സിപിഎമ്മില് ക്യപ്റ്റന് ഒന്നുമതി...അതാണ് പിണറായി വിജയന്... സഹിക്കാന് പറ്റുമോ പിജെ ആര്മിക്ക്?
പാര്ട്ടിക്കൊപ്പം ജയരാജനും എന്നും കട്ടയ്ക്ക് കൂടെ എന്ന നിലപാട് പറഞ്ഞ് പി. ജയരാജന് രംഗത്ത് വന്നെങ്കിലും ധര്മടത്ത് അതൊന്നും ഏശുന്നില്ല എന്ന് എല്ലാവരും കണ്ടതാണ്. പി.ജെ. ആര്മി ഫ്ളക്സ് മാത്രം മതി അതിന് ഉദാഹരണം. കാരണം പി. ജയരാജനെ താഴ്ത്തിക്കെട്ടാന് ശ്രമിക്കുന്നത് ഇപ്പോള് പിണറായി വിജയനാണെന്ന് ജയരാജന്റെ ആര്മിക്ക് ഉത്തമബോധ്യമുണ്ട്.
കാരണങ്ങള് നിരവധിയാണ്. ഏറ്റവുമൊടുവില് ഇതാ നിയമസഭാ സീറ്റ് നിഷേധിച്ചു എന്നതിനപ്പുറം പാര്ട്ടിയിലെ പ്രമുഖനായ നേതാവിനെ സ്റ്റാര് ക്യാമ്പെയ്നര് പട്ടികയില് നിന്നു പോലും സിപിഎം ഒഴിവാക്കി. സീതാറാം യെച്ചൂരിയില് തുടങ്ങി യുവ നേതാവായ എ.എ. റഹീം വരെ മുപ്പതോളം നേതാക്കള് ക്യാമ്പെയിന്റെ ഭാഗമായുള്ള പ്രാസംഗികരുടെ പട്ടികയില് ഇടംപിടിച്ചപ്പോഴാണ് മുതിര്ന്ന് നേതാവായ പി. ജയരാജനെ തെരഞ്ഞെടുപ്പ് പ്രചാരണത്തില് നിന്നു പോലും മാറ്റിനിര്ത്തുന്നത്.
ഇത് ഇന്നും ഇന്നലെയും തുടങ്ങിയതല്ല. ലോക്സഭാ തെരഞ്ഞെടുപ്പില് പി. ജയരാജന് മത്സരിച്ചത് വടകര പാര്ലമെന്റ് മണ്ഡലത്തിലാണ്. സഹോദരി സതീദേവി ജയിച്ച മണ്ഡലമാണിത്. ഏത് പാര്ട്ടിക്കാരനെ നിര്ത്തിയാലും ജയിക്കുന്ന മണ്ഡലം. എന്നിട്ടും അവിടെ പി. ജയരാജന് തോറ്റെങ്കില് അത് മുരളീധരനും കോണ്ഗ്രസും തോല്പിച്ചതല്ല പിണറായിയും ചില സിപിഎമ്മുകാരും ചേര്ന്ന് തോല്പിച്ചുവെന്ന് തന്നെയാണ് ആര്മി കരുതുന്നത്.
പാര്ട്ടിയുടെ വോട്ട് മുരളീധരന് അനുകൂലമായി ചോര്ത്തിക്കൊടുത്തതാകാനേ വഴിയുള്ളൂ എന്ന് പിജെ ആര്മി ബലമായി വിശ്വസിക്കുന്നു. കോട്ടയം ജില്ലാ സെക്രട്ടറി പാര്ലമെന്റ് ഇലക്ഷന് സ്ഥാനാര്ത്ഥിയായത് സെക്രട്ടറി സ്ഥാനം ഒഴിയാതെയാണ്.
കണ്ണൂര് ജില്ലാ സെക്രട്ടറി സ്ഥാനാര്ത്ഥിയായപ്പോള് സെക്രട്ടറി സ്ഥാനം നഷ്ടപ്പെട്ടു. പകരം സെക്രട്ടറിയായി, മുഖ്യമന്ത്രിയുടെ സെക്രട്ടറിയായി സെക്രട്ടേറിയറ്റിലിരുന്ന് ഭരിച്ച എം.വി. ജയരാജനെ സെക്രട്ടറിയാക്കി. കോട്ടയം ജില്ലാ സെക്രട്ടറിക്ക് ഏറ്റുമാനൂരില് ഇപ്പോള് സ്ഥാനാര്ഥിത്വം കിട്ടി. പി. ജയരാജന് സ്ഥാനാര്ത്ഥിത്വം നല്കിയതുമില്ല. സ്വന്തമായി അഭിപ്രായമുള്ള നേതാവാണ് ജയരാജന്. അപ്പോള് ഇങ്ങിനെ തഴയാമോ എന്ന ചോദ്യം പ്രസക്തമാണ്.
പണ്ട്. എന്നുപറഞ്ഞാല് പത്തു നാല്പത് വര്ഷം മുമ്പ് തലശേരി ഉപതെരഞ്ഞെടുപ്പില് സിപിഎം സ്ഥാനാര്ഥി എം.വി. രാജഗോപാലന് മാസ്റ്ററായിരുന്നു. കൊടിയേരി ബാലകൃഷ്ണന്റെ ഭാര്യാപിതാവാണ് രാജഗോപാല്. ഒറ്റരാത്രികൊണ്ട് സഖാക്കള് ചുമരായ ചുമരിലെല്ലാം ചിഹ്നം വരച്ചു. സഖാവ് എംവിആറിനെ വിജയിപ്പിക്കണമെന്ന്.
അന്ന് സിപിഎമ്മിലെ പ്രമാണി എം.വി. രാഘവനായിരുന്നല്ലോ. തലശേരി വഴി കണ്ണൂര്ക്ക് പോകവെ എം.വി. രാഘവന്റെ കണ്ണില് ചുമരെഴുത്ത് പെട്ടു. ഒറ്റരാത്രികൊണ്ട് ചുമരെഴുത്ത് മായ്ക്കാന് ഉത്തരവ്. സിപിഎമ്മില് ഒരു എംവിആര് മതി എന്നായിരുന്നു അത്.
പറഞ്ഞു വന്നത് അതുപോലെയാണ് സിപിഎമ്മില് കാര്യങ്ങള്. ഇപ്പോള് സിപിഎമ്മില് ക്യപ്റ്റന് ഒന്നുമതി എന്നായി. അതാണ് പിണറായി വിജയന്. സഹിക്കാന് പറ്റുമോ പിജെ ആര്മിക്ക്. വി.എസ്. അച്യുതാനന്ദനു ശേഷം പി. ജയരാജന് പാര്ട്ടിയില് തന്നേക്കാള് ശക്തനായാലോ എന്ന ഭയത്താലാണ് പി. ജയരാജനെ സീറ്റ് നല്കാതെ പിണറായി ഒതുക്കിയത്. മാത്രമല്ല, കണ്ണൂരില് പി. ജയരാജന് അണികള്ക്കിടയില് തന്നേക്കാള് ശക്തനായെന്ന ഭയവും പിണറായിയെ കുറച്ചുകാലമായി അലട്ടിയിരുന്നു. ഇതാണ് വെട്ടിനിരത്തലിന് കാരണമായത്.
https://www.facebook.com/Malayalivartha
