സുഹൃത്തുക്കളുമായി ചന്ദനമരം മോഷ്ടിക്കാന് കാട്ടിനുള്ളില് എത്തി; തടി തലച്ചുമടായി കൊണ്ടുപോകുന്നതിനിടെ കൊക്കയിലേക്ക് വീണ് യുവാവ് മരിച്ചു!! ഒപ്പമുണ്ടായിരുന്ന മൂന്ന് പേര് ചന്ദനമരവുമായി കടന്നുകളഞ്ഞു; വിവരമറിഞ്ഞെത്തിയ പൊലീസ് വാഹനത്തെ കാട്ടാനക്കൂട്ടം ആക്രമിച്ചു
സുഹൃത്തുക്കളുമായി ചന്ദനമരം മോഷ്ടിക്കാന് കാട്ടിലെത്തിയ യുവാവ് കാലു തെന്നി കൊക്കയില് വീണ് മരിച്ചു. മറയൂര് സാന്ഡല് ഡിവിഷനില് കാരയൂര് കാടിനുള്ളിലാണ് സംഭവം.
പാറയില് നിന്ന് കാലുതെന്നി 300 അടി താഴ്ചയിലേക്കു വീണ തമിഴ്നാട് സ്വദേശിയാണ് മരിച്ചതെന്നാണ് റിപ്പോര്ട്ട്. ഒപ്പമുണ്ടായിരുന്ന മൂന്ന് പേര് ചന്ദനമരവുമായി കടന്നു. തമിഴ്നാട് തിരുപ്പത്തൂര് ജില്ലയിലെ വാണിയംപാടിയില് നിന്നുള്ള സതീഷ് (35) ആണ് മരിച്ചതെന്നാണ് പൊലീസിന്റെ പ്രാഥമിക നിഗമനം.
ഇന്നലെ പുലര്ച്ചെ ഒന്നരയ്ക്കാണ് തമിഴ്നാട്ടില് നിന്നുള്ള നാലംഗ സംഘം ചന്ദനക്കാടിനുള്ളില് എത്തിയത്. വനപാലകരുടെ കണ്ണില് പെടാതെ ചന്ദനം മുറിച്ച് തടി തലച്ചുമടായി കൊണ്ടു പോകുന്നതിനിടെ സംഘത്തിലെ ഒരാള് കാലുതെറ്റി കൊക്കയിലേക്ക് വീഴുകയായിരുന്നു.
ചന്ദ്രമണ്ഡലമെന്ന് അറിയപ്പെടുന്ന ഈ സ്ഥലത്തെ പാറക്കെട്ടുകള്ക്ക് സമുദ്രനിരപ്പില് നിന്ന് 5003 അടിയോളം ഉയരമുണ്ട്. പിന്നാലെ ഊര്ന്നിറങ്ങിയെത്തിയ കൂട്ടുകാര് ആംബുലന്സിന്റെ സഹായം തേടിയ ശേഷം സ്ഥലം വിട്ടു.
ചന്ദനം മുറിക്കാന് കാടിനുള്ളില് എത്തിയതാണെന്നും കൂടെയുള്ളയാള്ക്ക് അപകടം പറ്റിയെന്നും ആംബുലന്സുകാരോടു പറഞ്ഞെങ്കിലും കാടിനുള്ളിലെ കൃത്യമായ സ്ഥലം പറഞ്ഞു കൊടുക്കാന് കഴിഞ്ഞില്ല. തുടര്ന്ന് ആംബുലന്സ് ഡ്രൈവര്മാര് വിവരമറിയിച്ചതിനെത്തുടര്ന്ന് പൊലീസ് എത്തി തിരഞ്ഞെങ്കിലും ആരെയും കണ്ടെത്താന് സാധിച്ചില്ല.
പൊലീസ് വാഹനത്തെ കാട്ടാനക്കൂട്ടം ആക്രമിക്കുകയും ചെയ്തു. ഇന്നലെ പകല് വീണ്ടും തിരച്ചില് നടത്തിയാണ് യുവാവിന്റെ മൃതദേഹം കണ്ടെത്തിയത്. പോസ്റ്റ്മോര്ട്ടത്തിനായി അടിമാലി താലൂക്ക് ആശുപത്രിയില് എത്തിച്ചു.
മറയൂര് ഇന്സ്പെക്ടര് പി.ടി.ബിജോയ്, എസ്ഐ അനൂപ് മോഹന്, സിവില് പൊലീസ് ഓഫിസര്മാരായ അനുകുമാര്, ജാഫര്, ഷെമീര്, ഡെന്നി ജോസഫ് എന്നിവരുടെ നേതൃത്വത്തിലായിരുന്നു പൊലീസ് നടപടികള്. കുണ്ടകാട് ആനക്കെട്ടാന് പള്ളത്തില് ഭാഗത്തുനിന്ന് 2 ചന്ദനമരങ്ങള് മോഷണം പോയതായി വനംവകുപ്പ് കണ്ടെത്തി.
https://www.facebook.com/Malayalivartha
