മുഖ്യമന്ത്രിയുടെ ഓഫീസര്‍ ഓണ്‍ സ്‌പെഷ്യല്‍ ഡ്യൂട്ടി മോഹന്റെ ഭാര്യ പൂര്‍ണിമാ മോഹനെ സര്‍വകലാശാലയുടെ മലയാളം മഹാ നിഘണ്ടുവിന്റെ ചുമതലയില്‍ നിന്നും ഒഴിവാക്കാന്‍ സാധ്യത. മുഖ്യമന്ത്രിയുടെ ഡല്‍ഹി തിരക്കുകള്‍ അവസാനിച്ചാലുടന്‍ ഇക്കാര്യത്തില്‍ തീരുമാനമുണ്ടാകുമെന്നാണ് അറിയുന്നത്.

മലയാളം മഹാ നിഘണ്ടു എഡിറ്ററായി സര്‍വ്വകലാശാല ഓര്‍ഡിനന്‍സ് മറികടന്ന് പൂര്‍ണ്ണിമ മോഹനനെ നിയമിച്ച കാര്യം തനിക്കറിയില്ലെന്ന് ഉന്നത വിദ്യാഭ്യാസ മന്ത്രി പ്രൊഫസര്‍ ആര്‍. ബിന്ദു പ്രതികരിച്ചെങ്കിലും മുഖ്യമന്ത്രിക്ക് ഈ നിയമനത്തോട് യോജിപ്പില്ലെന്നാണ് റിപ്പോര്‍ട്ട് . പൂര്‍ണ്ണിമാ മോഹന് യോഗ്യതയുണ്ടെന്നാണ് തനിക്ക് ലഭിച്ച വിവരമെന്ന് മന്ത്രി ബിന്ദു പറഞ്ഞു. പൂര്‍ണിമയുടേത് സ്ഥിരം നിയമനമല്ലെന്നുമാണ് മന്ത്രിയുടെ ന്യായീകരണം.

എന്നാല്‍ മന്ത്രിയുടെ അറിവോടെയാണ് നിയമനം നടന്നതെന്നാണ് ലഭിക്കുന്ന സൂചനകള്‍. സര്‍വകലാശാലകള്‍ക്ക് സ്വയം ഭരണാവകാശമുണ്ടെങ്കിലും ഉന്നത വിദ്യാഭ്യാസ മന്ത്രിക്ക് സര്‍വകലാശാലയുടെ കാര്യത്തില്‍ നിര്‍ണായക സ്വാധീനമുണ്ട്. മന്ത്രി അറിയാതെ സര്‍വകലാശാലയില്‍ ഒന്നും നടക്കില്ല. പ്രത്യേകിച്ച് മുഖ്യന്ത്രിയുടെ പ്രൈവറ്റ് സെക്രട്ടറിയുടെ ഭാര്യക്ക് നിയമനം നല്‍കുന്ന കാര്യത്തില്‍.

തെരഞ്ഞെടുത്തിട്ടുള്ള കാന്‍ഡിഡേറ്റിന്റെ അപേക്ഷ മാത്രമാണ് ഈ പോസ്റ്റിലേക്ക് ലഭിച്ചത്. അവര്‍ ബഹുഭാഷാ പണ്ഡിതയാണ്. ഒരുപാട് എഴുതുകയും വിവര്‍ത്തനങ്ങള്‍ ചെയ്യുകയും ചെയ്ത ആളാണ്. നാല് ഭാഷകള്‍ അവര്‍ സംസാരിക്കും. ഡെപ്യൂട്ടേഷനില്‍ താത്കാലികമായിട്ടാണ് അവരുടെ നിയമനം. ക്വാളിഫിക്കേഷന്‍ ഇല്ലാത്ത ആളല്ല കൂടുതല്‍ യോഗ്യതകളുള്ള ആളാണ് പൂര്‍ണിമ - മന്ത്രി പറഞ്ഞു.

