തെരഞ്ഞെടുപ്പ് തോല്‍വിക്ക് ശേഷം സുരേഷ് ഗോപിയെപ്പറ്റി അറിയാനില്ല. ഈ തെരഞ്ഞെടുപ്പിലും ദയനീയ പരാജയം ഏറ്റുവാങ്ങിയ സുരേഷ് ഗോപിക്കെതിരെ കടുത്ത വിമര്‍ശനം നടത്തുകയാണ് സാമൂഹിക നിരീക്ഷനും നടി കനി കുസൃതിയുടെ അച്ഛനുമായ മൈത്രേയന്‍.

ശബരിമല വിഷയം ഉപയോഗിച്ചുകൊണ്ട് വോട്ട് നേടാന്‍ ശ്രമിച്ചാല്‍ അതുകൊണ്ട് ഫലമുണ്ടാകില്ലെന്നാണ് മൈത്രേയന്‍ പറയുന്നത്. ബിജെപി നേതാക്കളെ ഉദ്ദേശിച്ചുകൊണ്ടാണ് ഒരു യൂട്യൂബ് ചാനലിനോട് അദ്ദേഹം ഈ അഭിപ്രായം പറഞ്ഞത്. മനുഷ്യരെ വിശ്വാസത്തിന്റെ പേരില്‍ വികാരപരമായി മുതലെടുക്കുക എന്നത് സാധ്യമല്ലെന്നും അറിവ് നേടുന്തോറും മനുഷ്യന് ആരാധനാലയങ്ങളുടെ ആവശ്യമില്ലാതായി വരുമെന്നും മൈത്രേയന്‍ പറയുന്നു.

വിവിധ മതവിശ്വാസങ്ങളെ കുറിച്ച് വിദ്യാഭ്യാസ സ്ഥാപനങ്ങളില്‍ പഠിപ്പിക്കാത്തത് അത് മനുഷ്യന് ആവശ്യമില്ലാത്തതായതുകൊണ്ടാണെന്നും അദ്ദേഹം പറയുന്നു.

മനുഷ്യന് സാമൂഹിക സുരക്ഷിതത്വം നല്‍കുന്ന സംവിധാനങ്ങള്‍ ഇല്ലാത്തതുകൊണ്ടാണ് വിവിധ മതവിശ്വാസങ്ങള്‍ നിലനില്‍ക്കുന്നതെന്നും പൂര്‍ണമായ സാമൂഹിക സുരക്ഷിതത്വം ഉണ്ടായിവരികയാണെങ്കില്‍ ഈ മതവിശ്വാസം ഇല്ലാതാകുമെന്നും മൈത്രേയന്‍ അഭിപ്രായപ്പെടുന്നു.

ഈ ചിന്തയ്ക്ക് വിരുദ്ധമായി എന്തോ മഹത്തായ കാര്യത്തിനാണെന്ന് പറഞ്ഞുകൊണ്ട് അഭിനയിക്കുകയാണെങ്കില്‍ ആളുകള്‍ അതിനെ അഭിനയമായി തന്നെ ആളുകള്‍ കണക്കാക്കുമെന്നും അദ്ദേഹം പറഞ്ഞു. ബിജെപി നേതാവും നടനുമായ സുരേഷ് ഗോപിയെ ചൂണ്ടിക്കാണിച്ചുകൊണ്ടാണ് മൈത്രേയന്‍ ഇക്കാര്യം പറഞ്ഞത്.

സുരേഷ് ഗോപിയുടേത് അഭിനയമാണെന്ന് ജനങ്ങള്‍ക്ക് മാസിലായിട്ടുണ്ടെങ്കില്‍ അദ്ദേഹത്തിന് അഭിനയിക്കാനും അറിയില്ല എന്ന് തനിക്ക് പറയേണ്ടി വരുമെന്നും മൈത്രേയന്‍ പരിഹസിക്കുന്നു. ആരാധനാലയങ്ങള്‍ വര്‍ഷങ്ങളായി ആളുകള്‍ സാമൂഹികപരമായും സാമ്പത്തികപരമായും മറ്റും ഒത്തുകൂടുന്ന സ്ഥലങ്ങളാണെന്നും വിശ്വാസത്തിന്റെ ബലത്തിലല്ല അവ നിലനില്‍ക്കുന്നതെന്നും അദ്ദേഹം അഭിപ്രായപ്പെടുന്നു.

ആള്‍ക്കാരുടെ ജീവിതചര്യയുമായും ജീവിതാവശ്യങ്ങളുമായും ബന്ധപ്പെട്ടുകൂടിയാണ് അവ നിലനില്‍ക്കുന്നതെന്നും മൈത്രേയന്‍ പറഞ്ഞു. ആരാധനാലയങ്ങളെന്ന സംവിധാനങ്ങള്‍ക്ക് പകരം സാമൂഹികസുരക്ഷ ഉറപ്പാക്കുന്ന, ജീവിതനിലവാരം ഉറപ്പാക്കുന്ന സംവിധാനങ്ങള്‍ ഇനിയും ആവശ്യത്തിന് എത്തിയിട്ടില്ല എന്നുള്ളതാണ് നിലവിലെ പ്രശ്‌നം.യഥാര്‍ത്ഥ അറിവിന്റെ ലോകത്ത് വിശ്വാസങ്ങള്‍ക്ക് സ്ഥാനമില്ല.

അതുകൊണ്ടാണ് വിശ്വാസങ്ങളെ പൊലിപ്പിച്ചുകാട്ടികൊണ്ട്, തിരഞ്ഞെടുപ്പില്‍ ജയിക്കാന്‍ ശ്രമിച്ചതുകൊണ്ടാണ് ചില ആളുകള്‍ തോറ്റുപോകുന്നത്. ആശ്വാസത്തിന്റെ യുക്തിക്കകത്ത് മാത്രമാണ് വിശ്വാസങ്ങള്‍ നിലനില്‍ക്കുന്നത് എന്നറിയുന്ന ഒരു സമൂഹമായി നാം മാറിക്കഴിഞ്ഞിട്ടുണ്ട്.

ഭാവപ്രകടനങ്ങള്‍ കൊണ്ട് വോട്ട് കിട്ടുമെന്ന് കരുതുന്നവരുണ്ടെങ്കില്‍ അങ്ങനെ അത് ലഭിക്കില്ലെന്ന് പഠിക്കുക കൂടി ചെയ്യുക. മൈത്രേയന്‍ പറയുന്നു. നിയമസഭാ തിരഞ്ഞെടുപ്പ് അടുത്തിരുന്ന വേളയില്‍, ശബരിമല വിഷയം സംബന്ധിച്ച ഒരു ചോദ്യം വന്നപ്പോള്‍ തൃശൂരിലെ ബിജെപി സ്ഥാനാര്‍ത്ഥി കൂടിയായ സുരേഷ്‌ഗോപി ഒരു മാദ്ധ്യമപ്രവര്‍ത്തകനോട് കയര്‍ത്തു സംസാരിച്ചതിന്റെ വീഡിയോ, സോഷ്യല്‍ മീഡിയ വഴിയും മറ്റുമായി വിമര്‍ശനങ്ങള്‍ ക്ഷണിച്ചുവരുത്തിയിരുന്നു.

എന്തായാലും മൈത്രേയന്റെ വിമര്‍ശനം ഏറെ ചര്‍ച്ചയായിട്ടുണ്ട്. ഇതിന് സുരേഷ് ഗോപി എങ്ങനെ പ്രതികരിക്കുമെന്നാണ് ഇനി അറിയാനുള്ളത്.