തിരുവനതപുരം ജില്ലയിലെ കാട്ടാകട മണ്ഡലത്തിൽ മൂന്നു മുന്നണികളുടെയും സ്ഥാനാത്ഥികളെ പ്രഖ്യാപിച്ചതോടെ ശക്തമായ പ്രചാരണം ആരംഭിച്ചിരിക്കുകയാണ്. യു.ഡി.എഫില്‍ മലയിന്‍കീഴ് വേണുഗോപാലും എന്‍.ഡി.എ സ്ഥാനാര്‍ത്ഥി പി.കെ. കൃഷ്ണദാസും എല്‍.ഡി.എഫില്‍ സിറ്റിംഗ് എം.എല്‍.എ ഐ.ബി.സതീഷുമാണ് മത്സരരംഗത്തുള്ളത്.

മൂന്നു മുന്നണി സ്ഥാനാർത്ഥികളുടെയും പ്രവർത്തനം സജീവമായതോടെ ശക്‌തമായ ത്രികോണ മത്സരമാണ് കാട്ടാക്കടയിൽ. എൻ ഡി എ സ്ഥാനാർഥി പി.കെ കൃഷ്ണാദാസ് ഒരു മാസത്തിനു മുന്നേ കാട്ടാക്കടയിൽ സ്ഥിരതാമസമാക്കി പ്രവർത്തനം ആരംഭിച്ചിരിക്കുകയാണ്. അതേസമയം നേരത്തേ തന്നെ സ്ഥാനാര്‍ത്ഥിത്വമുറപ്പിച്ച ഐ.ബി. സതീഷ് മണ്ഡലത്തില്‍ രണ്ടാംവട്ട പര്യടനത്തിലുമാണ്. എന്നാൽ അവസാനം പ്രഖ്യാപിക്കപ്പെട്ട യു.ഡി.എഫ് സ്ഥാനാര്‍ത്ഥി മലയിന്‍കീഴ് വേണുഗോപാല്‍ മണ്ഡലത്തില്‍ ആദ്യഘട്ട പ്രചാരണത്തിന്റെ ഭാഗമായി പൗര പ്രമുഖരെയും പ്രാദേശിക നേതാക്കളെയും കാണുന്ന തിരക്കിലുമാണ്.

ഇപ്പോഴിതാ മണ്ഡലത്തിൽ സ്ഥാനാര്‍ത്ഥികളെ പ്രഖ്യാപിച്ചതോടെ ബാനറുകളും ഫ്ലക്സുകളും ചുമരെഴുത്തുകളും സജീവമാക്കി തങ്ങളുടെ ആധിപത്യം കാണിക്കാനുള്ള തിരക്കിലാണ് പ്രാദേശിക നേതാക്കളും പ്രവർത്തകരും. കഴിഞ്ഞ തവണ 2016ല്‍ എല്‍.ഡി.എഫിലെ ഐ.ബി.സതീഷ് 51,614 വോട്ടുകള്‍ നേടിയപ്പോള്‍ കോണ്‍ഗ്രസിലെ പ്രബലനായ മുന്‍ സ്പീക്കര്‍ കൂടിയായ എന്‍. ശക്തന്‍ 50,765 വോട്ടുകളായിരുന്നു നേടിയത്, എന്‍.ഡി.എയിലെ പി.കെ. കൃഷ്ണദാസ് 38,000വോട്ടുകള്‍ നേടി ഇരുമുന്നണികള്‍ക്കും വെല്ലുവിളി ഉയർത്തിയതായിരുന്നു. 2011ല്‍ പി.കെ. കൃഷ്ണദാസ് 22,550 വോട്ടുകലായിരുന്നു നേടിയത്. നിശ്ശബ്ദമായ പ്രചാരണത്തിലൂടെ രണ്ട് തിരഞ്ഞെടുപ്പുകളില്‍ ശക്തമായ മുന്നേറ്റം നടത്തുന്ന പി.കെ. കൃഷ്ണദാസ് ഇക്കുറി വാൻ വിജയ് പ്രതീക്ഷയിലാണ്.

2016ല്‍ കോണ്‍ഗ്രസിനകത്തെ പ്രശ്നങ്ങളും ചില അടിയൊഴുക്കുകളും കാരണം 849 വോട്ടുകളുടെ വ്യത്യാസത്തില്‍ ശക്തൻ പരാജിതനാകുകയായിരുന്നു. പഞ്ചായത്ത് തിരഞ്ഞെടുപ്പില്‍ ശക്തമായ സ്വാധീനം ഉണ്ടാക്കാന്‍ കഴിയാത്ത കോണ്‍ഗ്രസിന് ലോക്സഭാ തിരഞ്ഞെടുപ്പില്‍ കോണ്‍ഗ്രസ് കാട്ടാക്കട മണ്ഡലത്തില്‍ നേടിയ 8,500 വോട്ടിന്റെ ലീഡാണ് മലയിൻകീഴ് വേണുഗോപാൽ പ്രതീക്ഷ വെയ്ക്കുന്നത്.

പിണറായി സര്‍ക്കാരിന്റെ വികസന പ്രവര്‍ത്തനങ്ങളും താന്‍ മണ്ഡലത്തില്‍ നടത്തിയ വികസനവും ജലസമൃദ്ധി പദ്ധതി ആഗോളതലത്തില്‍ എത്തിക്കാന്‍ കഴിഞ്ഞതും സ്കൂളുകള്‍ അന്താരാഷ്ട്ര നിലവാരത്തിലേയ്ക്ക് ഉയര്‍ന്നതും തനിയ്ക്ക് ഇക്കുറിയും ആത്മവിശ്വാസം പകരുന്നതായി ഐ.ബി. സതീഷ് വ്യക്തമാക്കി.

കാട്ടാക്കട കോണ്‍ഗ്രസ് മണ്ഡലമാണെന്നും കോണ്‍ഗ്രസ് ഇക്കുറി ഒറ്റക്കെട്ടായി തിരഞ്ഞെടുപ്പിനെ നേരിടുമെന്നും കഴിഞ്ഞ തവണത്തെ ചെറിയ മാര്‍ജിന്‍ മാറ്റാന്‍ ഇക്കുറി കഴിയുമെന്നും മലയിന്‍കീഴ് വേണുഗോപാല്‍ പറഞ്ഞിരിക്കുകയാണ്. എന്തായാലും ഇക്കുറി വലിയ ഭൂരിപക്ഷത്തില്‍ വിജയിക്കാനാവുമെന്ന ശുഭ പ്രതീക്ഷയിലാണ് വേണുഗോപാല്‍.

എന്നാല്‍, നരേന്ദ്രമോദി സര്‍ക്കാരിന്റെ വികസന പ്രവര്‍ത്തനങ്ങള്‍ക്ക് തുടര്‍ച്ചയേകാന്‍ എന്‍.ഡി.എയ്ക്ക് കാട്ടാക്കടയില്‍ നിന്ന് പ്രതിനിധിയെ നിയമസഭയിലേയ്ക്ക് വേണം. ഇക്കുറി സാഹചര്യങ്ങള്‍ ബി.ജെ.പിയ്ക്ക് അനുകൂലമാണെന്നും മണ്ഡലത്തില്‍ പാര്‍ട്ടി നിര്‍ണ്ണായക ഘടകമായി മാറിയത് ആത്മവിശ്വാസം വര്‍ദ്ധിപ്പിക്കുന്നുവെന്നും പി.കെ. കൃഷ്ണദാസ് പറഞ്ഞു.