എന്‍സിപിയുടെ മന്ത്രി എ കെ ശശീന്ദ്രനോ, തോമസ് കെ തോമസോ? ഇപ്പോഴത്തെ സാഹചര്യമനുസരിച്ച് തോമസ് ചാണ്ടിയുടെ സഹോദരന്‍ തോമസ് കെ തോമസ് മന്ത്രിയാവാനാണ് സാധ്യത. എ.കെ. ശശീന്ദ്രനെ വെട്ടിയത് മറ്റാരുമല്ല,സി പി എം തന്നെയാണ്.

എ.കെ. ശരിന്ദ്രനെ ഇക്കുറി മന്ത്രിയാക്കേണ്ടതില്ലെന്ന് മുഖ്യമന്ത്രി വളരെ നേരത്തെ തീരുമാനിച്ചു എന്നാണ് ശശീന്ദ്രനുമായി ബന്ധപ്പെട്ടവര്‍ സംശയിക്കുന്നത്. തോമസ് ചാണ്ടിയുടെ രാജിക്ക് ശേഷം മനസില്ലാമനസോടെയാണ് ശശീന്ദ്രനെ പിണറായി മന്ത്രിയാക്കിയത്. തോമസ് ചാണ്ടിയുമായി പിണറായിക്ക് ഉണ്ടായിരുന്നത് വര്‍ഷങ്ങളായുള്ള അടുപ്പമാണ്.

തോമസ് ചാണ്ടിക്ക് എന്‍ സി പിയില്‍ അനിഷേധ്യമായ സ്ഥാനമാണ് പിണറായി നല്‍കിയിരുന്നത്. ശശീന്ദ്രനെതിരെ മംഗളം ചാനല്‍ പുറത്തുവിട്ട ലൈംഗിക ആരോപണത്തോടെയാണ് ശശീന്ദ്രനോട് പിണറായിക്ക് താത്പര്യം കുറഞ്ഞു തുടങ്ങിയത്.

യഥാര്‍ത്ഥത്തില്‍ എന്‍ സിപിയില്‍ കലാപം സൃഷ്ടിച്ചിരിക്കുന്നത് സി പി എം തന്നെയാണ്. അതിന് നേതൃത്വം നല്‍കിയത് പിണറായി വിജയന്‍ തന്നെയാണെന്നാണ് റിപ്പോര്‍ട്ടുകള്‍.

മന്ത്രി സ്ഥാനത്തെ ചൊല്ലിയുള്ള തര്‍ക്കം തീര്‍ക്കാന്‍ ദേശീയ ജനറല്‍ സെക്രട്ടറി പ്രഫുല്‍ പട്ടല്‍ കേരളത്തില്‍ വരാനിരിക്കെ തോമസ് കെ തോമസും ശശീന്ദ്രനും തമ്മിലുള്ള യുദ്ധം മുറുകുകയാണ് . എ കെ ശശീന്ദ്രന്‍ പക്ഷത്തെ പ്രമുഖനായ റസാഖ് മൗലവിയെ അച്ചടക്കം ലംഘനത്തിന്റെ പേരില്‍ ജനറല്‍ സെക്രട്ടറി സ്ഥാനത്ത് നിന്ന് ടി പി പീതാംബരന്‍ പുറത്താക്കിയത് സി പി എം നല്‍കിയ നിര്‍ദ്ദേശപ്രകാരമാണ്. നടപടിക്കെതിരെ ദേശീയ നേതൃത്വത്തെ സമീപിക്കുമെന്ന് ശശീന്ദ്രന്‍ പക്ഷം പ്രതികരിച്ചു..

പ്രഫുല്‍ പട്ടേലുമായുള്ള ചര്‍ച്ചകളിലാണ് ഏവരും ഉറ്റുനോക്കുന്നത്. ഇതിനിടെയാണ് നേതാക്കളെ പിന്തുണയ്ക്കുന്നവരെ വെട്ടിനിരത്തി ഗ്രൂപ്പ് പോര് ശക്തമാക്കുന്നത്. പാലായില്‍ മാണി സി കാപ്പന്റെ വിജയത്തെ പ്രകീര്‍ത്തിച്ച സംസ്ഥാന അധ്യക്ഷന്‍ ടി പി പീതാംബരനെ വിമര്‍ശിച്ചതിനാണ് ശശീന്ദ്രന്‍ പക്ഷത്തെ പ്രമുഖനായ റസാഖ് മൗലവിയ്ക്ക് കാരണം കാണിക്കല്‍ നോട്ടീസ് നല്‍കിയത്. തൊട്ട് പിറകെ നിശ്ചയിച്ച സമയത്ത് മറുപടി ലഭിച്ചില്ലെന്ന് ചൂണ്ടികാട്ടി പാര്‍ട്ടി ജനറല്‍ സെക്രട്ടറി സ്ഥാനത്ത് നിന്ന് നീക്കി. പീതാംബരന്‍ മാസ്റ്ററുടെ നടപടി തോമസ് കെ തോമസിന് വേണ്ടിയാണെന്നാണ് എ കെ ശന്ദീന്ദ്രന്‍ പക്ഷം ആരോപിക്കുന്നത്. നടപടി ചോദ്യം ചെയ്ത് ദേശീയ നേതൃത്വത്തെ സമീപിക്കുമെന്ന് റസാഖ് മൗലവിയും പ്രതികരിച്ചു.

മാണി സി കാപ്പന്‍ പാര്‍ട്ടി വിട്ടതോടെ തോമസ് കെ തോമസിന്റെ നേതൃത്വത്തില്‍ എന്‍സിപിയില്‍ പുതിയ ചേരി രൂപംകൊണ്ടിട്ടുണ്ട്. പാര്‍ട്ടി വിട്ടു പോയ കാപ്പനെ എന്‍സിപിയില്‍ മടക്കി കൊണ്ടുവന്ന് ഇടതുപക്ഷത്തിന്റെ സീറ്റ് 100 ആക്കണമെന്ന ആഗ്രഹമാണ് പീതാംബരനുള്ളത്.

ടി പി പീതാംബരന്റെ പിന്തുണയും തോമസ് കെ തോമസിനാണ്. തെരഞ്ഞെടുപ്പിന് പിറകെ ശശീന്ദ്രന്‍ പക്ഷത്തെ മറ്റ് മൂന്ന് നേതാക്കള്‍ക്ക് കൂടി ടി പി പീതാംബരന്‍ നോട്ടീസ് നല്‍കിയിട്ടുണ്ട്. ഈ സാഹചര്യത്തില്‍ കേന്ദ്ര പിന്തുണയോടെ സംസ്ഥാന തലത്തില്‍ പുനസംഘടനയ്ക്കും എ കെ ശശീന്ദ്രന്‍ പക്ഷം ശ്രമിക്കുന്നു.

ടി പി പീതാംബരനെ മാറ്റി പി സി ചാക്കോയെ അധ്യക്ഷ സ്ഥാനത്ത് കൊണ്ടുവരാനുള്ള നീക്കവും എ കെ ശശീന്ദ്രന്‍ വിഭാഗം തുടങ്ങിയിട്ടുണ്ട്. പക്ഷേ ചാക്കോ വരുന്നതിനോട് സി പി എമ്മിന് തീര്‍ത്തും യോജിപ്പില്ല. തോമസ് കെ തോമസിനും എ.കെ. ശശീന്ദ്രനും മന്ത്രി സ്ഥാനം വിഭജിച്ച് നല്‍കാനുള്ള ഫോര്‍മുലയും ചിലപ്പോള്‍ പരീക്ഷിച്ചേക്കാം.