ആശുപത്രിയില്‍ ചികിത്സയില്‍ കഴിയുന്ന മൂന്നുവയസ്സുകാരിക്ക് ധനസഹായത്തിന് സമൂഹ മാധ്യമങ്ങളില്‍ പങ്കുവെച്ച പോസ്റ്റിലെ അക്കൗണ്ട് നമ്ബര്‍ തിരുത്തി ചാരിറ്റി തട്ടിപ്പ് നടത്തിയ കേസില്‍ അമ്മയും മകളും അറസ്റ്റില്‍. എരൂരിലെ ഫ്‌ലാറ്റില്‍ വാടകക്ക് താമസിക്കുന്ന പാലാ ഓലിക്കല്‍ വീട്ടില്‍ മറിയാമ്മ സെബാസ്റ്റിയന്‍ (59), അനിത ടി. ജോസഫ്(29) എന്നിവരാണ് അറസ്റ്റിലായത്. കേസില്‍ പ്രധാന പ്രതി ട്രാവല്‍ ഏജന്‍സിയില്‍ ജോലി ചെയ്യുന്ന ഇവരുടെ മകന്‍ അരുണിനെ പൊലീസ് തിരയുന്നുണ്ട്.

രായമംഗലം സ്വദേശിയായ പ്രവീണ്‍ മന്മഥന്‍ എന്നയാളുടെ മകളുടെ ചികിത്സക്ക് ചാരിറ്റി പ്രവര്‍ത്തകനായ ഫറൂക്ക് ചെര്‍പ്പുളശ്ശേരി സമൂഹ മാധ്യമങ്ങളില്‍ പങ്കുവെച്ച പോസ്റ്റാണ് ഇവര്‍ തിരുത്തി സ്വന്തം അക്കൗണ്ട് നമ്ബറും ഗൂഗ്ള്‍ പേ നമ്ബറും മൊബൈല്‍ നമ്ബറും ഉപയോഗിച്ച് ധനസമാഹരണം നടത്തിയത്. ഫേസ്ബുക്കില്‍ ഈ പോസ്റ്റ് കണ്ട് സംശയം തോന്നിയ ഡോക്ടര്‍ ഇക്കാര്യം പ്രവീണിെന്റ ശ്രദ്ധയില്‍പെടുത്തിയതോടെ ചേരാനല്ലൂര്‍ പൊലീസില്‍ പരാതി നല്‍കുകയായിരുന്നു.

അന്വേഷണത്തില്‍ ഈ അക്കൗണ്ടില്‍ വന്ന ഒരുലക്ഷം രൂപ പ്രതികള്‍ പിന്‍വലിച്ചതായി കണ്ടെത്തി. സാമൂഹ മാധ്യമങ്ങളിലെ പോസ്റ്റിലൂടെ വന്‍ തുകയാണ് മറിയാമ്മയുടെ അക്കൗണ്ടില്‍ എത്തിയത്. ഇത് അനിതയുടെ അക്കൗണ്ടിലേക്ക് മാറ്റിയതായും കണ്ടെത്തിയിട്ടുണ്ട്. പ്രതികളുടെ ബാങ്ക് അക്കൗണ്ടുകള്‍ മരവിപ്പിച്ചു. അടുത്തിടെ നടന്ന പണമിടപാട് വിവരങ്ങള്‍ ബാങ്കുകളോട് ആവശ്യപ്പെട്ടിട്ടുണ്ട്. കുട്ടിയുടെ ചിത്രത്തോടൊപ്പം ചേര്‍ത്തിരുന്ന അക്കൗണ്ട്, ഗൂഗിള്‍ പേ നമ്ബറുകളില്‍ സംശയം തോന്നിയ ഡോക്ടര്‍ ശ്രദ്ധയില്‍പെടുത്തിയതോടെയാണ് തട്ടിപ്പ് പുറത്തായത്.

മറിയാമ്മ പാലാ കിഴതടിയൂര്‍ സഹകരണ ബാങ്കില്‍ 50 ലക്ഷം രൂപ തിരിമറി നടത്തിയ കേസിലെ പ്രതിയാണ്. പൊലീസ് തിരയുന്ന മകന്‍ അരുണ്‍ വ്യാജനോട്ട് കേസിലെ പ്രതിയാണ്. 2018ലാണ് ഈ കേസ്. പാലായില്‍ സിവില്‍ സ്‌റ്റേഷനുസമീപം ഫോട്ടോസ്റ്റാറ്റ് സ്ഥാപനം നടത്തുകയായിരുന്ന അരുണ്‍ 2000 രൂപയുടെ കളര്‍ പകര്‍പ്പുകള്‍ എറണാകുളത്തെയടക്കം സി.ഡി.എം.എ മെഷീനുകളില്‍ നിക്ഷേപിച്ച് പണം പിന്‍വലിച്ചിരുന്നു. വ്യാജ നോട്ട് തിരിച്ചറിയുകയും അന്വേഷണത്തില്‍ അരുണ്‍ പിടിയിലാകുകയും ചെയ്തു. അന്ന് കിഴതടിയൂര്‍ സഹകരണ ബാങ്കിലെ കാഷ്യറായ മറിയാമ്മ വരാതിരുന്നതോടെ സംശയം തോന്നിയ അധികൃതര്‍ ലോക്കര്‍ തുറന്ന് പരിശോധിച്ചപ്പോഴാണ് 50 ലക്ഷം രൂപയുടെ തിരിമറി കണ്ടെത്തിയത്.