ഇസ്രയേലും പാലസ്തീനും തമ്മിലുള്ള സംഘര്‍ഷം രൂക്ഷമായതോടെ ലോക രാഷ്ട്രങ്ങള്‍ സമാധാനത്തിനുള്ള ശ്രമം നടത്തുകയാണ്. ഇന്നലെ ഇസ്രയേലിന്റെ ആക്രമണത്തില്‍ ഗാസയിലെ ഷാതി അഭയാര്‍ത്ഥി ക്യാമ്പിലെ എട്ട് കുട്ടികളടക്കം 10 പേര്‍ മരിച്ചു.

ഗാസയിലെ മൂന്നാമത്തെ വലിയ അഭയാര്‍ത്ഥി ക്യാമ്പാണ് ഷാതി. അര ചതുരശ്ര കിലോമീറ്ററിലായി പരന്നു കിടക്കുന്ന ക്യാമ്പില്‍ 85,000ത്തിലധികം പേരാണ് താമസിക്കുന്നത്.

വെസ്റ്റ് ബാങ്കില്‍ ഇസ്രയേല്‍ ആക്രമണത്തില്‍ 13 പാലസ്തീന്‍ പ്രക്ഷോഭകരും കൊല്ലപ്പെട്ടു. ഇതോടെ പാലസ്തീനിലെ മരണം 139 ആയി ഉയര്‍ന്നു. 920 പേര്‍ക്ക് പരിക്കേറ്റു. ഗാസയില്‍ ഇതുവരെ 31 കുട്ടികള്‍ കൊല്ലപ്പെട്ടു. ഇസ്രയേലില്‍ ഒരു കുട്ടി ഉള്‍പ്പെടെ ഒന്‍പതു പേര്‍ മരിച്ചു. 560 പേര്‍ക്ക് പരിക്കേറ്റു. ഇസ്രയേലിലെ അഷ്‌കലോണ്‍, അഷ്‌ദോദ് എന്നിവിടങ്ങളില്‍ ഇന്നലെ ഹമാസ് പ്രത്യാക്രമണം നടത്തി.

ഗാസയില്‍ പാലസ്തീന്‍ സായുധ ഗ്രൂപ്പുകള്‍ നിര്‍മ്മിച്ച ഭൂഗര്‍ഭ പാതകളുടെയും തുരങ്കങ്ങളുടെയും വന്‍ ശൃംഖല തകര്‍ക്കാന്‍ ഇസ്രേയേല്‍ വ്യോമാക്രമണവും പീരങ്കി ആക്രമണവും ശക്തമാക്കി. പാലസ്തീന്‍ ഗ്രൂപ്പുകളുടെ മെട്രോ എന്ന് വിശേഷിപ്പിക്കപ്പെടുന്ന തുരങ്കങ്ങള്‍ തകര്‍ക്കുന്നത് കരയുദ്ധത്തിന് മുന്നോടിയായാണെന്ന് ഇസ്രയേല്‍ വൃത്തങ്ങള്‍ പറയുന്നു.

ഗാസയില്‍ മാദ്ധ്യമ സ്ഥാപനങ്ങളായ അസോസിയേറ്റഡ് പ്രസിന്റെയും അല്‍ ജസീറയുടെയും ഓഫീസുകള്‍ പ്രവര്‍ത്തിക്കുന്ന കൂറ്റന്‍ ബഹുനില മന്ദിരം ഇന്നലെ ഇസ്രയേല്‍ തകര്‍ത്തു. നിരവധി ഓഫീസുകളും അപ്പാര്‍ട്ട്‌മെന്റുകളും ഉണ്ടായിരുന്ന മന്ദിരം ഒഴിയാന്‍ ഇസ്രയേല്‍ സേന ആവശ്യപ്പെട്ട് ഒരു മണിക്കൂര്‍ കഴിഞ്ഞായിരുന്നു ആക്രമണം.

