നടന്‍ രവിമോഹനും ഭാര്യ ആരതിയുമായുള്ള വിവാഹമോചന കേസില്‍ 40 ലക്ഷം രൂപ ജീവനാംശം ആവശ്യപ്പെട്ടതില്‍ പ്രതികരണവുമായി അമ്മ സുജാത വിജയകുമാര്‍. രവി മോഹനില്‍നിന്ന് ആരതി പ്രതിമാസം 40 ലക്ഷം രൂപ ജീവനാംശമായി ആവശ്യപ്പെട്ടെന്ന വാര്‍ത്തകള്‍ പ്രചരിക്കാന്‍ തുടങ്ങിയിട്ട് നാളേറെയായി. ഇപ്പോഴിതാ അത്തരം വാര്‍ത്തകളില്‍ പ്രതികരണവുമായി രംഗത്തെത്തിയിരിക്കുകയാണ് ആരതിയുടെ അമ്മയും നിര്‍മ്മാതാവുമായ സുജാത വിജയകുമാര്‍.

ആ തുക ആരതിയുടെ വ്യക്തിപരമായ ആവശ്യങ്ങള്‍ക്കല്ലെന്നും കുടുംബത്തിന്റെ സാമ്പത്തിക ബാദ്ധ്യതകള്‍ നിറവേറ്റുന്നതിനായിരുന്നെന്നും സുജാത പറഞ്ഞു. വാര്‍ത്താസമ്മേളനത്തില്‍ സംസാരിക്കവെയായിരുന്നു സുജാതയുടെ പ്രതികരണം. രവി മോഹന്‍ കുടുംബത്തെ വലിയ കടബാദ്ധ്യതയിലാക്കിയിട്ടാണ് വിട്ടുപോയതെന്നും വീടിന് ബാങ്കില്‍നിന്ന് ജപ്തി നോട്ടീസ് ലഭിച്ചിട്ടുണ്ടെന്നും അവര്‍ ആരോപിച്ചു.

'ആരതി സ്വന്തം ആവശ്യങ്ങള്‍ക്കായി 40 ലക്ഷം രൂപ ജീവനാംശം ആവശ്യപ്പെട്ടിട്ടില്ല. രവി മോഹന്‍ കാരണം ഞങ്ങള്‍ക്ക് വലിയ കടബാദ്ധ്യതയുണ്ട്. വീടിന് ബാങ്കില്‍നിന്ന് ജപ്തി നോട്ടീസ് പോലും വന്നിട്ടുണ്ട്. കുട്ടികളുടെ സ്‌കൂള്‍ ഫീസിനും ഭക്ഷണത്തിനും ട്യൂഷന്‍ ചെലവിനും പോലും പണം കണ്ടെത്താന്‍ ബുദ്ധിമുട്ടുകയാണ്' സുജാത പറഞ്ഞു.

കുട്ടികളുടെ വിദ്യാഭ്യാസച്ചെലവ് വഹിക്കാനും പ്രതിമാസ സാമ്പത്തിക സഹായം നല്‍കാനും കോടതി രവി മോഹനോട് നിര്‍ദേശിച്ചിട്ടുണ്ടെന്നും അവര്‍ വ്യക്തമാക്കി.

'കുട്ടികള്‍ അമേരിക്കന്‍ സ്‌കൂളിലാണ് പഠിക്കുന്നത്. അവരെ അവിടെ ചേര്‍ത്തത് രവിമോഹനാണ്. വര്‍ഷം 86 രൂപയാണ് സ്‌കൂള്‍ ഫീസ്. അത് നല്‍കാന്‍ കോടതി നിര്‍ദേശിച്ചിട്ടുണ്ട്. കൂടാതെ ആര്‍തിക്ക് പ്രതിമാസം മൂന്ന് ലക്ഷം രൂപയും മക്കളായ ആരവ്, അയാന്‍ എന്നിവര്‍ക്ക് ഓരോ ലക്ഷം രൂപവീതം നല്‍കണമെന്നും കോടതി ഉത്തരവിട്ടിട്ടുണ്ട്. കുട്ടികളുടെ പാഠ്യേതര പ്രവര്‍ത്തികളുടെ ചെലവും അദ്ദേഹം വഹിക്കണം' സുജാത പറഞ്ഞു.

കുട്ടികളെ കാണുന്നതില്‍നിന്ന് രവിമോഹനെ തടഞ്ഞെന്ന ആരോപണം സുജാത തള്ളിക്കളഞ്ഞു. മക്കള്‍ക്ക് അച്ഛനുമായുള്ള ബന്ധം നിലനിര്‍ത്തണമെന്ന ആഗ്രഹത്തോടെയാണ് ആരതി കഴിഞ്ഞ വര്‍ഷം കോടതിയെ സമീപിച്ച് സന്ദര്‍ശന ഹര്‍ജി നല്‍കിയതെന്നും അവര്‍ പറഞ്ഞു.

'രവി മോഹന്‍ കുട്ടികളെ കാണരുതെന്ന് ഞങ്ങള്‍ ഒരിക്കലും പറഞ്ഞിട്ടില്ല. കുട്ടികള്‍ക്ക് അച്ഛനുമായി നല്ല ബന്ധം ഉണ്ടാകണമെന്നാണ് ആരതി ആഗ്രഹിച്ചത്. അതിനാലാണ് സന്ദര്‍ശനാവകാശത്തിനായി കോടതിയെ സമീപിച്ചത്. ഇനി നാലുപേരും പതിവായി കൂടിക്കാഴ്ച നടത്തണമെന്ന് കോടതി നിര്‍ദേശിച്ചത് ഞങ്ങള്‍ക്ക് വലിയ ആശ്വാസമാണ്. ഒരമ്മയും കുട്ടികളെ അവരുടെ അച്ഛനില്‍നിന്ന് അകറ്റാന്‍ ആഗ്രഹിക്കില്ല. ഈ മാസംമുതല്‍ കുടുംബത്തിലെ പ്രശ്‌നങ്ങള്‍ക്ക് പരിഹാരം കാണാനാകുമെന്നാണ് പ്രതീക്ഷിക്കുന്നത്. സുജാത കൂട്ടിച്ചേര്‍ത്തു.