ലീഗിനെ പൊളിച്ചാല്‍ കെ.റ്റി ജലീലിനെ മന്ത്രിയാക്കാമെന്ന് പിണറായി ഉറപ്പുനല്‍കിയതായി സൂചന. മന്ത്രി അബ്ദുറഹ്മാനെ മാറ്റിയായിരിക്കും ജലീലിന് മന്ത്രിസ്ഥാനം നല്‍കുകയെന്നറിയുന്നു. അബ്ദുറഹ്മാന് മന്ത്രി സ്ഥാനം നല്‍കുമ്പോള്‍ അത് താത്കാലികമാണെന്ന സൂചന സി പി എം നല്‍കിയിരുന്നു എന്നാല്‍ ലഭിക്കുന്ന വിവരം.

പാണക്കാട് തങ്ങളെയും കുഞ്ഞാലിക്കുട്ടിയെയും മുസ്ലീം ലീഗിനെയും ദുര്‍ബലമാക്കാന്‍ സി പി എമ്മിന് ബി ജെ പിയുടെ രഹസ്യ പിന്തുണയുണ്ടെന്നും റിപ്പോര്‍ട്ടുണ്ട്. ബി ജെ പി കേന്ദ്ര നേതൃത്വത്തിന്റെ അറിവോടെയാണ് ലീഗിനെതിരെ സി പി എം നീങ്ങുന്നതെന്നാണ് വിവരം.

മുസ്ലിംലീഗില്‍ അടുത്തകാലത്തായി രൂപപ്പെട്ട വിഭാഗീയതയും നേതാക്കള്‍ തമ്മിലുള്ള ഭിന്നതകളും പാര്‍ട്ടിയെ വലിയ പ്രതിസന്ധിയിലാണെത്തിച്ചിരിക്കുകയാണ്. ഏതാനും ദിവസംമുമ്പ് നടന്ന നേതൃയോഗത്തില്‍ പി.കെ. കുഞ്ഞാലിക്കുട്ടി നേരിട്ട വിമര്‍ശനത്തിന് തൊട്ടുപിന്നാലെയാണ് നിയമസഭയില്‍ കെ.ടി. ജലീല്‍ ആരോപണങ്ങളുമായി രംഗത്തെത്തിയത്. ഇതിനുപിന്നില്‍ ലീഗിലെത്തന്നെ ചിലരുടെ പിന്തുണയുണ്ടെന്ന ആരോപണമാണ് പ്രശ്‌നം സങ്കീര്‍ണമാക്കുന്നത്.

നിയമസഭയില്‍ പി.കെ. കുഞ്ഞാലിക്കുട്ടിയും കെ.ടി. ജലീലും തമ്മില്‍ നടന്നുവരുന്ന വാക്‌പോര് പ്രത്യക്ഷത്തില്‍ രണ്ടുപേര്‍ തമ്മിലുള്ള വ്യക്തിവൈരാഗ്യമായി ചുരുക്കിക്കാണാന്‍ രാഷ്ട്രീയകേന്ദ്രങ്ങള്‍ തയ്യാറല്ല. ലീഗിന്റെ എക്കാലത്തെയും അനിഷേധ്യ നേതൃത്വമാണ് പാണക്കാട് കുടുംബം. ആ കുടുംബത്തിലെ ഇപ്പോഴത്തെ ഒന്നാമനായ ഹൈദരാലി ശിഹാബ് തങ്ങളുടെ പേരുവരെ കുഞ്ഞാലിക്കുട്ടിക്കെതിരായ ആരോപണമുയര്‍ത്താന്‍ ജലീല്‍ ഉപയോഗിച്ചു. തങ്ങളെ മറയാക്കി കുഞ്ഞാലിക്കുട്ടി സാമ്പത്തിക നേട്ടമുണ്ടാക്കി എന്നതിലാണ് ജലീല്‍ ഊന്നല്‍നല്‍കിയത്. ഇതിനെല്ലാം അതേ നാണയത്തില്‍ മറുപടിപറഞ്ഞ കുഞ്ഞാലിക്കുട്ടി തന്റെ നേതൃത്വത്തിനും അടിവരയിടുകയായിരുന്നു.

