ഉടമയ്ക്കൊപ്പം ട്രക്കിങ് നടത്തിയ നായ വഴിയരികില് കണ്ട കഞ്ചാവ് കഴിച്ച് ബോധം പോയി
ട്രക്കിങിനിടെ വഴിയരികില് കണ്ട കഞ്ചാവ് ഭക്ഷിച്ചതിന് പിന്നാലെ അവശനിലയിലായ നായയെ സന്നദ്ധപ്രവര്ത്തകര് രക്ഷിച്ചു. അമിതമായ അളവില് ലഹരി ഉള്ളില്ച്ചെന്നതാണ് നായ അവശയാകാന് കാരണമായതെന്ന് പരിശോധനയില് കണ്ടെത്തിയിട്ടുണ്ട്. ഡോഗ് ട്രെയിനറായ ക്രിസ്റ്റിന ബ്ലുമെയ്ക്കൊപ്പം സ്കോട്ട്ലാന്ഡിലെ ഏറ്റവും വലിയ കൊടുമുടിയായ ബെന് നെവിസ് കയറിയ 'ടോക്കിയോ' എന്ന നായയ്ക്കാണ് സന്നദ്ധപ്രവര്ത്തകര് രക്ഷകരായത്. അവശനിലയിലായി കുഴഞ്ഞുവീണ നായയെ 'ലോക്കാബെര് മൗണ്ടെയ്ന് റെസ്ക്യൂ' ടീമിന്റെ നേതൃത്വത്തില് സുരക്ഷിതമായി താഴെ എത്തിക്കുകയായിരുന്നു. ആശുപത്രിയില് പ്രവേശിപ്പിച്ച നായ സുഖംപ്രാപിച്ചതായും ബന്ധപ്പെട്ടവര് അറിയിച്ചു. രക്തപരിശോധനയിലടക്കം കഞ്ചാവിന്റെയും സാന്നിധ്യം കണ്ടെത്തി. ഇത്തരം കാര്യങ്ങളില് നായകളുടെ ഉടമകള് ജാഗ്രത പാലിക്കണമെന്നും ഡോക്ടര്മാര് മുന്നറിയിപ്പ് നല്കി.
ലാബ്രഡോര് ഇനത്തില്പ്പെട്ട ടോക്കിയോയെയും കൂട്ടിയാണ് ക്രിസ്റ്റിന മലകയറിയത്. എന്നാല്, യാത്രയ്ക്കിടെ നായ വഴിയരികില് കണ്ട കഞ്ചാവ് കഴിച്ചെന്നാണ് നിഗമനം. ഇതിനുപിന്നാലെയാണ് നായയുടെ കാലുകള് കുഴഞ്ഞ് നടക്കാന് കഴിയാതായത്. പിന്നാലെ ബോധം നഷ്ടപ്പെടുന്ന സ്ഥിതിയുമായി. നായയെ താഴെയെത്തിച്ച് അടിയന്തര ചികിത്സ നല്കേണ്ട സാഹചര്യമായി. 25 കിലോയോളം ഭാരമുള്ള നായയെയും എടുത്ത് മലയിറങ്ങുന്നത് ക്രിസ്റ്റിനയ്ക്ക് അസാധ്യമായിരുന്നു. ഇതോടെ പ്രിയപ്പെട്ട ടോക്കിയോയെ തനിക്ക് നഷ്ടപ്പെടുമോ എന്നുപോലും ക്രിസ്റ്റിന ഭയന്നു. എന്നാല്, വിവരമറിഞ്ഞെത്തിയ ലോക്കാബെര് മൗണ്ടെയ്ന് റെസ്ക്യൂ ടീം സ്ട്രെച്ചറില് കിടത്തി നായയെ സുരക്ഷിതമായി താഴെ എത്തിക്കുകയായിരുന്നു.
https://www.facebook.com/Malayalivartha
