ഇടനെഞ്ച് നീറിപ്പുകഞ്ഞ്... റോക്കറ്റ് ആക്രമണത്തില് കൊല്ലപ്പെട്ട സൗമ്യ സന്തോഷ് ഒരു നാടിന്റെ ആദരവ് ഏറ്റുവാങ്ങി പറന്നകന്നു; ഇസ്രയേല് ജനതയ്ക്ക് മാലാഖയായിരുന്നു സൗമ്യയെന്ന് കോണ്സല് ജനറല്; നാടിന്റെ വിങ്ങിപ്പൊട്ടലില് കോണ്സല് ജനറലും
ഇസ്രായേലില് റോക്കറ്റ് ആക്രമണത്തില് കൊല്ലപ്പെട്ട സൗമ്യ സന്തോഷിന് നാട് കണ്ണീരില് കുതിര്ന്ന യാത്രയയപ്പ് നല്കി. രാജ്യത്തിന്റെ മുഴുവന് ബാഷ്പാഞ്ജലികള് ഏറ്റുവാങ്ങി ഇടുക്കി കീരിത്തോട് നിത്യസഹായ മാതാ ദേവാലയത്തിലെ കല്ലറയില് സൗമ്യ അനന്തതയിലേക്ക് മറഞ്ഞു.
സൗമ്യ സന്തോഷ് തങ്ങളുടെ മാലാഖയാണെന്നായിരുന്നു ഇസ്രയേലിന്റെ ഇന്ത്യന് സതേണ് കോണ്സല് ജനറല് ജൊനാദന് സഡ്ക പറഞ്ഞത്. കീരിത്തോടുള്ള സൗമ്യയുടെ വീട്ടില് അന്തിമോപചാരം അര്പ്പിച്ചശേഷം സംസാരിക്കുകയായിരുന്നു അദേഹം.
സൗമ്യയുടെ വിയോഗ വാര്ത്ത വിശ്വസിക്കാന് കഴിയുന്നില്ല. ഈ കുടുംബത്തെ സംബന്ധിച്ച് സൗമ്യയുടെ നഷ്ടം അവിശ്വസനീയമാണ്. ഇസ്രയേല് ജനങ്ങള് സൗമ്യയെ ഒരു മാലാഖയായാണ് കണ്ടിരുന്നത്. സൗമ്യയുടെ കുടുംബത്തോട് ഇസ്രയേല് സര്ക്കാര് ചേര്ന്നു നില്ക്കും. ഈ കുടുംബത്തിന് പൂര്ണ പിന്തുണ നല്കും.
സൗമ്യയുടെ നാടിന്റെയും കുടുംബാംഗങ്ങളുടെയും സുഹൃത്തുക്കളുടെയും ദുഃഖത്തില് പങ്കുചേരുന്നതായും ജൊനാദന് സഡ്ക പറഞ്ഞു. ഭൗതികദേഹത്തില് പുഷ്പചക്രം അര്പ്പിച്ച ശേഷം അദ്ദേഹം വീടിനുള്ളില് കടന്ന് സൗമ്യയുടെ ഭര്ത്താവ് സന്തോഷ്, മകന് അഡോണ്, ബന്ധുക്കള് എന്നിവരെ ആശ്വസിപ്പിച്ചു.
സൗമ്യയുമായി ബന്ധപ്പെട്ട് ആവശ്യമായ റിപ്പോര്ട്ടുകള് അയയ്ക്കുന്നത് വേഗത്തിലാക്കണമെന്ന് ജില്ലാ കലക്ടര് എച്ച.് ദിനേശിനോട് അഭ്യര്ഥിച്ചു. സൗമ്യയുടെ വീടിന്റെ ദുരവസ്ഥയും ചുറ്റുപാടുകളും അദ്ദേഹം നോക്കിക്കണ്ടു.