പഴയ സഹപ്രവര്‍ത്തകര്‍ തമ്മിലുള്ള കണക്കുതീര്‍ക്കല്‍ മാത്രമായി ഇത്തവണത്തെ പോര് ഒതുങ്ങുന്നില്ല. നേരത്തേ ദേശീയ നേതൃത്വത്തിലേക്കുപോയ കുഞ്ഞാലിക്കുട്ടി എം.പി.സ്ഥാനമൊഴിഞ്ഞ് കേരള രാഷ്ട്രീയത്തിലേക്കു വന്നതോടെയാണ് ലീഗില്‍ ഒരുവിഭാഗം വിമതശബ്ദമുയര്‍ത്തിയത്. നിയമസഭാ തിരഞ്ഞെടുപ്പിലെ സ്ഥാനാര്‍ഥി നിര്‍ണയത്തില്‍ തുടങ്ങിയ ഭിന്നത ഇപ്പോഴും തുടരുന്നു.

കേരളത്തില്‍ രണ്ടാംവട്ടവും അധികാരത്തില്‍നിന്നു മാറിനില്‍ക്കേണ്ടി വന്നതോടെ ലീഗിന്റെ അണികളിലും നേതൃത്വത്തിലും നിരാശ പ്രകടമാണ്. സമൂഹത്തെ പ്രതിനിധാനം ചെയ്യാന്‍ സമുദായത്തിന്റെ പേരിലുള്ള പാര്‍ട്ടിതന്നെ വേണമെന്നില്ലെന്ന രാഷ്ട്രീയസന്ദേശം നേരത്തേത്തന്നെ സി.പി.എം. ഉന്നയിക്കുന്നതാണ്. ലീഗിലെ അമര്‍ഷവും ഭിന്നതയും വളര്‍ത്താനും അവരെ ദുര്‍ബലപ്പെടുത്താനുമാണ് സി.പി.എമ്മിന്റെ പുതിയനീക്കം. ഇതിന്റെ തുടക്കംകൂടിയാണ് കെ.ടി. ജലീലിലൂടെ സി.പി.എം. നടത്തുന്നത്. ജലീലിന്റെ ഒളിയുദ്ധത്തിന് സി.പി.എം നേതൃത്വത്തിന്റെ പിന്തുണയുണ്ട്. ഉള്‍പ്പാര്‍ട്ടി ചര്‍ച്ചകളും നടപടികളുമെല്ലാം നേതൃത്വത്തിനെതിരായ പക്ഷം ചോര്‍ത്തുന്നുവെന്ന ആരോപണം ലീഗില്‍ത്തന്നെയുണ്ട്.

യു.ഡി.എഫിലെ ചില ഘടകകക്ഷികള്‍ക്കും ലീഗിന്റെ ചില നിലപാടുകളോട് അതൃപ്തിയുണ്ട്. വിശേഷിച്ചും കോണ്‍ഗ്രസിലെ ഒരുവിഭാഗത്തിന്. ന്യൂനപക്ഷ സ്‌കോളര്‍ഷിപ്പ് ഉള്‍പ്പെടെ സമീപകാലത്ത് ഉയര്‍ന്നുവന്ന ചില വിഷയങ്ങളിലെ ലീഗ് നിലപാട് യു.ഡി.എഫിനു പ്രയാസമുണ്ടാക്കുന്നുവെന്ന തോന്നല്‍ ചില ഘടകകക്ഷികള്‍ പങ്കുവെക്കുന്നു. ഹിന്ദു, ക്രിസ്ത്യന്‍ സമുദായത്തിലെ വലിയൊരു വിഭാഗം ഇതിനെതിരാണെന്നും ഇത് യു.ഡി.എഫിനെ ക്ഷീണിപ്പിക്കുന്നുവെന്നുമാണ് അവരുടെ നിലപാട്.

മുസ്ലിംലീഗില്ലാതെ യു.ഡി.എഫിനു നിലനില്‍പ്പില്ലെന്ന ബോധ്യവും അവര്‍ക്കുണ്ട്. അത്തരത്തില്‍ ലീഗിനെ തള്ളാനും കൊള്ളാനും കഴിയാത്ത അവസ്ഥയിലാണവര്‍. ഈ സാഹചര്യം മുതലെടുത്ത് ലീഗിനകത്തെ ഭിന്നത വലുതാക്കാനുള്ള ശ്രമത്തിലാണ് സി.പി.എം.