ലക്ഷദ്വീപ് പ്രശ്‌നം കുറച്ച് തണുത്തെങ്കിലും ഐഷ സുല്‍ത്താനയാണ് ഇപ്പോഴത്തെ സംസാര വിഷയം. രാജ്യദ്രോഹകുറ്റം ചുമത്തപ്പെട്ടതിനു പിന്നാലെ ഐഷ സുല്‍ത്താന ജനിച്ചത് ബംഗ്‌ളാദേശിലാണെന്നും പഠിച്ചത് ലഹോറിലാണെന്നുമുള്ള തരത്തില്‍ സാമൂഹിക മാദ്ധ്യമങ്ങളില്‍ വന്‍ രീതിയില്‍ പ്രചരണം നടക്കുന്നുണ്ട്. എന്നാല്‍ ഇതിനെതിരെ ശക്തമായ പ്രതികരണവുമായി മുന്നോട്ട് വന്നിരിക്കുകയാണ് ചലച്ചിത്രപ്രവര്‍ത്തക കൂടിയായ ഐഷ.

തന്റെ മാതാപിതാക്കള്‍ ലക്ഷദ്വീപിലെ ചെത്‌ലാത്ത് ദ്വീപ് സ്വദേശികളാണെന്നും താന്‍ ജനിച്ചു വളര്‍ന്നത് അവിടെ തന്നെയെന്നും ഐഷ പറഞ്ഞു. ഒരു സ്വകാര്യ വാര്‍ത്താ ചാനലിനു നല്‍കിയ അഭിമുഖത്തിലാണ് അയിഷ ഇത് പറഞ്ഞത്.

താന്‍ ഏഴാം ക്ലാസ് വരെ പഠിച്ചത് ലക്ഷദ്വീപിലെ തന്നെ മറ്റൊരു ദ്വീപായ മിനിക്കോയിയിലും ഹൈസ്‌കൂള്‍ പഠനം നടത്തിയത് ചെത്‌ലാത്തിലും ആയിരുന്നു. പ്‌ളസ് ടു പഠനത്തിനു വേണ്ടിയാണ് കേരളത്തില്‍ വരുന്നത്. കോഴിക്കോടാണ് പ്‌ളസ് ടു പഠിച്ചത്. തുടര്‍ന്ന് യൂണിവേഴ്‌സിറ്റി കോളേജില്‍ നിന്ന് ബിഎ മലയാളത്തില്‍ ബിരുദവും എടുത്തു എന്ന് അയിഷ പറയുന്നു. യൂണിവേഴ്‌സിറ്റി കോളേജിലെ പഠനത്തിനു ശേഷമാണ് ഐഷ സിനിമാ രംഗത്തേക്കു കടന്നു വരുന്നത്.

ഇന്റര്‍നെറ്റില്‍ ഐഷയുടെ ഒന്നിലേറെ വ്യാജപ്രൊഫൈലുകള്‍ ഇതിനോടകം നിര്‍മ്മിച്ചിട്ടുണ്ട്. ഇതിലെല്ലാം പറയുന്നത് 1984ല്‍ ബംഗ്ലാദേശിലെ ജസ്ലോറില്‍ ജനിച്ച അയിഷ 2008ല്‍ ലഹോറിലെ ബീക്കണ്‍ഹൗസ് സര്‍വകലാശാലയില്‍ നിന്ന് ബിരുദം നേടി എന്നാണ്. ഈ വ്യാജ പ്രൊഫൈലുകളെ കൂട്ടുപിടിച്ചാണ് ഐഷയ്ക്ക് എതിരെ വ്യാജ പ്രചാരണങ്ങള്‍ നടത്തുന്നത്.

അതേസമയം രാജ്യദ്രോഹകുറ്റം ചുമത്തിയ കേസില്‍ ഐഷ സുല്‍ത്താന സമര്‍പ്പിച്ച മുന്‍കൂര്‍ ജാമ്യാപേക്ഷയില്‍ ഹൈക്കോടതി കേന്ദ്ര സര്‍ക്കാരിനോടും ലക്ഷദ്വീപ് ഭരണകൂടത്തോടും വിശദീകരണം തേടി. 20ാം തീയതി ലക്ഷദ്വീപ് പോലീസ് വിളിപ്പിച്ച സാഹചര്യത്തില്‍ വ്യാഴാഴ്ച കേസ് പരിഗണിക്കണമെന്ന ഐഷ സുല്‍ത്താനയുടെ ആവശ്യവും കോടതി അംഗീകരിച്ചു.

