വാടകയ്‌ക്കെടുത്ത സ്‌കൂട്ടറുമായി മുങ്ങിയ യുവതിയെയും യുവാവിനെയും പൊലീസ് പിടികൂടി. ഇരുവരും തൃശൂരില്‍ നിന്നാണ് പോലീസിന്റെ പിടിയിലായത്. തൃശൂര്‍ കുണ്ടുകാട് വെറ്റിലപ്പാറ പിണ്ടിയേടത്ത് പി.എസ്. ശ്രുതി (29), തൃശൂര്‍ വെളുത്തൂര്‍ കാട്ടിപ്പറമ്ബ് കെ.എസ്. ശ്രീജിത്ത് (30) എന്നിവരാണ് പിടിയിലായത്. റെന്റ് എ ബൈക്ക് സ്ഥാപനത്തില്‍നിന്ന് വാടകയ്‌ക്കെടുത്ത സ്‌കൂട്ടറുമായാണ് യുവതിയും സുഹൃത്തും മുങ്ങിയത്. കഴിഞ്ഞ ഫെബ്രുവരി 24 ന് ഫോര്‍ട്ടുകൊച്ചി ചിരട്ടപ്പാലത്ത് പ്രവര്‍ത്തിക്കുന്ന ട്രാവല്‍ ഇന്ത്യ ഫോര്‍ട്ട് റെന്റ് എ ബൈക്ക് എന്ന സ്ഥാപനത്തില്‍ നിന്നാണ് ഇരുവരും സ്‌കൂട്ടര്‍ വാടകയ്‌ക്കെടുത്തത്. തുടര്‍ന്ന് സ്‌കൂട്ടറുമായി പ്രതികള്‍ മുങ്ങുകയായിരുന്നു. സ്ഥാപന ഉടമയായ പയസ് നല്‍കിയ പരാതിയുടെ അടിസ്ഥാനത്തില്‍ കേസ് രജിസ്റ്റര്‍ ചെയ്ത് നടത്തിയ അന്വേഷണത്തിലാണ് ഇരുവരും കുടുങ്ങിയത്.