കുടിക്കാന്‍ വെള്ളം ചോദിച്ചാണ്‌ ഇയാള്‍ വീട്ടിലെത്തിയത്, വെള്ളമെടുക്കാന്‍ അകത്തേക്കു പോയ ഓമനയെ പിന്തുടര്‍ന്നെത്തി കുത്തി വീഴ്‌ത്തി മുറിയില്‍ പൂട്ടിയിട്ടു!! പട്ടാപ്പകല്‍ വീട്ടമ്മയെ ആക്രമിച്ച്‌ കവര്‍ച്ച; സിനിമാ സ്‌റ്റൈലില്‍ കാറിനെ പിന്തുടര്‍ന്ന് പൊലീസ് സംഘം; മണിക്കൂറുകള്‍ക്കകം പ്രതി പിടിയില്‍
പട്ടാപ്പകല്‍ വീട്ടമ്മയെ കുത്തി വീഴ്‌ത്തി സ്വര്‍ണവും പണവും കവര്‍ന്ന പ്രതി മണിക്കൂറുകള്‍ക്കകം പോലീസ് പിടിയില്‍. കല്ലൂര്‍കാട്‌ തഴുവന്‍കുന്ന്‌ പ്ലാത്തോട്ടത്തില്‍ ജ്വല്ലറിയുടമ സണ്ണിയുടെ ഭാര്യ ഓമനയാണ്‌ ആക്രമണത്തിനിരയായത്‌. സംഭവത്തില്‍ കോട്ടയം മരിയത്തുരുത്ത്‌ ശരവണവിലാസത്തില്‍ ഗിരീഷി(35)നെ പോലീസ് അറസ്‌റ്റ്‌ ചെയ്തു.
ഇന്നലെ രാവിലെ പത്തരയോടെ കുടിക്കാന്‍ വെള്ളം ചോദിച്ചാണ്‌ ഇയാള്‍ സണ്ണിയുടെ വീട്ടിലെത്തിയത്. സണ്ണിയുടെ ഭാര്യ ഓമന മാത്രമാണ്‌ വീട്ടിലുണ്ടായിരുന്നത്‌. മെഡിക്കല്‍ റെപ്രസെന്റിറ്റീവാണെന്നും രക്‌തസമ്മര്‍ദം കൂടിയതിനാല്‍ കുടിക്കാന്‍ വെളളം വേണമെന്നും ഇയാള്‍ ആവശ്യപ്പെട്ടു.
വെള്ളമെടുക്കാന്‍ അകത്തേക്കു പോയ ഓമനയെ പിന്തുടര്‍ന്നെത്തി കുത്തി വീഴ്‌ത്തി മുറിയില്‍ പൂട്ടിയിട്ടശേഷമായിരുന്നു കവര്‍ച്ച. ഓമനയുടെ ആഭരണങ്ങള്‍ ഊരിവാങ്ങിയ ഗിരീഷ്‌ വീട്ടില്‍ സൂക്ഷിച്ചിരുന്ന സ്വര്‍ണവും പണവും കവര്‍ന്ന്‌ രക്ഷപ്പെടുകയായിരുന്നു.
അല്‍പ്പസമയം കഴിഞ്ഞ്‌ മുറിയില്‍നിന്നു പുറത്തെത്തിയ വീട്ടമ്മ കല്ലൂര്‍ക്കാട്‌ എസ്‌.എച്ച്‌.ഒ: കെ.ജെ. പീറ്ററിനെ വിവരമറിയിച്ചു. സ്‌ഥലത്തെത്തിയ പോലീസ് പരുക്കേറ്റ വീട്ടമ്മയെ ആദ്യം ആശുപത്രിയിലെത്തിച്ചു. പിന്നീട്‌ നടത്തിയ അന്വേഷണത്തില്‍ ചുവന്ന കാറില്‍ ഒറ്റയ്‌ക്കാണ്‌ മോഷ്‌ടാവ്‌ എത്തിയതെന്നു വ്യക്‌തമായി. തുടര്‍ന്ന്‌ പോത്താനിക്കാട്‌ ഭാഗത്ത്‌ ഈ കാര്‍ കണ്ടതായി വിവരം ലഭിച്ചു.
തുടര്‍ന്ന്‌ പോത്താനിക്കാട്‌ എച്ച്‌.എസ്‌.ഒ. നോബിള്‍ മാനുവലിന്റെ നേതൃത്വത്തില്‍ മറ്റൊരു സംഘം കാറിനെ പിന്തുടര്‍ന്നു. സിനിമാ സ്‌റ്റൈലില്‍ കാറിനെ പിന്തുടര്‍ന്ന പോലീസ് സംഘം മണിക്കൂറുകള്‍ക്കു ശേഷം കലൂരില്‍ നിന്നു പ്രതിയെ സാഹസികമായി പിടികൂടുകയായിരുന്നു.വാഹനത്തില്‍ നിന്ന് ഒന്നര പവന്റെ സ്വര്‍ണമാലയും 20 ഗ്രാം തൂക്കം വരുന്ന വളകളും താലിമാലയും കമ്മലും കണ്ടെടുത്തു. വാഹനവും കസ്‌റ്റഡിയിലെടുത്തു.
എസ്‌.എച്ച്‌.ഒമാരായ കെ.ജെ. പീറ്റര്‍, നോബിള്‍ മാനുവല്‍, എസ്‌.ഐമാരായ ടി.എം. സൂഫി, രാജു, എ.എസ്‌.ഐ. സജി, എസ്‌.സി.പി.ഒമാരായ ജിമ്മോന്‍ ജോര്‍ജ്‌, ബിനോയി പൗലോസ്‌, രതീശന്‍ എന്നിവരാണു അന്വേഷണ സംഘത്തിലുണ്ടായിരുന്നത്‌.കവര്‍ച്ച നടന്ന്‌ മണിക്കൂറുകള്‍ക്കകം പ്രതിയെ പിടികൂടിയ പോലീസ് സംഘത്തെ ജില്ലാ പോലീസ് മേധാവി കെ. കാര്‍ത്തിക്‌ അഭിനന്ദിച്ചു.
https://www.facebook.com/Malayalivartha
