ശബരിമല വിഷയം തെരഞ്ഞെടുപ്പ് ദിവസം ബോധപൂര്‍വം ഉപയോഗിച്ചയാളാണ് എന്‍എസ്എസ് ജനറല്‍ സെക്രട്ടറി ജി സുകുമാരന്‍ നായര്‍. സുകുമാരന്‍ നായര്‍ക്ക് പുറമേ എകെ ആന്റണി, രമേശ് ചെന്നിത്തല,

പ്രധാനമന്ത്രി നരേന്ദ്ര മോദി, കെ. സുരേന്ദ്രന്‍, ശോഭ സുരേന്ദ്രന്‍ എന്നിവരെല്ലാം ഒരുമിച്ച് ശരണം വിളിച്ചു. എന്നാല്‍ നിലപാട് തിരുത്തി പിന്നെ ഒരു യുവതിയെപ്പോലും കയറ്റാതിരുന്ന പിണറായിയോടൊപ്പമായിരുന്നു അയ്യപ്പന്‍.

2016 ല്‍ 91സീറ്റുമായി അധികാരത്തിലെത്തിയ എല്‍.ഡി.എഫ്, ഇക്കുറി അതിനും മീതെ കുറിച്ചത് 99 സീറ്റുകളുടെ സുവര്‍ണാധിപത്യമാണ് നേടിയത്. കഴിഞ്ഞ നിയമസഭാ തിരഞ്ഞെടുപ്പില്‍ നേടിയ 47 സീറ്റുകളിലേക്കെങ്കിലും എത്താനാകാതെ യു.ഡി.എഫ് കനത്ത തിരിച്ചടി ഏറ്റുവാങ്ങിയപ്പോള്‍,

ആഞ്ഞുവീശിയ ഇടതു കൊടുങ്കാറ്റില്‍ നേമത്തെ ഏക അക്കൗണ്ടു പോലും സൂക്ഷിക്കാന്‍ ബി.ജെ.പിക്കായില്ല. അവസാന റൗണ്ട് വരെ തൃശൂരിലും പാലക്കാട്ടും പ്രതീക്ഷ പുലര്‍ത്തിയ ബി.ജെ.പിക്ക് ഒടുവില്‍ അതും കൈവിടേണ്ടിവന്നു.

ശബരിമല സ്ത്രീ പ്രവേശന വിവാദവും വിശ്വാസ സംരക്ഷണ ചര്‍ച്ചയും നിയമസഭാ തെരഞ്ഞെടുപ്പ് പ്രചാരണ വേദിയില്‍ അങ്ങിങ്ങ് നിറഞ്ഞ് നിന്നിരുന്നെങ്കിലും പ്രശ്‌നം രാഷ്ട്രീയ കേരളം ആകെ ഏറ്റെടുക്കുന്ന വിധത്തിലേക്ക് വളര്‍ത്തിയെടുത്തത് വോട്ടെടുപ്പ് ദിവസം എന്‍എസ്എസ് ജനറല്‍ സെക്രട്ടറി ജി സുകുമാരന്‍ നായരുടെ പ്രസ്താവന വന്നതിന് ശേഷമാണ്.

പിന്തുടര്‍ന്ന് വന്ന സമദൂര നയം ഉപേക്ഷിച്ച എന്‍എസ്എസ് ജനറല്‍ സെക്രട്ടറി വിശ്വാസ സംരക്ഷണം കൂടി മുന്‍ നിര്‍ത്തി സംസ്ഥാനത്ത് ഭരണമാറ്റം ആഗ്രഹിക്കുന്നു എന്ന് വ്യക്തമാക്കിയതോടെ വിവാദം കത്തിപ്പടര്‍ന്നു.

