പാറക്കെട്ടില് നിന്നു വീണ് മരണത്തോട് മല്ലിട്ടുകൊണ്ടിരുന്നപ്പോള് 108ലേക്ക് വിളിച്ചു..... പോലീസും കൂട്ടരും ആളെ തേടിയെത്തിയെങ്കിലും കാട്ടാനക്കൂട്ടവും കനത്ത മഴയും തടസ്സമായി, ഒടുവില് സംഭവിച്ചത്...
പാറക്കെട്ടില് നിന്നു വീണ് മരണത്തോട് മല്ലിട്ടുകൊണ്ടിരുന്നപ്പോഴാണ് അയാള് 108-ലേക്ക് വിളിച്ചത്. പോലീസും കൂട്ടരും ആളെ കണ്ടുപിടിക്കാന് കിണഞ്ഞ് പരിശ്രമിച്ചെങ്കിലും കനത്ത മഴയും കാട്ടാനക്കൂട്ടവും തടസ്സമായി
വെള്ളിയാഴ്ച അയാളുടെ മൃതദേഹം കണ്ടെടുക്കാനേ കഴിഞ്ഞുള്ളൂ. കാന്തല്ലൂര് ചന്ദ്രമണ്ഡലത്തിലാണ് യുവാവ് പാറക്കെട്ടില്നിന്നുവീണ് മരിച്ചത്. 40 വയസ്സ് പ്രായം തോന്നിക്കുന്ന മരിച്ചയാളെ ഇതുവരെ തിരിച്ചറിഞ്ഞിട്ടില്ല.
വ്യാഴാഴ്ച രാത്രി 9.28-നാണ് മറയൂരില് ഓടുന്ന 108 ആംബുലന്സ് ഡ്രൈവര് ജിബിന് തോമസിന്റെ ഫോണില് തിരുവനന്തപുരം 108 കോള് സെന്ററില്നിന്ന് സന്ദേശം എത്തുന്നത്. തനിക്ക് അപകടം പറ്റിയെന്നും പരിക്ക് ഗുരുതരമാണെന്നും കാന്തല്ലൂര് ചന്ദ്രമണ്ഡലം ഭാഗത്താണുള്ളതെന്നും ഒരാള് വിളിച്ചുപറഞ്ഞെന്നായിരുന്നു സന്ദേശം.
ജിബിന് ഈ നമ്പരില് പരിക്കേറ്റയാളെ വിളിച്ചെങ്കിലും സംസാരം വ്യക്തമാകാത്തതിനാലും സ്ഥലം കൃത്യമായി മനസ്സിലാക്കാന് കഴിയാത്തതിനാലും മറയൂര് പോലീസുമായി ബന്ധപ്പെട്ടു.
108 വാനും മറയൂര് പോലീസ് സ്റ്റേഷനിലെ ഉദ്യോഗസ്ഥരും പയസ് നഗര് സ്റ്റേഷനിലെ ഉദ്യോഗസ്ഥരുമായി പെരടിപ്പള്ളം ഭാഗത്ത് എത്തിയെങ്കിലും കനത്ത മഴയും വഴിയില് കാട്ടാനക്കൂട്ടവും ചന്ദ്രമണ്ഡലത്തില് എത്തിച്ചേരുന്നതിന് തടസ്സമായി. ഫോണില് വിളിച്ച് സ്ഥലം കണ്ടുപിടിക്കാനുള്ള ശ്രമം വിജയിച്ചില്ല. രാത്രി രണ്ടുമണിയോടുകൂടി പരിശോധന നടത്താന് കഴിയാതെ സംഘം മലയിറങ്ങി.
ഇന്നലെ മറയൂര് എസ്.ഐ. അനൂപ്മോന് പി.റ്റി., റ്റി.എ.ജാഫര്, ഷമീര് കെ.എം., ഡെന്നി പി.ജോസഫ് എന്നിവരുടെ നേതൃത്വത്തിലുള്ള സംഘവും അനീഷ് ഉമാമന്ദിരം, ബെന്നി, എസക്കിമുത്തു, ദിനേഷ് എന്നിവരുടെ നേതൃത്വത്തിലുള്ള നാട്ടുകാരും ചേര്ന്ന് നടത്തിയ തിരച്ചിലിലാണ് പാറക്കെട്ടിന് താഴെ അജ്ഞാതനായ ആളുടെ മൃതദേഹം കണ്ടെത്തിയത്.
200 അടി താഴ്ചയിലാണ് മൃതദേഹം കിടന്നത്. മൃതദേഹം ചുമന്ന് നാലുമണിക്കൂര്കൊണ്ടാണ് റോഡിലെത്തിച്ചത്.ആളെ തിരിച്ചറിയാത്തതിനാല് മൃതദേഹം അടിമാലി താലൂക്ക് ആശുപത്രി മോര്ച്ചറിയില് സൂക്ഷിക്കുമെന്നും സംഭവത്തില് അന്വേഷണം നടത്തുന്നുണ്ടെന്നും മറയൂര് ഇന്സ്പെക്ടര് പറഞ്ഞു.
ബുധനാഴ്ച രാത്രി ചന്ദ്രമണ്ഡലത്തിന് താഴെ കുണ്ടക്കാട് വനമേഖലയില്നിന്ന് രണ്ട് ചന്ദനമരങ്ങള് മോഷ്ടാക്കള് വെട്ടിക്കടത്തിയിരുന്നു. തമിഴ്നാട്ടില്നിന്ന് ചന്ദനം ചുമന്ന് അതിര്ത്തി കടത്താന് എത്തിയ സംഘത്തിലെ അംഗമാണോ എന്ന് പോലീസ് സംശയിക്കുന്നു..
"
https://www.facebook.com/Malayalivartha