സംസ്ഥാനത്ത് നാളെയോടെ കാലവർഷം എത്തുമെന്ന് കേന്ദ്ര കാലാവസ്ഥാ നിരീക്ഷണ കേന്ദ്രത്തിൻ്റെ മുന്നറിയിപ്പ്. ശക്തമായ കാറ്റിനും ഇടിമിന്നലോട് കൂടിയ മഴയ്ക്കും സാധ്യതയും പ്രവചിക്കപ്പെട്ടിട്ടുണ്ട്. 5 ജില്ലകളിൽ ഇന്ന് യെല്ലോ അലർട്ട് പ്രഖ്യാപിച്ചു.

സാധാരണ എത്തുന്നതിലും നേരത്തെയാണ് ഈ വര്ഷം കാലവർഷം തുടങ്ങുന്നത് . അറബിക്കടലിൽ ടൗട്ടെ ചുഴലിക്കാറ്റും ബം​ഗാൾ ഉൾക്കടലിൽ യാസ് ചുഴലിക്കാറ്റും രൂപപ്പെട്ടത് മൺസൂൺ നേരത്തെയെത്താൻ കാരണമായെന്നാണ് വിദഗ്ദരുടെ അഭിപ്രായം.

2019 ലേതിനു സമാനമായ മഴയായിരിക്കും ഇത്തവണ ജൂൺ അവസാനവും ജൂലൈയിലുമായി ഉണ്ടാകുക എന്നാണു വിദഗ്ദർ പറയുന്നത്.

50 കിലോമീറ്റർ വേ​ഗതയിൽ കാറ്റും 3.8 മീറ്റർ വരെ ഉയർന്ന തിരമാലയും ഉണ്ടാകാൻ സാധ്യതയുളളതിനാൽ തീരപ്രദേശങ്ങളിൽ ജാഗ്രതാ മുന്നറിയിപ്പ് നൽകിയിട്ടുണ്ട്. ഇന്നും നാളെയും അഞ്ച് ജില്ലകളിലാണ് യെല്ലോ അലർട്ട് പ്രഖ്യാപിച്ചിരിക്കുന്നത്.