പോര്‍ട്ടോ ജര്‍മെനോയിലും ആറ്റിക്ക- ബൊയോട്ടിയയിലും കാട്ടുതീ പടര്‍ന്നുപിടിക്കുന്നു. ആറ്റിക്ക- ബൊയോട്ടിയയില്‍ പടര്‍ന്നുപിടിച്ച കാട്ടുതീയില്‍ 27,000 ഏക്കറിലധികം കത്തിനശിച്ചതായി ഏഥന്‍സിലെ നാഷനല്‍ ഒബ്‌സര്‍വേറ്ററി വിശകലനം ചെയ്ത സാറ്റ്‌ലൈറ്റ് ഡേറ്റയില്‍ പറയുന്നു.

പോര്‍ട്ടോ ജെര്‍മനോയിലുണ്ടായ കാട്ടുതീയില്‍ ഏകദേശം 19,970 ഏക്കര്‍ വനമാണ് കത്തിനശിച്ചത്. വീടുകള്‍ക്കും സ്ഥാപനങ്ങള്‍ക്കും ഉള്‍പ്പെടെ നാശനഷ്ടം സംഭവിച്ചിട്ടുണ്ട്. ശക്തമായ കാറ്റാണ് തലസ്ഥാനമായ ഏഥന്‍സില്‍ നിന്നും ഏകദേശം 65 കിലോമീറ്റര്‍ വടക്കുപടിഞ്ഞാറായി സ്ഥിതിചെയ്യുന്ന ഈ മേഖലയില്‍ കാട്ടുതീ പടര്‍ന്നു പിടിക്കാന്‍ കാരണമാക്കുന്നത്. നൂറുകണക്കിന് വരുന്ന അഗ്‌നിശമന സേനാംഗങ്ങള്‍ സ്ഥലത്തെത്തി തീ അണയ്ക്കാനുള്ള കഠിനശ്രമത്തിലാണ്.

കൊടുങ്കാറ്റിന് സമാനമായ കാറ്റ് വീശുന്നതിനാല്‍ വെള്ളമൊഴിച്ച് തീ അണയ്ക്കുന്ന വാട്ടര്‍ ബോംബര്‍ വിമാനങ്ങള്‍ക്കും ഹെലികോപ്റ്ററുകള്‍ക്കും പറന്നുയരാന്‍ സാധിക്കുന്നില്ല. ഇത് രക്ഷാപ്രവര്‍ത്തനത്തെ ബാധിച്ചിട്ടുണ്ട്.

യൂറോപ്പിലുടനീളം അനുഭവപ്പെടുന്ന കനത്ത വേനല്‍ച്ചൂടിനിടെ റിപ്പോര്‍ട്ട് ചെയ്യുന്ന ഏറ്റവും പുതിയ കാട്ടുതീയാണ് ഏഥന്‍സിലേത്. പോര്‍ട്ടോ ജര്‍മെനോയിലെ ജനവാസ മേഖലകളിലേക്കും റിസോര്‍ട്ടുകളിലേക്കും തീ പടരാതിരിക്കാന്‍ കരമാര്‍ഗമുള്ള രക്ഷാപ്രവര്‍ത്തനം ആരംഭിച്ചിട്ടുണ്ട്.

സ്ഥലത്ത് അടിയന്തര സുരക്ഷാ മുന്നറിയിപ്പുകള്‍ നല്‍കിയിട്ടുണ്ടെന്നും പ്രദേശവാസികളെയും വിനോദസഞ്ചാരികളെയും സുരക്ഷിത സ്ഥാനങ്ങളിലേക്ക് മാറ്റാനുള്ള നടപടികള്‍ പുരോഗമിക്കുകയാണെന്നും അധികൃതര്‍ വ്യക്തമാക്കി.