ഡിവോഴ്സിന് പിന്നാലെ ആത്മഹത്യ . അപ്പാർട്ട്മെന്റ് കെട്ടിടത്തിന്റെ അഞ്ചാംനിലയിൽനിന്ന് വീണ് മനോരോഗ ചികിത്സാവിദഗ്ധയായ വനിതാ ഡോക്ടർ ദാരുണമായി മരിച്ചു. ഗാസിയാബാദിലെ രാജ്നഗർ എക്സ്റ്റൻഷനിൽ താമസിക്കുന്ന ഡോ. ഹേമിക അഗർവാൾ (40) ആണ് മരിച്ചത്. മരണം ആത്മഹത്യയാണോ എന്നതടക്കമുള്ള കാര്യങ്ങളിൽ പൊലീസ് അന്വേഷണം ആരംഭിച്ചിട്ടുണ്ട്.ഞായറാഴ്ച രാത്രി ഏഴരയോടെയാണ് സംഭവമുണ്ടായതെന്ന് പൊലീസ് വ്യക്തമാക്കി.

അപ്പാർട്ട്മെന്റ് കെട്ടിടത്തിന്റെ മുകളിൽനിന്ന് താഴേക്ക് വീണ യുവതിയെ മറ്റ് താമസക്കാരാണ് സമീപത്തെ ആശുപത്രിയിൽ എത്തിച്ചത്. എന്നാൽ ജീവൻ രക്ഷിക്കാനായില്ല. ആശുപത്രിയിൽ എത്തുമ്പോഴേക്കും മരണം സംഭവിച്ചിരുന്നു.ഒന്നരവർഷം മുൻപാണ് ഡോ. ഹേമിക വിവാഹമോചിതയായതെന്ന് കുടുംബാംഗങ്ങൾ പൊലീസിനോട് പറഞ്ഞു. ഇതിനുശേഷമായി മകൾ കടുത്ത മാനസികപ്രയാസങ്ങളും വിഷമങ്ങളും നേരിട്ടിരുന്നതായി പിതാവും മനോരോഗ ചികിത്സാവിദഗ്ധനുമായ ഡോ. ആർ. ചന്ദ്ര വ്യക്തമാക്കി.

മകൾ ചികിത്സ തേടിയിരുന്നതുമായി ബന്ധപ്പെട്ട മുഴുവൻ വിവരങ്ങളും രേഖകളും പൊലീസിന് കൈമാറിയിട്ടുണ്ടെന്നും അദ്ദേഹം കൂട്ടിച്ചേർത്തു.സംഭവത്തിൽ എല്ലാ വശങ്ങളും വിശദമായി പരിശോധിച്ചുവരികയാണെന്നും ഇതുവരെ ആത്മഹത്യാ കുറിപ്പോ മറ്റോ കണ്ടെടുത്തിട്ടില്ലെന്നും പൊലീസ് അറിയിച്ചു. സംഭവസ്ഥലത്ത് എത്തിയ ഫൊറൻസിക് വിദഗ്ധരുടെ സംഘം വിശദമായ തെളിവെടുപ്പ് നടത്തി. തുടർനടപടികൾക്ക് ശേഷം മൃതദേഹം പോസ്റ്റ്മോർട്ടത്തിനായി ആശുപത്രി മോർച്ചറിയിലേക്ക് മാറ്റി.

നന്ദഗ്രാം അസിസ്റ്റന്റ് കമ്മീഷണർ സിയാവുദ്ദീൻ അഹമ്മദ് പറഞ്ഞത് വിവരം ലഭിച്ചയുടൻ പൊലീസ് സ്ഥലത്തെത്തി നിയമനടടികൾ ആരംഭിച്ചു എന്നാണ്. അന്വേഷണത്തിൽ ചില പ്രാഥമിക വിവരങ്ങൾ ലഭിച്ചിട്ടുണ്ടെന്നും, എന്നാൽ വിശദമായ അന്വേഷണത്തിനും പോസ്റ്റ്‌മോർട്ടം റിപ്പോർട്ടിനും ശേഷമേ സംഭവത്തിന്റെ കൃത്യമായ സാഹചര്യങ്ങളും കാരണവും വ്യക്തമാകൂ എന്നും അദ്ദേഹം പറഞ്ഞു.