എന്ന് പെട്രോള്‍ വില 100 രൂപയാകുമെന്ന് നമ്മള്‍ പരസ്പരം ചോദിച്ചതാണ്. ആ കാലം ഇതാ എത്തിക്കഴിഞ്ഞു. സംസ്ഥാനത്ത് ഇന്ധനവില വീണ്ടും കൂട്ടി.

ഒരു ലീറ്റര്‍ പെട്രോളിന് 25 പൈസയും ഡീസലിന് 14 പൈസയുമാണ് വര്‍ധിപ്പിച്ചത്. തിരുവനന്തപുരത്ത് ഒരു ലീറ്റര്‍ പെട്രോളിന് 98.70 രൂപയും ഡീസലിന് 93.93 രൂപയായി. കൊച്ചിയില്‍ പെട്രോളിന് 96.76 രൂപയും ഡീസലിന് 92.11 രൂപയുമായി.

ഇന്ധനവില കുതിച്ചുയരുന്നതിനെക്കുറിച്ച് കേന്ദ്രസര്‍ക്കാരിനു ബോധ്യമുണ്ടെന്നും എന്നാല്‍ നിലവിലെ സാഹചര്യങ്ങളില്‍ എക്‌സൈസ് തീരുവ കുറയ്ക്കാനാവില്ലെന്നും പെട്രോളിയം മന്ത്രി ധര്‍മേന്ദ്ര പ്രധാന്‍ കഴിഞ്ഞ ദിവസം വ്യക്തമാക്കിയിരുന്നു. കോവിഡ് കാലത്ത് അനേകം ക്ഷേമ പ്രവര്‍ത്തനങ്ങള്‍ക്കായി കേന്ദ്രസര്‍ക്കാരും സംസ്ഥാന സര്‍ക്കാരുകളും പണം ചെലവിടുന്നുണ്ട്. അതിനാല്‍ നികുതികള്‍ കുറയ്ക്കുന്നത് പ്രായോഗികമല്ലെന്നു മന്ത്രി പറഞ്ഞു.

കോവിഡ് ലോക്ഡൗണിലും ജനത്തിന്റെ നടുവൊടിച്ചു തുടരുന്ന ഇന്ധന വിലര്‍ധനയെ ന്യായീകരിക്കുകയായിരുന്നു മന്ത്രി. പെട്രോളിന്റെയും ഡീസലിന്റെയും വില വര്‍ധിക്കുന്നതു പ്രശ്‌നമാണെന്ന് അറിയാമെന്നും എന്നാല്‍ ക്ഷേമപദ്ധതികള്‍ക്കായി സര്‍ക്കാരിനു പണം വേണമെന്നും മന്ത്രി അഭിപ്രായപ്പെട്ടു. ഇന്ത്യയിലെ പല നഗരങ്ങളിലും പെട്രോള്‍ ലീറ്ററിനു 100 രൂപ പിന്നിട്ട പശ്ചാത്തലത്തിലാണു മന്ത്രിയുടെ പ്രതികരണം.

നിലവിലെ ഇന്ധനവില ആളുകള്‍ക്കു വലിയ പ്രശ്‌നമാണെന്നു അംഗീകരിക്കുന്നു. ഒരു വര്‍ഷത്തില്‍ 35,000 കോടിയിലധികം രൂപ കോവിഡ് വാക്‌സീനുകള്‍ക്കായി ചെലവഴിക്കണം. ഇത്തരം ദുഷ്‌കരമായ സമയങ്ങളില്‍, ക്ഷേമപദ്ധതികള്‍ക്കായാണു പണം മിച്ചം പിടിക്കുന്നത്. പാവപ്പെട്ടവര്‍ക്ക് എട്ട് മാസത്തേക്ക് സൗജന്യ ഭക്ഷ്യധാന്യം നല്‍കാന്‍ പ്രധാനമന്ത്രി നരേന്ദ്ര മോദി ഒരു ലക്ഷം കോടി രൂപയുടെ പദ്ധതിക്ക് അനുമതി നല്‍കിയെന്നും മന്ത്രി പറഞ്ഞു.

