നടി പാര്‍വതി തിരുവോത്തിന്റെ രട്ടത്താപ്പ് നയത്തിനെതിരെ വിമര്‍ശനവുമായി അസീബ്എഴുതിയ ഫേസ്ബുക്ക് കുറിപ്പ് വൈറൽ. മുന്‍ ആരോഗ്യ വകുപ്പ് മന്ത്രി കെകെ ശൈലജ ടീച്ചറുടെയും നടി പാര്‍വതിയുടെയും രണ്ടു പരിപാടികളിലെ ഭാഗങ്ങളെ താരതമ്യം ചെയ്തു കൊണ്ട് അസീബ് എഴുതിയ കുറിപ്പില്‍ നടിയുടെ ഐഡിയോളജിക്കല്‍ ഡെപ്ത്തിനെ കണക്കിന് പരിഹസിക്കുകയാണ്.

കുറിപ്പ് പൂര്‍ണ്ണ രൂപം

രണ്ട് രംഗങ്ങളുണ്ട്. ഐഡിയോളജിക്കല്‍ ഡെപ്ത്തെന്താണെന്ന് ചോദിച്ചാല്‍ ചൂണ്ടിക്കാണിക്കാവുന്നത്. മഴവില്‍ മനോരമയുടെ ഒരു പ്രോഗ്രാമില്‍ പാര്‍വ്വതി തിരുവോത്തിനെ ഹോട്ട് സീറ്റിലിരുത്തി റിമി ടോമി 'കണ്ണീര്‍ സീരിയല്‍ കാണുമോ?' എന്ന് ചോദിക്കുന്നുണ്ട്. ഈ ഭൂമുഖത്തൊള്ള സകല പരിഹാസവും മുഖത്ത് കേറ്റി, തീട്ടത്തില്‍ ചവിട്ടിയ പോലെ ചിറി കോട്ടി, കണ്ണീരൊലിപ്പിക്കുന്ന ആക്ഷന്‍ കാണിച്ച്‌ നോ കാര്‍ഡ് പൊക്കുകയും അങ്ങനൊരു 'വല്ല്യ' പൊസിഷന്‍ എടുത്തതിന് ഓഡിയന്‍സിനോട് തനിക്കായി കയ്യടിക്കാനും പാര്‍വ്വതി പറയുന്നത്, ഒന്ന്.

ചാനലിലെ പ്രൈം ടൈം കോവിഡ് ചര്‍ച്ചക്കിടയില്‍ തുന്നല്‍ ടീച്ചറാണെന്ന അധിക്ഷേപത്തിന് ബി ജെ പി നേതാവിനോട്, 'അങ്ങനെയങ്ങ് അണ്ടറെസ്റ്റിമേറ്റ് ചെയ്യാതെ ഗോപാലകൃഷ്ണാ, തുന്നല്‍ ടീച്ചറെന്താ ടീച്ചറല്ലേ' എന്ന് ശൈലജ ടീച്ചര്‍ പറയുന്നത്, രണ്ട്.

സ്വന്തം പ്രൊഫഷന്റെ അതേ ടാഗില്‍ പണിയെടുക്കുന്നവരോട്, അതിനേക്കാള്‍ കുറഞ്ഞ വേതനവും സോഷ്യല്‍ സ്റ്റാറ്റസുമുള്ളവരോട്, ആ ഇന്‍ഡസ്ട്രിയോട്, അപ്പര്‍ക്ലാസിന്റെ, അവര്‍ സെറ്റ് ചെയ്യുന്ന സിനിമാ-വെസ്റ്റേണ്‍ സീരീസ് എന്റര്‍ടൈന്മെന്റ് വാല്യു ഇല്ലാത്ത ഒരു പ്രോഡ്കടിന്റെ ഓഡിയന്‍സായ വീട്ടിലിരിക്കുന്ന പെണ്ണുങ്ങളോട്, അങ്ങനെയാ സീരിയല്‍ കാണാന്‍ ഇതേ പാര്‍വ്വതി വിമര്‍ശിക്കുന്ന പാട്രിയാര്‍ക്കി വിധിച്ചവരോട്, ആണുങ്ങളുടേത് പോലൊരു സ്വതന്ത്ര ലോകത്തേക്കോ, കെട്ടിന് മുന്നോ ശേഷമോ സ്വന്തം ഇഷ്ടത്തിന് കൊട്ടകയിലേക്കോ പോകാന്‍ കഴിയാത്തവരുടെ, പകല്‍ മുഴുവനുള്ള പട്ടിപ്പണിക്ക് ശേഷമുള്ള ഒരുമണിക്കൂര്‍ ഒന്ന് ഊരകുത്തുന്നതിനോടുള്ള 'അയ്യേ' പുച്ഛമാണ് ഒന്നാമത്തെ സ്പെസിമെന്‍.

ന്യൂസ് ഡിബേറ്റിലിരിക്കുമ്ബോ, തന്നെ പ്രതിസന്ധിയിലാക്കാന്‍, കഴിവില്ലാത്തവളെന്ന് ചാപ്പകുത്താന്‍ ഉപയോഗിച്ചയാ ടാഗിനെ തള്ളാതെ, താന്‍ ഫിസിക്സ് ടീച്ചറാണെന്ന് പറയാതെ, അവരുടെ അഭിമാനം ഉയര്‍ത്തിപ്പിടിച്ച്‌, വൈകാരികാവസ്ഥയിലും, രണ്ടാമതൊന്നാലോചിക്കാതെ പ്രതികരിക്കുന്ന ക്ലാരിറ്റിയാണ് രണ്ടാമത്തെ സ്പെസിമെന്‍.

ഒന്നാമത്തെ സ്പെസിമെനെ ആഘോഷിക്കുന്ന ഇന്‍സ്റ്റഗ്രാം ആക്ടിവിസ്റ്റുകളും ആ സ്പെസിമെന്‍ തന്നെയും ശൈലജ ടീച്ചര്‍ക്കിടുന്ന ടാഗ് 'ചങ്ങലക്കിട്ടവള്‍' എന്നാണ്. കറക്കിക്കുത്ത് പോലെ നിലപാടിനേക്കാല്‍ കൂടുതല്‍ തവണ വെളിവുകേട് കൊണ്ട് ഞെട്ടിക്കുന്ന ആദ്യ സ്പെസിമെനില്‍ പെട്ടവര്‍ക്കില്ലാത്തതും രണ്ടാമത്തെ സ്പെസിമെനില്‍പെട്ടവര്‍ക്ക് അത്യാവശ്യമുള്ളതുമായ ആ സാധനമാണ് ഐഡിയോളജിക്കല്‍ ഡെപ്ത്‌. അതിനെയുണ്ടാക്കിയെടുക്കുന്ന ബേസിക്സാണ് ക്ലാസ്‌ കോണ്‍ഷ്യസ്നെസ്, ഡയലക്ടിക്സ്, ചരിത്രബോധം എന്നിവ.

രണ്ടാമത്തെ കൂട്ടര്‍ സംഘടിത രാഷ്ട്രീയത്തില്‍ വിശ്വസിച്ച്‌ അവര്‍ക്കൊപ്പം ചേര്‍ന്ന് നില്‍ക്കുന്നത് ഈ പറഞ്ഞതുള്ളില്‍ പേറുന്നതുകൊണ്ടാണ്. മറ്റവരിങ്ങനെ ഒറ്റയാള്‍പ്പട്ടാളമായി നിന്നിട്ടും തെന്നി വീഴുന്നത് അതൊന്നും തൊലിയില്‍ പോലും തൊടാത്തകൊണ്ടും.