കേരളസര്‍വകലാശാല മലയാളവിഭാഗം മുന്‍വകുപ്പ് മേധാവിയും സാഹിത്യനിരൂപകനുമായ പ്രൊഫ. (ഡോ.) ജി. പദ്മറാവു(62) അന്തരിച്ചു. 2020 ജൂണ്‍ 9ന് കാര്യവട്ടം ക്യാമ്ബസ്സില്‍ നിന്ന് സഹപ്രവര്‍ത്തകന്റെ ഒപ്പം തിരുവവനന്തപുരത്തേയ്ക്ക് ബൈക്കില്‍ യാത്രചെയ്യവേ പങ്ങപ്പാറയില്‍ വച്ച്‌, റോഡിലേയ്ക്ക് വളര്‍ന്നു നിന്ന മരക്കൊമ്ബ് ഒടിഞ്ഞു വീണുണ്ടായ അപകടത്തെത്തുടര്‍ന്ന് അബോധാവസ്ഥയില്‍ ചികിത്സയില്‍ ആയിരുന്നു.

വിവിധ എസ്. എന്‍. കോളേജുകള്‍, ശ്രീശങ്കരാചാര്യ സംസ്‌കൃത സര്‍വകലാശാല എന്നിവിടങ്ങളിലും അദ്ധ്യാപകനായി സേവനം അനുഷ്ഠിച്ചിട്ടുണ്ട്. കേരളസര്‍വകലാശാലയില്‍ ഫാക്കറ്റി ഓഫ് ഓറിയന്റല്‍ സ്റ്റഡീസ് ഡീന്‍, ലെക്സിക്കന്‍ ചീഫ് എഡിറ്റര്‍, യു. ജി. സി. ഹ്യൂമന്‍ റിസോഴ്സ് സെന്റര്‍ ഡയറക്ടര്‍, അന്തര്‍ദേശീയ ശ്രീനാരായണപഠനഗവേഷണകേന്ദ്രം ഡയറക്ടര്‍ എന്നീ സ്ഥാനങ്ങള്‍ വഹിച്ചു. മഹാത്മാഗാന്ധിസര്‍വകലാശാല, ഗാന്ധിഗ്രാം റൂറല്‍ യൂണിവേഴ്സിറ്റി എന്നിവിടങ്ങളില്‍ ബോര്‍ഡ്‌ ഓഫ് സ്റ്റഡീസ് അംഗം ആയിരുന്നു.

താരതമ്യസാഹിത്യപഠന മേഖലയില്‍ മലയാളത്തില്‍ ഉണ്ടായ ആദ്യപുസ്‌തകം പി. ഒ. പുരുഷോത്തമനുമായി ചേര്‍ന്ന് 1985 ല്‍ പ്രസിദ്ധീകരിച്ചു. 75 ലേറെ ലേഖനങ്ങളും ഗവേഷണപ്രബന്ധങ്ങളും എഴുതിയിട്ടുണ്ട്. മാധ്യമമലയാളത്തെപ്പറ്റി മൂന്നുവര്‍ഷത്തോളം ഭാഷാപോഷിണി മാസികയില്‍ പംക്തി കൈകാര്യം ചെയ്തു. 2016 ലെ സി. എല്‍. ആന്റണി പുരസ്‌കാരം ലഭിച്ചു.

1959 ല്‍ കൊല്ലം ജില്ലയിലെ മണ്‍ട്രോത്തുരുത്തില്‍ ജനനം. അച്ഛന്‍ കെ. ഗംഗാധരന്‍ . അമ്മ എന്‍. പ്രിയംവദ. സംസ്‌കൃതസര്‍വകലാശാല പന്മന കേന്ദ്രം ഡയറക്ടര്‍ ഡോ. എ. ഷീലാകുമാരി ആണ് ഭാര്യ. അഗ്നിവേശ് റാവു (ടാറ്റ സ്റ്റീല്‍സ് , ചെന്നൈ ), ആഗ്നേയ് റാവു (ക്യാനറ ബാങ്ക്, മൈനാഗപ്പള്ളി )എന്നിവര്‍ മക്കള്‍. മരുമകള്‍ സ്നിഗ്ദ്ധ.സംസ്കാരം ബുധനാഴ്ച രാവിലെ 11.30 നു പേഴുംതുരുത്ത് കുടുംബവീട്ടു വളപ്പില്‍.