്കുമെന്ന് നേരത്തെ യുഡിഎഫ് വ്യക്തമാക്കിയിരുന്നു.ശബരിമല കേസുകള് പിന്വലിക്കാനുള്ള തീരുമാനം സ്വഗതാര്ഹമാണെന്ന് ബിജെപി പ്രതികരിച്ചു.
രാഷ്ട്രീയ പക്ഷപാതിത്വം വെച്ചുകൊണ്ടാണ് കേസുകള് എടുത്തതെന്നും ഇതുമൂലം നിരവധി യുവാക്കള്ക്ക് ജോലിസാധ്യതകള് ഇല്ലാതായിരുന്നെന്നും ബിജെപി പറഞ്ഞു. നിരപരാധികളായ ആളുകള്ക്കെതിരായി എടുത്തിരുന്ന കേസുകള് പിന്വലിക്കാന് സര്ക്കാര് തീരുമാനിച്ചത് സ്വാഗതാര്ഹമാണെന്ന് എന്എസ്എസ് ജനറല് സെക്രട്ടറി ജി. സുകുമാരന് നായര് പറഞ്ഞു.
"
https://www.facebook.com/Malayalivartha