ജനങ്ങള്‍ക്ക് സമാധാനം നല്‍കുന്ന, സാമൂഹ്യ നീതിയും മതേതരത്വവും സൂക്ഷിക്കുന്ന സര്‍ക്കാരുണ്ടാകണമെന്ന ജി സുകുമാരന്‍ നായരുടെ വാക്കില്‍ കടിച്ച് തൂങ്ങി വോട്ടെടുപ്പ് ദിനത്തിലെ രാഷ്ട്രീയ ചര്‍ച്ചയിലാകെ ശബരിമല നിറഞ്ഞു. എന്നാല്‍ 99 സീറ്റ് നേടി ഇടതുമുന്നണി മിന്നും ജയം കരസ്ഥമാക്കിയതോടെ പരസ്യ നിലപാടില്‍ പ്രതിരോധത്തിലാകുകയാണ് എന്‍എസ്എസ് നേതൃത്വം.

വിശ്വാസികള്‍ക്ക് അനുകൂലമായ നിലപാടെടുത്തെങ്കിലും എന്‍എസ്എസ് നേതൃത്വത്തിനെതിരെ പതിവില്ലാത്ത വിധത്തില്‍ പരസ്യ പ്രതികരണവുമായാണ് വോട്ടെടുപ്പ് ദിവസം തന്നെ ഇടതു നേതാക്കള്‍ രംഗത്തെത്തിയത്. സ്വാമി അയ്യപ്പന്‍ മാത്രമല്ല ദേവ ഗണങ്ങളെല്ലാം ഇടത് സര്‍ക്കാരിനൊപ്പമാണെന്ന് ധര്‍മ്മടത്ത് വോട്ട് ചെയ്യാനെത്തിയപ്പോള്‍ പറഞ്ഞ പിണറായി വിജയന്‍ എന്‍എസ്എസ് നേതൃത്വം പറഞ്ഞത് അണികള്‍ കേട്ടോ എന്ന പ്രതികരണമാണ് തെരഞ്ഞെടുപ്പ് ഫലം വന്ന ശേഷം നടത്തിയത്.

എന്‍എസ്എസ് നിലപാടില്‍ തെറ്റില്ലെന്നും വിശ്വാസ സംരക്ഷണത്തില്‍ ഇടതുമുന്നണി മലക്കം മറിഞ്ഞെന്നുമായിരുന്നു യുഡിഎഫ് നിലപാട്. ശബരിമല സത്യവാങ് മൂലം തിരുത്താന്‍ പിണറായി വിജയന്‍ തയ്യാറാകുമോ എന്ന് ഉമ്മന്‍ചാണ്ടി ചോദിച്ചപ്പോള്‍ സ്വാമി അയ്യപ്പനോട് പിണറായി മാപ്പുപറയണമെന്നായിരുന്നു എകെ ആന്റണിയുടെ പ്രതികരണം.

തെരഞ്ഞെടുപ്പിലുടനീളം ശബരിമല വിഷയം ഉയ!ര്‍ത്തി വോട്ട് ചോദിച്ച ബിജെപിയും പിണറായിയെ രൂക്ഷമായി വിമര്‍ശിച്ച് രംഗത്തെത്തി. എന്‍എസ്എസിനെതിരെ നടത്തിയ വിമര്‍ശനത്തിലും ശബരിമലയിലെ മുന്‍ നിലപാടില്‍ നിന്ന് പുറകോട്ട് പോയതിനും സര്‍ക്കാരിനെതിരെ തിരിഞ്ഞ പ്രതിപക്ഷ മുന്നണികളും ഫലം വന്ന ശേഷവും സമുദായ നേതൃത്വത്തെ പ്രതിരോധിക്കാന്‍ എന്ത് നിലപാട് എടുക്കുമെന്നും ശ്രദ്ധേയമാണ്.

സമദൂരമായിരുന്നു എന്‍എസ്എസ് മുഖമുദ്ര. മുന്നണികളോടുള്ള ശരിദൂരമായി പിന്നെ അത് മാറിയെങ്കിലും ശബരിമല വിശ്വാസ പ്രശ്‌നത്തില്‍ സര്‍ക്കാരിനെതിരായ പരസ്യ നിലപാട് എന്‍എസ്എസ് നേതൃത്വത്തിന്റെ ഭാഗത്ത് നിന്ന് ഉണ്ടായത് എന്തായാലും വരും ദിവസങ്ങളിലും രാഷ്ട്രീയ കേരളം ചര്‍ച്ച ചെയ്യുമെന്ന് ഉറപ്പ്.