മുഖ്യമന്ത്രിയുടെ മുന്‍ പ്രൈവറ്റ് സെക്രട്ടറിയും നിലവില്‍ ഓഫീസര്‍ ഓണ്‍ സ്‌പെഷ്യല്‍ ഡ്യൂട്ടിയുമായ ആര്‍ മോഹനന്റെ ഭാര്യ ഡോ.പൂര്‍ണ്ണിമാ മോഹനന്റെ നിയമനമാണ് വിവാദത്തിലാകുമ്പോള്‍ അത് മുഖ്യമന്ത്രിയുടെ ഓഫീസിനെയാണ് നേരിട്ട് ബാധിക്കുന്നത്. കാലടി സര്‍വ്വകലാശാലയിലെ സംസ്‌കൃത വിഭാഗം അധ്യാപികയായ പൂര്‍ണ്ണിമാ മോഹനനെ മലയാള മഹാ നിഘണ്ടു വകുപ്പ് മേധാവിയാക്കിയത് ചട്ടം ലംഘിച്ചെന്നാണ് ആക്ഷേപം.

സര്‍വ്വകലാശാല ഓര്‍ഡിനന്‍സ് പ്രകാരം മലയാളം ലെക്‌സിക്കന്‍ എഡിറ്റര്‍ തസ്തികക്ക് വേണ്ട അടിസ്ഥാന യോഗ്യത മലയാള ഭാഷയില്‍ ഒന്നാം ക്ലാസിലോ രണ്ടാം ക്‌ളാസിലോ ഉള്ള ബിരുദമാണ്. പൂര്‍ണ്ണിമാ മോഹനകാട്ടെ സംസ്‌കൃത അധ്യാപികയാണ്. എന്നാല്‍ സര്‍വ്വകലാശാല അപേക്ഷ ക്ഷണിച്ച വിജ്ഞാപനത്തില്‍ മലയാളത്തിലോ സംസ്‌കൃതത്തിലോ ഉള്ള പിച്ച്എഡി എന്നാണ് പറയുന്നത്. ഓര്‍ഡിനന്‍സ് തന്നെ മറികടന്ന് പൂര്‍ണ്ണിമയെ തന്നെ നിയമിക്കാനാണ് ശ്രമം നടന്നതെന്നാണ് പരാതി

അതേ സമയം വിദ്ഗ്ധര്‍ അടങ്ങിയെ സെലക്ഷന്‍ കമ്മിറ്റിയാണ് നിയമനം നടത്തിയതെന്നും ഡെപ്യൂട്ടേഷനിലാണ് നിയമനമെന്നും കേരള വിസി വിപി മഹാദേവപിള്ള വിശദീകരിച്ചു.

എന്നാല്‍ ഓര്‍ഡിനന്‍സിലെ യോഗ്യത മറികടന്നുവെന്ന പരാതിയിലും ഓര്‍ഡിനന്‍സില്‍ ഭേദഗതി നടത്തിയിട്ടുണ്ടോ എന്ന ചോദ്യത്തിനും സര്‍വ്വകലാശാലക്ക് കൃത്യമായി മറുപടിയില്ല. നിയമനത്തിനായി അപേക്ഷ ക്ഷണിച്ചപ്പോള്‍ പൂര്‍ണ്ണിമാ മോഹന്‍ മാത്രമാണ് അപേക്ഷ നല്‍കിയതെന്നുള്ള സര്‍വ്വകലാശാല വിശദീകരണം സംശയങ്ങള്‍ കൂട്ടുന്നു. പരാതിയില്‍ ഇനി ഗവര്‍ണ്ണറുടെ തുടര്‍നടപടിയാണ് പ്രധാനം.

ഗവര്‍ണര്‍ പൂര്‍ണിമക്കെതിരെ നിലപാട് എടുക്കുന്നതിന് മുമ്പ് തന്നെ അവരെ പുറത്താക്കാനാണ് മുഖ്യമന്ത്രിയുടെ നീക്കമെന്നറിയുന്നു. ഓഫീസര്‍ ഓണ്‍ സ്പഷ്യല്‍ ഡ്യൂട്ടിക്കും ഇതേ ചിന്താഗതി തന്നെയാണെന്നാണ് അറിയുന്നത്.