മുസ്ലീം ലീഗിന്റെ യുവ നേതാവും എംഎല്‍എയുമായ കെ.എം. ഷാജിയെ അറസ്റ്റ് ചെയ്യുമോയെന്ന അഭ്യൂഹമാണ് ഉയരുന്നത്. അനധികൃത സ്വത്ത് സമ്പാദനക്കേസില്‍ ചോദ്യം ചെയ്യലിന് ഹാജരാകാന്‍ ആവശ്യപ്പെട്ട് കെ.എം.ഷാജി എംഎല്‍എയ്ക്ക് വിജിലന്‍സിന്റെ നോട്ടിസ് ലഭിച്ചതോടെയാണ് കാര്യങ്ങള്‍ കടുക്കുന്നത്.

ള്ളിയാഴ്ചയോ ശനിയാഴ്ചയോ കോഴിക്കോട് വിജിലന്‍സ് ഓഫിസിലെത്താനാണ് നിര്‍ദേശം. എന്നാല്‍, കുടുംബത്തോടൊപ്പം യാത്രയിലാണെന്നും വൈകാതെ തീരുമാനമറിയിക്കുമെന്നും കെ.എം.ഷാജി വിജിലന്‍സിന് മറുപടി നല്‍കി.

ഷാജിയുടെ വീടുകളില്‍നിന്ന് കണ്ടെടുത്തത് 48 ലക്ഷം രൂപയെന്ന് സ്ഥിരീകരിച്ച വിജിലന്‍സ് സംഘം കോഴിക്കോട് വിജിലന്‍സ് കോടതിയില്‍ പ്രാഥമിക റിപ്പോര്‍ട്ട് സമര്‍പ്പിച്ചിരുന്നു. തുകയെക്കുറിച്ച് വ്യത്യസ്ത കണക്കുകള്‍ പുറത്ത് വന്നതിന് പിന്നാലെയാണ് 48 ലക്ഷം രൂപയാണ് കണ്ടെടുത്തതെന്ന് വിജിലന്‍സ് അറിയിച്ചത്. അനധികൃത സ്വത്ത് സമ്പാദനമെന്ന പരാതിയുടെ അന്വേഷണത്തിന് സഹായമാകുന്ന 82 രേഖകളും ശേഖരിച്ചു.

ഷാജിയുടെ കോഴിക്കോട് മാലൂര്‍ കുന്നിലെയും കണ്ണൂര്‍ ചാലാടിലേയും വീടുകളിലാണ് വിജിലന്‍സ് സംഘം തിങ്കളാഴ്ച പരിശോധന നടത്തിയത്. കോഴിക്കോട്ടെ പരിശോധന 16 മണിക്കൂറും കണ്ണൂരിലെ പരിശോധന 8 മണിക്കൂറും നീണ്ടു. കണ്ടെടുത്ത തുക ബന്ധുവിന്റെ ഭൂമി ഇടപാടിനും കച്ചവട ആവശ്യത്തിനും സൂക്ഷിച്ചിരുന്നതെന്നാണ് ഷാജിയുടെ വിശദീകരണം. ഇതിന് മതിയായ രേഖകളുണ്ടെന്നും കോടതിയില്‍ തെളിയിക്കുമെന്നും അദ്ദേഹം പറഞ്ഞു.



കോഴിക്കോട് സ്വദേശിയായ അഭിഭാഷകന്റെ പരാതിയിലാണ് ഷാജിക്കെതിരെ പ്രാഥമിക റിപ്പോര്‍ട്ട് സമര്‍പ്പിക്കാന്‍ വിജിലന്‍സ് കോടതി ഉത്തരവിട്ടത്. 2012 മുതല്‍ 2021 വരെയുള്ള കാലയളവില്‍ ഷാജിയുടെ സ്വത്തില്‍ 166 ശതമാനത്തിന്റെ വര്‍ധനയുണ്ടെന്നായിരുന്നു വിജിലന്‍സിന്റെ കണ്ടെത്തല്‍. ഇതിന്റെ അടിസ്ഥാനത്തിലായിരുന്നു കേസ് റജിസ്റ്റര്‍ ചെയ്തത്.

കെ.എം.ഷാജിയുടെ വീടുകളില്‍ നിന്നു വിജിലന്‍സ് റെയ്ഡില്‍ കണ്ടെടുത്ത പണവും രേഖകളും കഴിഞ്ഞ ദിവസമാണ് കോഴിക്കോട് വിജിലന്‍സ് കോടതിയില്‍ സമര്‍പ്പിച്ചത്. ഇന്ന് 10ന് തൊണ്ടയാടുള്ള വിജിലന്‍സ് സ്‌പെഷല്‍ സെല്‍ ഓഫിസില്‍ ചോദ്യം ചെയ്യലിനു ഹാജരാകാന്‍ ഷാജിക്കു നോട്ടിസ് നല്‍കിയിട്ടുണ്ട്.

ഷാജിയുടെ കണ്ണൂര്‍ മണലിലെ വീട്ടില്‍ നിന്ന് 47,35,500 രൂപയും കോഴിക്കോട് മാലൂര്‍ കുന്നിലെ വീട്ടില്‍ നിന്നു 30000 രൂപയുമാണു കണ്ടെടുത്തത്. രണ്ടു വീടുകളില്‍ നിന്നായി 77 രേഖകളും പിടിച്ചെടുത്തിട്ടുണ്ട്. കട്ടിലിന് അടിയിലെ പ്രത്യേക അറയില്‍ നിന്നാണു പണം കണ്ടെത്തിയത്.

രണ്ടു വീടുകളില്‍ നിന്നായി 66.5 പവന്‍ സ്വര്‍ണവും വിദേശ കറന്‍സികളും കണ്ടെത്തിയിരുന്നെങ്കിലും ഇവ രണ്ടും അപ്പോള്‍ തന്നെ ഷാജിക്കു തിരികെ നല്‍കിയിരുന്നു. വിവിധ രാജ്യങ്ങളിലെ ഓരോ കറന്‍സി നോട്ടുകളാണ് ഉണ്ടായിരുന്നത്. കൗതുകത്തിനായി സൂക്ഷിച്ചിരുന്ന കറന്‍സി നോട്ടുകളായിരുന്നു ഇവയെന്നാണു വിവരം.

അതേസമയം കെ.എം. ഷാജിയുടെ വീട്ടിലെ വിജിലന്‍സ് റെയ്ഡ് അനവസരത്തിലെന്ന് മുസ്‌ലിം ലീഗ് നേതാവ് പി.കെ. കുഞ്ഞാലിക്കുട്ടി പറഞ്ഞു. തിരഞ്ഞെടുപ്പ് കഴിഞ്ഞ് ശ്വാസംവിടാന്‍ സമയം നല്‍കാതെയായിരുന്നു പരിശോധന. തിരഞ്ഞെടുപ്പ് ചെലവിലേക്ക് സ്വരൂപിച്ച തുകയുടെ ബാക്കി സ്ഥാനാര്‍ഥികളുടെ പക്കല്‍ കാണും. മറ്റു ചില സംഭവങ്ങളില്‍നിന്ന് ശ്രദ്ധ തിരിച്ചുവിടാനാണ് റെയ്‌ഡെന്ന് ആരെങ്കിലും പറഞ്ഞാല്‍ കുറ്റംപറയാനാകില്ലെന്നും കുഞ്ഞാലിക്കുട്ടി പറഞ്ഞു.