ഇടുക്കിയില്‍ രണ്ടിടത്ത് നേരിയ ഭൂചലനം. കെഎസ്‌ഇബിയുടെ സിസ്‌മോഗ്രാമില്‍ 1.2 രേഖപ്പെടുത്തിയ ചലനത്തിന്റെ പ്രഭവകേന്ദ്രം കോട്ടയമാണ്. ശനിയാഴ്ച വൈകിട്ട് 6.45ഓടെയാണ് ഇടുക്കി, ആലടി എന്നിവിടങ്ങളില്‍ നേരിയ ഭൂചലനം രേഖപ്പെടുത്തിയത്.

കോട്ടയം ജില്ലയിലെ പാമ്ബാടിയിലും പരിസരപ്രദേശത്തും ശനിയാഴ്ച വൈകിട്ട് 6.30നു ഭൂചലനം അനുഭവപ്പെട്ടതായി നാട്ടുകാര്‍ പറഞ്ഞു. ഭൂമിക്കടിയില്‍നിന്നു ചെറിയ മുഴക്കം കേട്ടു. തുടര്‍ന്നു 2-3 സെക്കന്‍ഡ് വിറയലും ഉണ്ടായി. പാമ്ബാടി, പങ്ങട, കോത്തല, ളാക്കാട്ടൂര്‍, പൂതക്കുഴി തുടങ്ങിയ പ്രദേശങ്ങളില്‍ കുലുക്കം അനുഭവപ്പെട്ടു. വീടുകളും വീട്ടുപകരണങ്ങളും വിറയ്ക്കുന്നതു കണ്ടെന്നും നാട്ടുകാര്‍ പറയുന്നു.

എന്നാല്‍ ഭൂചലനം സ്ഥിരീകരിക്കാന്‍ കഴിഞ്ഞിട്ടില്ലെന്നു കലക്ടര്‍ എം.അഞ്ജന പറഞ്ഞു. ദുരന്തനിവാരണ അഥോറിറ്റിയുടെ നിരീക്ഷണ ഉപകരണങ്ങളില്‍ ഭൂചലനം രേഖപ്പെടുത്തിയിട്ടില്ല. മറ്റ് ഏജന്‍സികള്‍ക്കും ഭൂചലനം സംബന്ധിച്ച്‌ അറിവില്ലെന്നു കലക്ടര്‍ പറഞ്ഞു.