ബയോവെപ്പണ്‍ പരാമര്‍ശം സംബന്ധിച്ച പരാതിയില്‍ ലക്ഷദ്വീപിലെ കവരത്തി പോലീസ് രാജ്യദ്രോഹകുറ്റം ചുമത്തി കേസെടുത്തതിന് എതിരെയാണ് സംവിധായിക ഐഷ സുല്‍ത്താന മുതിര്‍ന്ന അഭിഭാഷക പി വിജയഭാനു മുഖേന ഹൈക്കോടതിയില്‍ മുന്‍കൂര്‍ ജാമ്യാപേക്ഷ നല്‍കിയത്. കേസ് പരിഗണിച്ച കോടതി വിഷയത്തില്‍ കേന്ദ്രസര്‍ക്കാരിന്റെയും ലക്ഷദ്വീപ് ഭരണകൂടത്തിന്റെയും നിലപാട് തേടി.

കേസില്‍ ഞായറാഴ്ച ഹാജരാകാനാണ് പോലീസ് ആവശ്യപ്പെട്ടതെന്ന് ഐഷ സുല്‍ത്താന പറഞ്ഞു. അടിയന്തര സാഹചര്യം പരിഗണിച്ച് കേസ് വ്യാഴാഴ്ച പരിഗണിക്കണമെന്നും അഭിഭാഷകന്‍ ആവശ്യപ്പെട്ടു. കേസില്‍ രേഖാമൂലം അടുത്ത ദിവസം തന്നെ മറുപടി നല്‍കാമെന്ന് കേന്ദ്രവും ലക്ഷദ്വീപ് അഡ്മിനിട്രേഷനും അറിയിച്ചതോടെ ഐഷയുടെ ആവശ്യം കൂടി പരിഗണിച്ച് വ്യാഴാഴ്ചത്തേക്ക് കേസ് മാറ്റി.

അഡ്മിനിട്രേറ്ററുടെ വിവാദ നടപടികളെ വിമര്‍ശിക്കുക മാത്രമാണ് ചെയ്തത്. ഇത് എങ്ങനെയാണ് കുറ്റകരമാവുക. പോലീസ് കേസ് സുപ്രീം കോടതിയുടെ മുന്‍ ഉത്തരവ് പ്രകാരം കോടതിയലക്ഷ്യമാണ് എന്നിവയാണ് വിഷയത്തില്‍ ഐഷ സുല്‍ത്താനയുടെ നിലപാട്.

കേന്ദ്രസര്‍ക്കാരിന്റെ നിലപാടും മറ്റും കേട്ട ശേഷം ഹൈക്കോടതി കേസിലെടുക്കുന്ന നിലപാടും മറ്റും സുപ്രധാനമാകും. കേസില്‍ കക്ഷിചേരണമെന്നാവശ്യപ്പെട്ട് ഹിന്ദുസംഘടനാ നേതാവ് പ്രതീഷ് വിശ്വനാഥന്‍ ഹൈക്കോടതിയിലെത്തി. ഇക്കാര്യത്തിലും കോടതി വ്യാഴാഴ്ച തീരുമാനം എടുക്കും.

അതിനിടെ അഡ്മിനിസ്‌ട്രേറ്റര്‍ക്കെതിരെയുള്ള പ്രതിക്ഷേധവുമായി ബന്ധപ്പെട്ട് സേവ് ലക്ഷദ്വീപ് ഫോറം യോഗം ചേര്‍ന്നു. ഫോറത്തില്‍ നിന്ന് ബിജെപിയെ ഒഴിവാക്കാന്‍ തീരുമാനിച്ചു. ഐഷ സുല്‍ത്താനയ്‌ക്കെതിരെ നിലപാട് സ്വീകരിക്കുന്നതില്‍ പ്രതിഷേധിച്ചാണ് നടപടി. സമരം കൂടുതല്‍ ശക്തമാക്കുമെന്നും ഐഷ സുല്‍ത്താനയ്ക്ക് പൂര്‍ണ പിന്തുണ നല്‍കുമെന്നും സേവ് ലക്ഷദ്വീപ് ഫോറം വ്യക്തമാക്കി.