എസ്എസ്എല്സി, പ്ലസ് ടു വിദ്യാര്ഥികള്ക്ക് അധ്യാപകര് ഓണ്ലൈനില് ക്ലാസുകള് നല്കും; പുതിയ പദ്ധതിയുമായി കൈറ്റ്
കൊവിഡ് പശ്ചാത്തലത്തില് സംസ്ഥാനത്തെ വിദ്യാലയങ്ങളിലെ ഓണ്ലൈന് പഠനം കൂടുതല് കാര്യക്ഷമമാക്കാന് ഇനി കേന്ദ്രീകൃത പ്ലാറ്റ് ഫോം. പൊതുവിദ്യാഭ്യാസ വകുപ്പിന്റെ കൈറ്റാണ് 10, പ്ലസ് ടു ക്ലാസുകളില് ഓണ്ലൈന് ക്ലാസുകള്ക്കായി പദ്ധതി തയ്യാറാക്കുന്നത്. കോവിഡ് മഹാമാരി വ്യാപനം പൂര്ണമായും തടയുന്നതുവരെ സ്കൂള് തുറക്കാന് കഴിയാത്ത സാഹചര്യത്തിലാണ് ജൂണ് ഒന്നിന് ആരംഭിക്കുന്ന ഡിജിറ്റല് ക്ലാസുകള്ക്കുപുറമെ എസ്എസ്എല്സി, പ്ലസ് ടു വിദ്യാര്ഥികള്ക്ക് അധ്യാപകര് ഓണ്ലൈനില് ക്ലാസുകള് നല്കുന്നതിനുള്ള സംവിധാനവും ഒരുക്കുന്നത്. സ്വതന്ത്ര സോഫ്റ്റ്വെയറിന്റെ സാങ്കേതിക സഹായത്തോടെയാണ് പ്രത്യേക ഡിജിറ്റല് പ്ലാറ്റ്ഫോം തയ്യാറാക്കുന്നത്. ഓരോ വിഷയത്തിലും ക്ലാസെടുക്കുന്ന അധ്യാപകരെ നേരില് കാണാനും വിദ്യാര്ഥികളെ മുഴുവന് ഓണ്ലൈനില് കണ്ട് അധ്യായനം നടത്താനും അധ്യാപകര്ക്കും പൊതുവിദ്യാലയങ്ങളില് അവസരം ലഭിക്കും. വിദ്യാര്ഥികള്ക്ക് രക്ഷിതാക്കളുടെ മൊബൈല് ഫോണില് ലഭിക്കുന്ന ലിങ്കിലൂടെ ക്ലാസില് കയറാനാകും. ഓരോ വിഷയത്തിലും അധ്യാപകര്ക്ക് ഒരു മണിക്കൂര്വരെ തടസ്സമില്ലാതെ ക്ലാസുകള് നല്കാനാകും. വിക്ടേഴ്സ് ചാനലിലൂടെ സംപ്രേഷണം ചെയ്യുന്ന ഡിജിറ്റല് ക്ലാസുകള് ഈ ഓണ്ലൈന് ലിങ്കിലൂടെയും അധ്യാപകര്ക്ക് കാണിക്കാനാകും.
ഡിജിറ്റല് ക്ലാസുകള് കൂടുതല് വിശദീകരിച്ച് വിദ്യാര്ഥികളുടെ സംശയനിവാരണം ഉള്പ്പെടെ നടത്താന് അതത് വിഷയങ്ങളിലെ ക്ലാസ് അധ്യാപകര്ക്ക് ഇതിലൂടെ കഴിയും. ആഴ്ചയില് ആറു ദിവസവും ക്ലാസുകള് നല്കാന് കഴിയും. ഓരോ സ്കൂളിനും ക്ലാസിനും ഓരോ വിഷയങ്ങള്ക്കും പ്രത്യേകം ഓണ്ലൈന് പഠന പ്ലാറ്റ് ഫോമാണ് തയ്യാറാകുന്നതെന്ന് കൈറ്റ് സിഇഒ കെ അന്വര്സാദത്ത് അറിയിച്ചു. ഓണ്ലൈന് പഠന പ്ലാറ്റ്ഫോം ട്രയല് റണ്ണിന് ശേഷം പൊതുവിദ്യാഭ്യാസവകുപ്പിന് സമര്പ്പിക്കുമെന്നും അദ്ദേഹം പറഞ്ഞു.
https://www.facebook.com/Malayalivartha