പാലസ്തീന്‍ സംഘര്‍ഷം രൂക്ഷമായി തുടരുന്നതിനിടെ ഇസ്രയേലിന്റെ ആക്രമണം ചര്‍ച്ചചെയ്യാന്‍ ഇസ്ലാമിക സഹകരണ സംഘടനയിലെ 57 രാജ്യങ്ങളുടെ വിദേശമന്ത്രിമാരുടെ ഓണ്‍ലൈന്‍ ഉച്ചകോടി ഇന്ന് നടക്കും. സൗദി അറേബ്യയാണ് ഉച്ചകോടി വിളിച്ചത്. ഈജിപ്റ്റിന്റെയും ഖത്തറിന്റെയും നേതൃത്വത്തില്‍ സമവായ ശ്രമം ഊര്‍ജിതമാക്കിയതിന് പിന്നാലെയാണ് ലോകത്തെ ഏറ്റവും വലിയ ഇസ്ലാമിക ഗ്രൂപ്പ് സമ്മേളിക്കുന്നത്. ഇന്ന് യു. എന്‍ രക്ഷാ സമിതിയും പ്രശ്‌നം ചര്‍ച്ച നടത്തും.

അതിനിടെ പാലസ്തീനില്‍ എമ്പാടും ഇസ്രയേലിനെതിരെ പ്രതിഷേധവുമായി യുവജനങ്ങള്‍ തെരുവില്‍ ഇറങ്ങി. ഇസ്രയേലിന്റെ വടക്കു കിഴക്കന്‍ അതിര്‍ത്തി പ്രദേശങ്ങളിലെ പാലസ്തീന്‍ കുടുംബങ്ങള്‍ പലായനം തുടരുകയാണ്.

പാലസ്തീനിലെ ഇസ്രയേല്‍ ആക്രമണത്തിനെതിരെ ലോകമെമ്പാടും പ്രതിഷേധം അരങ്ങേറുന്നു. ജമ്മുകാശ്മീരില്‍ പ്രകടനം നടത്തിയവരെ പൊലീസ് അറസ്റ്റ് ചെയ്തു. സ്‌പെയിനിലും തുര്‍ക്കിയിലും ആസ്ര്‍ട്രേലിയയിലും ദക്ഷിണാഫ്രിക്കയിലും ഇസ്രയേലിനെതിരെ ആയിരങ്ങള്‍ തെരുവിലിറങ്ങി.

അതേസമയം അക്രമണം കടുപ്പിച്ച ഇസ്രയേല്‍ ഗാസ അതിര്‍ത്തിയില്‍ കൂടുതല്‍ സൈന്യത്തെ വ്യന്യസിച്ചു. വ്യോമസേനയും കരസേനയും അക്രമണം തുടങ്ങിയതായി ഇസ്രയേല്‍ സൈന്യം അറിയിച്ചു. 7000ത്തോളം ഇസ്രയേലി സൈന്യവും അതിര്‍ത്തിയില്‍ തമ്പടിച്ചിട്ടുണ്ട്. ഇതോടെ മേഖല യുദ്ധസമാനമായി മാറി. എന്നാല്‍ സൈന്യം ഇതുവരെ ഗാസയിലേക്ക് കടന്നുകയറിയിട്ടില്ലെന്നാണ് റിപ്പോര്‍ട്ട്.

ഇസ്രയേലും പാലസ്തീനും തമ്മിലുള്ള സംഘര്‍ഷം യുദ്ധമായി മാറുമോയെന്ന ആശങ്ക ലോകത്തിനുണ്ട്. ലോക സമാധാനത്തിന് തന്നെ ഇത് ഭീഷണിയായേക്കും. ഇവര്‍ തമ്മിലുള്ള സംഘര്‍ഷം കുറയ്ക്കാനാണ് മറ്റ് ലോക രാഷ്ട്രങ്ങള്‍ ശ്രമിക്കുന്നത്.