അദ്ദേസമയം ഇന്ധനവില വര്‍ധനവില്‍ വലിയ പ്രതിഷേധമാണ് ഉയരുന്നത്. പെട്രോള്‍, ഡീസല്‍ വില ജിഎസ്ടിയില്‍ ഉള്‍പ്പെടുത്തണമെന്ന് കെപിസിസി വൈസ് പ്രസിഡന്റ് ശൂരനാട് രാജശേഖരന്‍. ഇന്ധന വിലവര്‍ധനയിലൂടെ കേന്ദ്രത്തിലേയും കേരളത്തിലേയും സര്‍ക്കാരുകള്‍ തങ്ങളുടെ പ്രജകളുടെ പോക്കറ്റടിക്കുകയാണന്നും ക്രിക്കറ്റ് പ്രേമികള്‍ക്ക് സെഞ്ച്വറി കാണാന്‍ തൊട്ടടുത്തുള്ള പെട്രോള്‍ പമ്പിലെത്തിയാല്‍ മതിയെന്നും അദ്ദേഹം പറഞ്ഞു.

2021 ലെ നിയമസഭ തിരഞ്ഞെടുപ്പിന് ശേഷം 24 തവണയാണ് പെട്രോളിനും ഡീസലിനും വില കൂട്ടുന്നത്. പെട്രോളിന്റെയും ഡീസലിന്റെയും അടിസ്ഥാന വില യഥാക്രമം 34.19 രൂപയും 36.32 രൂപയുമാണ്. എന്നാല്‍ ഒരു ലീറ്റര്‍ പെട്രോളിന് കേന്ദ്ര സര്‍ക്കാര്‍ 32.90 രൂപയും ഡീസലിന് 31.80 രൂപയും ആണ് എക്‌സൈസ് നികുതി ആയി ജനങ്ങളുടെ പോക്കറ്റില്‍ നിന്ന് അടിച്ചു മാറ്റുന്നത്. പെട്രോളിന്റെ സംസ്ഥാന നികുതി 30.08 ശതമാനവും ഡീസലിന് 22.76 ശതമാനവും ആണ്.

ദിനം പ്രതിയുള്ള വിലവര്‍ധനവിനെ തുടര്‍ന്ന് കോടി കണക്കിന് രൂപയുടെ അധിക നികുതിയാണ് സംസ്ഥാന സര്‍ക്കാരിന് ലഭിക്കുന്നത്. മുന്‍ യുഡിഎഫ് സര്‍ക്കാര്‍ 8 തവണയാണ് അധികനികുതി വേണ്ടന്ന് വച്ചത്. എന്നാല്‍ എല്‍ഡിഎഫ് സര്‍ക്കാര്‍ അധിക നികുതി ഉപേക്ഷിക്കാന്‍ തയാറാകാതെ ജനങ്ങളില്‍ അധികഭാരം അടിച്ചേല്‍പിക്കുന്ന നടപടി തുടരുന്നു.

രാജ്യാന്തര വിപണിയില്‍ ക്രൂഡ് ഓയിലിന്റെ വില അനുദിനം കുറയുമ്പോഴും ഇന്ധന വില കുറയ്ക്കാന്‍ ഒരു നടപടിയും ഉണ്ടാകുന്നില്ല. പെട്രോള്‍, ഡീസല്‍ വില ജിഎസ്ടിയില്‍ ഉള്‍പ്പെടുത്താന്‍ കേന്ദ്ര സര്‍ക്കാര്‍ തയാറാകണം. സംസ്ഥാന സര്‍ക്കാര്‍ ജിഎസ്ടി കൗണ്‍സിലില്‍ ഇതാവശ്യപ്പെട്ടണം. ജിഎസ്ടിയില്‍ പെട്രോള്‍, ഡീസല്‍ ഉള്‍പ്പെടുത്തിയാല്‍ പരമാവധി നികുതി 28 ശതമാനം മാത്രമേ ഈടാക്കാന്‍ സാധിക്കൂ. കേന്ദ്രത്തിന് 14 ശതമാനവും സംസ്ഥാനത്തിന് 14 ശതമാനവും.

പെട്രോള്‍, ഡീസല്‍ വില ജിഎസ്ടിയില്‍ ഉള്‍പെടുത്തിയാല്‍ വില കയറ്റത്തില്‍നിന്നും കോവിഡ് മഹാമാരിയെ തുടര്‍ന്നുള്ള പ്രതിസന്ധിയില്‍നിന്നും കരകയറാന്‍ ശ്രമിക്കുന്ന ജനങ്ങള്‍ക്ക് വലിയ സഹായകമാകുമെന്നും അദ്ദേഹം പറഞ്ഞു.