ഗവര്ണറോടാ കളി... സ്ത്രീധനത്തിനെതിരെയുള്ള ഗവര്ണര് ആരിഫ് മുഹമ്മദ് ഖാന്റെ പോരാട്ടം തുടങ്ങിയിട്ടേയുള്ളൂ; വിദ്യാസമ്പന്നരായ മലയാളികളെ കോളേജുതലത്തില് തന്നെ ഉടച്ചു വാര്ക്കാന് നീക്കം; സര്വകലാശാലാ പ്രവേശനത്തിന് സ്ത്രീധന വിരുദ്ധബോണ്ട് വാങ്ങണം
വിസ്മയ കേരളത്തിലുണ്ടാക്കിയ നടുക്കം ചെറുതല്ല. ആ നടുക്കത്തില് നിന്നും ഗവര്ണര് ആരിഫ് മുഹമ്മദ് ഖാന് ചില തീരുമാനങ്ങളെടുത്തു. സ്ത്രീധനത്തിനെതിരായ ഉപവാസത്തില് അവസാനിക്കുമെന്ന് കരുതിയവര്ക്ക് തെറ്റി. ഇപ്പോഴിതാ സുപ്രധാനമായ തീരുമാനമെടുത്തിരിക്കുകയാണ്. അദ്ദേഹം തന്റെ അധികാരം പ്രയോഗിക്കുകയാണ്.
സ്ത്രീധനം വാങ്ങുകയോ കൊടുക്കുകയോ ഇല്ലെന്ന് ഉറപ്പ് നല്കുന്ന വിദ്യാര്ത്ഥികള്ക്കു മാത്രമേ സര്വകലാശാലകളില് പ്രവേശനം നല്കാവൂവെന്ന് വൈസ് ചാന്സലര്മാരുടെ യോഗത്തില് ഗവര്ണര് ആരിഫ് മുഹമ്മദ്ഖാന്റെ നിര്ദ്ദേശം. ബിരുദം നല്കുന്നതിന് മുമ്പ് വിദ്യാര്ത്ഥികളില് നിന്ന് ഇതു സംബന്ധിച്ച് ബോണ്ട് വാങ്ങണമെന്ന് കഴിഞ്ഞ ദിവസം നടത്തിയ ഉപവാസത്തില് ഗവര്ണര് പറഞ്ഞിരുന്നു. സര്വകലാശാലാ നിയമനങ്ങളിലും ഈ ബോണ്ട് രീതി പിന്തുടരണമെന്നും ഗവര്ണര് പറഞ്ഞു.
ബോണ്ട് നടപ്പാക്കുന്ന കാര്യത്തില് തീരുമാനമെടുക്കാന് ഈ മാസം 21ന് വൈസ് ചാന്സലര്മാര് യോഗം ചേരുമെന്നും ഗവര്ണര് അറിയിച്ചു. രക്ഷാകര്ത്താക്കളും പ്രവേശന സമയത്ത് ബോണ്ട് ഒപ്പിടണം. പെണ്കുട്ടികള് ഇക്കാര്യത്തില് ധീരമായ നിലപാട് എടുക്കണം. സര്വകലാശാലകള് വിദ്യാര്ത്ഥികള്ക്കിടയില് ബോധവത്കരണം നടത്തണം. സ്ത്രീവിഷയമായി ചുരുക്കാതെ മാനുഷികപ്രശ്നമായി കാണണം.
കേരളത്തിന്റെ സാമ്പത്തിക, സാംസ്കാരിക മണ്ഡലങ്ങളില് സ്ത്രീകള് വലിയ സംഭാവനയാണ് നല്കുന്നത്. തന്റെ നിലപാടിനെ അനുകൂലിച്ച മുഖ്യമന്ത്രി പിണറായി വിജയനെ ഗവര്ണര് അഭിനന്ദിച്ചു. എറണാകുളം ഗസ്റ്റ് ഹൗസില് നടന്ന യോഗത്തില് കേരള സര്വകലാശാല, സാങ്കേതിക സര്വകലാശാല, കേരളകലാമണ്ഡലം, ശ്രീനാരായണ ഓപ്പണ് സര്വകലാശാല എന്നിവയുടേതൊഴികെയുള്ള വൈസ് ചാന്സലര്മാര് പങ്കെടുത്തു.
സ്ത്രീധനം പൂര്ണമായും ഇല്ലാതാക്കാന് വിദ്യാര്ത്ഥികള്ക്കിടയില് ബോധവത്കരണം ആവശ്യമാണെന്നും സര്വകലാശാലകളില് പ്രവേശനം നേടുമ്പോള് തന്നെ അതിനുള്ള നടപടികള് ആരംഭിക്കണമെന്നും ഗവര്ണര് ആരിഫ് മുഹമ്മദ് ഖാന് പറഞ്ഞു. വൈസ് ചാന്സിലര്മാരുമായുള്ള കൂടിക്കാഴ്ചയ്ക്കു ശേഷം മാദ്ധ്യമങ്ങളാേട് സംസാരിക്കുകയായിരുന്നു അദ്ദേഹം.
വിദ്യാര്ത്ഥികള് അഡ്മിഷന് എടുക്കുന്ന സമയത്തുതന്നെ സ്ത്രീധനം വാങ്ങില്ലെന്ന് സത്യപ്രസ്താവനയില് ഒപ്പിടണമെന്ന വ്യവസ്ഥ കൊണ്ടുവരണം. മാദ്ധ്യമങ്ങള് അടക്കമുള്ളവരുടെ സഹകരണം ഉണ്ടെങ്കില് ഇത് വിജയിക്കും. സ്ത്രീധനത്തിനെതിരെ പോരാടണമെന്ന് എല്ലാവരോടും കൈകള് കൂപ്പി അഭ്യര്ത്ഥിക്കുകയാണ്, അദ്ദേഹം പറഞ്ഞു.
കേരളത്തിന്റെ സാമൂഹ്യ, സാമ്പത്തിക, സംസ്കാരിക മണ്ഡലത്തില് സ്ത്രീകള് വലിയ സംഭാവനയാണ് നല്കുന്നത്. സ്ത്രീധനം ഇല്ലാതാക്കുക എന്നത് സ്ത്രീകളുടെ മാത്രം പ്രശ്നമല്ല. സമൂഹത്തിനായി നമ്മള് ചെയ്യേണ്ട കര്ത്തവ്യമാണ്. എല്ലാ മനുഷ്യരുടെയും ആവശ്യമാണ്. വിവാഹ സമയത്ത് നിര്ബന്ധിച്ചുള്ള സ്ത്രീധനം പാടില്ല. എന്ത് നല്കിയാലും അത് വധുവും പിതാവും തമ്മിലുള്ള കൊടുക്കല് വാങ്ങലായിരിക്കണം. അതില് വരനോ വരന്റെ കുടുംബത്തിനോ ഒരു പങ്കുമില്ലെന്നും അദ്ദേഹം പറഞ്ഞു.
ഗവര്ണര് കഴിഞ്ഞ ദിവസം സ്ത്രീധനത്തിനെതിരെ ഒരു ദിവസം ഉപവാസം നടത്തിയിരുന്നു. സ്ത്രീധനത്തിനും സ്ത്രീകള്ക്കു നേരെയുള്ള അതിക്രമങ്ങള്ക്ക് എതിരായുള്ളതാണ് ഉപവാസം എന്നാണ് അന്ന് അദ്ദേഹം പറഞ്ഞിരുന്നത്.
https://www.facebook.com/Malayalivartha
