ചേര്‍ത്തലയില്‍ ടാങ്കര്‍ ലോറിയിടിച്ച് ബൈക്ക് യാത്രക്കാരന്‍ മരിച്ച സംഭവത്തില്‍ ലോറി ജീവനക്കാര്‍ രക്ഷപ്പെടുത്താന്‍ ശ്രമിച്ചില്ലെന്ന പരാതിയുമായി ബന്ധുക്കള്‍ രംഗത്ത്.മായിത്തറയില്‍ വാഹനാപകടത്തില്‍ ബൈക്ക് യാത്രക്കാരന്‍ മരിച്ച സംഭവത്തില്‍ ഇടിച്ച ടാങ്കര്‍ ലോറി കടന്നുകളഞ്ഞെന്ന് ബന്ധുക്കള്‍.


തണ്ണീര്‍മുക്കം ഗ്രാമപഞ്ചായത്ത് 20ാം വാര്‍ഡില്‍ മണവേലി പാലംപറമ്ബില്‍ സത്യന്റെ മകന്‍ വിഷ്ണുവാണ് (24) വെള്ളിയാഴ്ച പുലര്‍ച്ച 6.15ഓടെ മരിച്ചത്. അമിത വേഗത്തിലെത്തിയ ടാങ്കര്‍ ബൈക്കിലിടിക്കുകയായിരുന്നു.

അപകടത്തിനുശേഷം ലോറി റോഡിന്റെ വശത്തേക്ക് ആദ്യം മാറ്റിയെങ്കിലും ഉടന്‍തന്നെ ചേര്‍ത്തല ഭാഗത്തേക്ക് ഓടിച്ചു പോകുകയായിരുന്നു. ലോറി ജീവനക്കാര്‍ വിഷ്ണുവിനെ രക്ഷപ്പെടുത്താന്‍പോലും ശ്രമിച്ചില്ലെന്നാണ് പരാതി. ചേര്‍ത്തല പൊലീസ് സ്‌റ്റേഷനിലെത്തി അപകടം നടന്നതായി അറിയിച്ചു.

മാരാരിക്കുളം സ്‌റ്റേഷന്‍ പരിധിയാണെന്ന് ഇവിടെനിന്ന് പറഞ്ഞതനുസരിച്ച് അവിടെയെത്തി െ്രെഡവറും ക്ലീനറും കീഴടങ്ങുകയാണുണ്ടായത്. അപകടം നടന്ന് 20 മിനിറ്റോളം രക്തം വാര്‍ന്ന് റോഡില്‍ കിടന്നതാണ് മരണം സംഭവിക്കാന്‍ ഇടയാക്കിയതെന്നും വിഷ്ണുവിന്റെ ബന്ധുക്കള്‍ കുറ്റപ്പെടുത്തി.

അപകടമുണ്ടായതിനുശേഷം പിറകെ വരികയായിരുന്ന ബൈക്ക് യാത്രക്കാരന്‍ വിഷ്ണുവിനെ ആശുപത്രിയിലെത്തിക്കാന്‍ പല വണ്ടികള്‍ക്കും കൈകാണിച്ചെങ്കിലും നിര്‍ത്തിയില്ല. പിന്നീട് ആശുപത്രിയില്‍ എത്തിച്ചപ്പോഴേക്കും മരണം സംഭവിച്ചിരുന്നു.