ഓഫിസിനുളളിൽ വനിതാ ജീവനക്കാരിക്ക് നേരെ ലൈംഗികാതിക്രമം നടത്തിയ ഉദ്യോഗസ്ഥനെ സർവീസിൽ നിന്ന് സസ്‌പെൻഡ് ചെയ്തു. കരുനാഗപ്പളളി നഗരസഭാ സൂപ്രണ്ട് മനോജ് കുമാറിനെതിരെ വനിതാ ജീവനക്കാരി നൽകിയ പേരാതിയുടെ അടിസ്ഥാനത്തിലാണ് നഗരകാര്യ ഡയറക്ടർ നടപടിയെടുത്തത്. അറസ്റ്റ് തടയാൻ മുൻകൂർ ജാമ്യാപേക്ഷയുമായി കോടതിയെ സമീപിച്ചിരിക്കുകയാണ് മനോജ് കുമാർ.

ഫെബ്രുവരി പന്ത്രണ്ടാം തീയതിയാണ് കരുനാഗപ്പളളി നഗരസഭയിലെ വനിതാ ജീവനക്കാരി, സൂപ്രണ്ട് മനോജ്കുമാറിനെതിരെ നഗരസഭാ സെക്രട്ടറിക്ക് പരാതി നൽകിയത്. നഗരസഭയ്ക്കുളളിൽ വച്ച് സൂപ്രണ്ട് തന്നെ കയറിപ്പിടിച്ചെന്നും വിവസ്ത്രയാക്കാൻ ശ്രമിച്ചെന്നുമുളള ഗുരുതരമായ ആരോപണങ്ങളാണ് ജീവനക്കാരി പരാതിയിൽ ഉന്നയിച്ചിരിക്കുന്നത്. സൂപ്രണ്ട് നിരന്തരം അശ്ലീല പ്രയോഗങ്ങൾ നടത്തുന്നെന്നും പരാതിയിൽ ജീവനക്കാരി ചൂണ്ടിക്കാട്ടിയിരുന്നു.

നഗരസഭ സെക്രട്ടറി പരാതി ജാഗ്രതാ സമിതിക്ക് കൈമാറി. സംഭവത്തിൽ നഗരകാര്യ ഡയറക്ടർ പ്രത്യേക സംഘത്തെ ആഭ്യന്തര അന്വേഷണത്തിനായി നിയോഗിച്ചു. ഈ അന്വേഷണത്തിന്റെ അടിസ്ഥാനത്തിലാണ് മനോജ്കുമാറിനെതിരെ സസ്‌പെൻഷൻ നടപടിക്കുളള തീരുമാനം. ഈ മാസം 21 വരെ മനോജിന്റെ അറസ്റ്റ് തടഞ്ഞു കൊണ്ട് ഹൈക്കോടതി ഉത്തരവിട്ടിരുന്നു. ഇതിനു പിന്നാലെ മുൻകൂർ ജാമ്യം നേടാനുളള ശ്രമത്തിലാണ് മനോജ് കുമാർ