ഇസ്രയേലില് റോക്കറ്റാക്രമണത്തില് കൊല്ലപ്പെട്ട കീരിത്തോട് കാഞ്ഞിരന്താനം വീട്ടില് സൗമ്യയുടെ ഭൗതികശരീരം ശനിയാഴ്ച രാത്രി പത്തോടെയാണ് നെടുമ്പാശേരിയില്നിന്നു കീരിത്തോട് ജങ്ഷനിലുള്ള വീട്ടിലെത്തിച്ചത്. രാത്രി വൈകിയും നിരവധിപ്പേര് സൗമ്യയെ ഒരുനോക്കു കാണാന് കാത്തിരുന്നു. ഇന്നലെ പൊതുദര്ശനത്തിനു വച്ച സൗമ്യയുടെ ഭൗതികശരീരം കാണാന് കോവിഡ് നിയന്ത്രണങ്ങള്ക്കിടയിലും നിരവധിപേ രെത്തി. മൃതദേഹത്തില് ഗവര്ണര് ആരിഫ് മുഹമ്മദ് ഖാനു വേണ്ടി ജില്ലാ കലക്ടര് എച്ച്. ദിനേശന് പുഷ്പചക്രം സമര്പ്പിച്ചു.
ഇസ്രയേല് കോണ്സല് ജനറല് ജൊനാദന് സഡ്ക സൗമ്യയുടെ സാന്നിധ്യം ശ്രദ്ധേയമായി. സൗമ്യയുടെ ചെറിയ വീടിനുള്ളില് കടന്ന് സന്തോഷിന്റയും മകന് അഡോണിന്റെും മറ്റു കുടുംബാംഗങ്ങളുടെ ദുഃഖത്തില് അദ്ദേഹം പങ്കുചേര്ന്നു. ഇന്ത്യയുടേയും ഇസ്രയേലിന്റെയും പതാകയടങ്ങിയ ബാഡ്ജ് സൗമ്യയുടെ മകന് അഡോണിനെ അണിയിച്ച് കുടുംബത്തെ ചേര്ത്തുപിടിക്കുമെന്ന സന്ദേശം നല്കിയാണ് കോണ്സല് ജനറല് മടങ്ങിയത്.
ഉച്ചകഴിഞ്ഞ് 2.15 നു വീട്ടില് സംസ്കാരച്ചടങ്ങുകള് ആരംഭിച്ചു. ഇടുക്കി രൂപത ജനറാള് മോണ്. ജോസ് പ്ലാച്ചിക്കല്, നിത്യസഹായ മാതാ പള്ളി വികാരി ഫാ. ടോം പാറയ്ക്കല് എന്നിവരുടെ കാര്മികത്വത്തില് വീട്ടിലെ പ്രാര്ഥനാ ശുശ്രൂഷകള്ക്കുശേഷം പള്ളിയിലെത്തിച്ച മൃതദേഹം മൂന്നരയോടെ സംസ്കരിച്ചു. ഇടുക്കി രൂപത ബിഷപ് മാര് ജോണ് നെല്ലിക്കുന്നേലിന്റെ കാര്മികത്വത്തിലായിരുന്നു പള്ളിയിലെ ചടങ്ങുകള്.
കഴിഞ്ഞ ചൊവ്വാഴ്ചയാണ് ഇസ്രയേലില് കെയര് ടെയ്ക്കറായി ജോലി ചെയ്യുകയായിരുന്ന സൗമ്യ ഹമാസിന്റെ റോക്കറ്റ് ആക്രമണത്തില് കൊല്ലപ്പെട്ടത്.
ഭര്ത്താവ് സന്തോഷുമായി വീഡിയോ കോളില് സംസാരിക്കവെയായിരുന്നു റോക്കറ്റ് ആക്രമണം. വെള്ളിയാഴ്ച രാത്രി ഇസ്രയേല് ക്രമീകരിച്ച പ്രത്യേക വിമാനത്തില് ഡല്ഹിയിലെത്തിച്ച മൃതദേഹം ശനിയാഴ്ച ഉച്ചയോടെ നെടുമ്പാശേരിയില് ബന്ധുക്കള് ഏറ്റുവാങ്ങിയത്. ഇസ്രായേല് ഹമാസ് ആക്രമണം തുടരുന്നിടെ തീരാ വേദനയായി അങ്ങനെ സൗമ്യ സന്തോഷ് മാറി.
"
https://www.facebook.com/Malayalivartha
