ശക്തമായ കാറ്റിലും മഴയിലും വൈദ്യുതി നിലച്ചു..... ഓക്‌സിജന്‍ കോണ്‍സന്‍ട്രേറ്റര്‍ പ്രവര്‍ത്തിക്കാതെ മകള്‍ മരിച്ചു, മകളുടെ ചേതനയറ്റ മുഖം കണ്ടതോടെ അമ്മയും തളര്‍ന്ന് വീണു ഉടന്‍ ആശുപത്രിയില്‍ എത്തിച്ചെങ്കിലും രക്ഷിക്കായില്ല . തൃശൂര്‍ മതിലകത്താണ് സംഭവം നടന്നത്.

റിട്ട. കെ.എസ്.ഇ.ബി ജീവനക്കാരന്‍ മതിലകം വെസ്റ്റ് തോട്ടുപുറത്ത് ഉണ്ണികൃഷ്ണന്റെ ഭാര്യ പ്രീതി (49), മകള്‍ ഉണ്ണിമായ (27) എന്നിവരാണ് ഒരേ ദിവസം മരിച്ചത് .

കാട്ടൂര്‍ പൊഞ്ഞനം കോമരത്ത് ലാലിന്റെ ഭാര്യയായ ഉണ്ണിമായയ്ക്ക് ഹൃദയവാല്‍വ് സംബന്ധമായ തകരാറുകള്‍ ഉണ്ടായിരുന്നു . ഇതുമൂലം ഇടക്കിടെയുണ്ടാകുന്ന ശ്വാസ തടസ്സം മാറ്റാന്‍ വൈദ്യുതിയില്‍ പ്രവര്‍ത്തിക്കുന്ന ഓക്‌സിജന്‍ കോണ്‍സന്‍ട്രേറ്റര്‍ ഉപയോഗിക്കാറുള്ളത് പതിവാണ്.

എന്നാല്‍ വെള്ളിയാഴ്ച രാത്രി 11.30 ഓടെ ഉണ്ടായ കാറ്റിലും മഴയിലും വൈദ്യുതി നിലച്ചു. ഇതോടെ ഓക്‌സിജന്‍ കോണ്‍സന്‍ട്രേറ്റര്‍ പ്രവര്‍ത്തനരഹിതമായി.

ഓക്‌സിജന്‍ കിട്ടാതെ അവശയായ ഉണ്ണിമായയെ അയല്‍ക്കാര്‍ ആംബുലന്‍സ് വരുത്തി ആശുപത്രിയില്‍ എത്തിച്ചുവെങ്കിലും മരിച്ചു.എന്നാല്‍ മകളുടെ മരണ വിവരം അറിയിക്കാതെ കൂടെയുണ്ടായിരുന്ന സമീപവാസികള്‍ പ്രീതിയെ വീട്ടിലെത്തിക്കുകയായിരുന്നു. പിന്നാലെ മകളുടെ മൃതദേഹവും വീട്ടില്‍ എത്തിച്ചു .

മകളുടെ ചേതനയറ്റ മുഖം കണ്ടതോടെ തളര്‍ന്ന് വീണ പ്രീതിയെ ഉണ്ണിമായയുടെ മൃതദേഹം കൊണ്ടുവന്ന അതേ ആംബുലന്‍സില്‍ ആശുപത്രിയില്‍ എത്തിച്ചുവെങ്കിലും മരിക്കുകയായിരുന്നു.

വീട്ടുമുറ്റത്ത് ആദ്യം മകള്‍ക്കും പിറകെ അമ്മക്കും ചിതയൊരുങ്ങി. പ്രീതിയുടെ മകന്‍ അരുണ്‍ അന്ത്യകര്‍മ്മങ്ങള്‍ നിര്‍വ്വഹിച്ചു.ഇരുവരുടെയും വേര്‍പാട് ആ കുടുംബത്തിന് താങ്ങാവുന്നതിനുമപ്പുറമായിരുന്നു. ഒരു ദിവസം തന്നെ രണ്ടു പേരും യാത്രയായത് ആ നാടിനെ നൊമ്പരത്തിലാക്കി.