ലക്ഷദ്വീപ് ഭരണകൂടത്തിനെതിരെ പ്രതികരിച്ചതിന്റെ പേരില്‍ സംഘപരിവാര്‍ സംഘടനകളുടെ സൈബര്‍ ആക്രമണത്തിന് വിധേയയാകുകയാണ് ചലച്ചിത്ര പ്രവര്‍ത്തക ആയിഷ സുല്‍ത്താന. ഇവര്‍ക്കെതിരെ രാജ്യദ്രോഹക്കുറ്റം ചുമത്തിയതിനു പിന്നാലെ അവിടെ പ്രശ്‌നങ്ങളുണ്ടാക്കാനെത്തിയ ഭീകരവാദിയാണെന്നും വരുത്തിത്തീര്‍ക്കാനുള്ള ശ്രമമാണ് നടക്കുന്നത്. ഇതിടെ പൊളിച്ചടുക്കയാണ് ആയിഷ.

തന്നെ ബംഗ്ലദേശുകാരിയാക്കാന്‍ ചിലര്‍ കുറെ കഷ്ടപ്പെടുന്നുണ്ടെന്നും ചെത്‌ലാത്ത് ദ്വീപില്‍ ജനിച്ചു വളര്‍ന്ന മാതാപിതാക്കളുടെ മകളാണ് താനെന്നും ആയിഷ സുല്‍ത്താന പറഞ്ഞു. ഉമ്മയുടെ പിതാവ് ചെത്ലാത്ത് ദ്വീപുകാരനാണ്. ഉമ്മയുടെ ഉമ്മ മംഗലാപുരത്ത് കൃഷ്ണപുരം സ്വദേശിനിയായിരുന്നു. ചെത്‌ലാത്ത് ദ്വീപിലാണ് ഉപ്പ കുഞ്ഞിക്കോയയും ഉമ്മ ഹവ്വയും ജനിച്ചു വളര്‍ന്നത്.

ഉപ്പ മിനിക്കോയി ദ്വീപില്‍ സര്‍ക്കാര്‍ ജോലിക്കാരനായിരുന്നതിനാല്‍ മിനിക്കോയിലാണ് ഏഴാം ക്ലാസ് വരെ പഠിച്ചത്. ഹൈസ്‌കൂള്‍ പഠനം ചെത്‌ലാത്തില്‍ തന്നെയായിരുന്നു. പ്ലസ്‌വണ്ണും പ്ലസ്ടുവും പഠിച്ചത് കടമത്ത് ദ്വീപിലായിരുന്നു. പ്ലസ്ടു പഠനം പൂര്‍ത്തിയാക്കിയത് കോഴിക്കോടായിരുന്നു. ബിഎ മലയാളം പഠിക്കാനാണ് തിരുവനന്തപുരം യൂണിവേഴ്‌സിറ്റി കോളജിലെത്തുന്നത്. തുടര്‍ന്നാണ് സിനിമാ രംഗത്തേക്ക് എത്തിയതതെന്നും ആയിഷ പറഞ്ഞു.

ഇന്റര്‍നെറ്റില്‍ ഒന്നിലേറെ വെബ്‌സൈറ്റുകളില്‍ ആയിഷയുടെ വ്യാജ പ്രൊഫൈലുകള്‍ നിര്‍മിച്ചാണ് പ്രചാരണം നടക്കുന്നത്. ബംഗ്ലദേശില്‍ ജനിച്ച് ലഹോറില്‍ പഠനം നടത്തി കേരളത്തില്‍ താമസിച്ച് പ്രശ്‌നങ്ങളുണ്ടാക്കുകയാണ് ഇവര്‍ എന്നാണു പ്രചരണം. നാലു ദിവസം മുമ്പു മാത്രം നിര്‍മിച്ച ഈ പ്രൊഫൈലുകളുടെ സ്‌ക്രീന്‍ ഷോട്ടെടുത്ത് വാട്‌സാപ്പിലൂടെയും മറ്റും വ്യാപകമായി പ്രചരിപ്പിച്ചാണ് ആയിഷ വിരുദ്ധ വികാരം വളര്‍ത്താന്‍ ശ്രമിക്കുന്നത്.

1984ല്‍ ബംഗ്ലദേശിലെ ജെസ്സോറില്‍ ജനിച്ച ആയിഷ 2008ല്‍ ലഹോറിലുള്ള ബീക്കണ്‍ഹൗസ് നാഷനല്‍ യൂണിവേഴ്‌സിറ്റിയില്‍നിന്ന് കലാ പഠനത്തില്‍ പിജി ഡിപ്ലോമ നേടിയെന്നാണ് ഒരു വെബ്‌സൈറ്റിലുള്ളത്. ബയോഗ്രഫി ഡേറ്റ ഡോട്ട് ഓര്‍ഗ് എന്ന വെബ്‌സൈറ്റില്‍ വിശദമായ ബയോഡേറ്റ എന്ന നിലയില്‍ ഇതേ കാര്യങ്ങള്‍തന്നെ ഉള്‍പ്പെടുത്തിയുള്ള വിവരങ്ങളാണ് നല്‍കിയിരിക്കുന്നത്. ജെസ്സോറില്‍ ജനിച്ച ഇവരുടെ മാതൃഭാഷ തുളുവാണെന്നും രേഖപ്പെടുത്തിയിരിക്കുന്നു. അവിടെത്തന്നെ ഹൈസ്‌കൂള്‍ വരെയുള്ള പഠനം പൂര്‍ത്തിയാക്കിയെന്നും ഉന്നത പഠനം ബീക്കണ്‍ യൂണിവേഴ്‌സിറ്റിയിലായിരുന്നെന്നും പറയുന്നു. ഇവരുടെ സമൂഹമാധ്യമ പേജുകളും ചിത്രങ്ങളും ഉള്‍പ്പെടുത്തിയാണ് വ്യാജ പ്രൊഫൈലുകളുടെ നിര്‍മാണം.