ഡോക്ടര്മാര്ക്ക് ജോലി നിര്വ്വഹിക്കാന് എല്ലാ സൗകര്യവും ഒരുക്കും, മെഡിക്കല് കോളേജുകളില് സുരക്ഷക്ക് എസ്ഐഎസ്എഫ് ഉദ്യോഗസ്ഥരെ നിയോഗിക്കുമെന്നും മുഖ്യമന്ത്രി പിണറായി വിജയന്
ഡോക്ടര്മാര്ക്കെതിരെയുള്ള അക്രമങ്ങളില് ശക്തമായ നടപടികള് ഉണ്ടാകുമെന്ന് മുഖ്യമന്ത്രി പിണറായി വിജയന്. ഡോക്ടര്മാര്ക്ക് ജോലി നിര്വ്വഹിക്കാന് എല്ലാ സൗകര്യവും ഒരുക്കും. മെഡിക്കല് കോളേജുകളില് സുരക്ഷക്ക് എസ്ഐഎസ്എഫ് ഉദ്യോഗസ്ഥരെ നിയോഗിക്കണമെന്നും ആദ്ദേഹം ആവശ്യപ്പെട്ടു.
ഡോക്ടര്മാര്ക്കെതിരെ നടന്ന അക്രമങ്ങളെക്കുറിച്ച് ചര്ച്ച ചെയ്യാന് ചേര്ന്ന ഉന്നതതല യോഗത്തിലാണ് മുഖ്യമന്ത്രി ഇക്കാര്യം ആവശ്യപ്പെട്ടത്. സംസ്ഥാനത്ത് ഡോക്ടര്മാര്ക്കെതിരായ അതിക്രമങ്ങള് വര്ദ്ധിച്ച് വരുന്ന സാഹചര്യത്തിലാണ് മുഖ്യമന്ത്രി നേരിട്ട് യോഗം വിളിച്ചത്. ഫോര്ട്ട് താലൂക്കാശുപത്രിയില് വനിതാ ഡോക്ടര്ക്ക് ക്രൂര മര്ദ്ധനമേറ്റതിന്റെ ദൃശ്യങ്ങളും കഴിഞ്ഞ
ദിവസം പുറത്ത് വന്നിരുന്നു. ഡോക്ടര്മാര്ക്കെതിരെയുള്ള അക്രമങ്ങളില് ശക്തമായ നടപടികള് ഉണ്ടാകുമെന്ന് മുഖ്യമന്ത്രി പിണറായി വിജയന് യോഗത്തില് പറഞ്ഞു. കാഷ്വാലിറ്റികളിലും ഒപികളിലും സിസിടിവി സ്ഥാപിക്കണം. സ്വകാര്യ ആശുപത്രികളും അതിന് സംവിധാനമൊരുക്കണം.
പോലീസ് എയ്ഡ് പോസ്റ്റ് ഉള്ള ആശുപത്രികളിലെ സിസിടിവി സംവിധാനം എയിഡ്പോസ്റ്റുമായി ബന്ധപ്പെടുത്തണമെന്ന് മുഖ്യമന്ത്രി നിര്ദേശിച്ചു. അക്രമം നടന്നാല് എത്രയും പെട്ടെന്ന് പ്രതികളെ അറസ്റ്റു ചെയ്യണം. ഒപികളിലും ക്യാഷ്വാലിറ്റികളിലും സെക്യൂരിറ്റി ഉദ്യോഗസ്ഥരെ നിയമിക്കുമ്പോൾ ഇനി മുതല് വിമുക്തഭടന്മാരെ തെരഞ്ഞെടുക്കണം.
മെഡിക്കല് കോളേജ് പോലുള്ള വലിയ ആശുപത്രികളില് സ്റ്റേറ്റ് ഇന്ഡസ്ട്രിയല് സെക്യൂരിറ്റി ഫോഴ്സിലെ ഉദ്യോഗസ്ഥരെ ചീഫ് സെക്യൂരിറ്റി ഓഫീസറായി നിയമിക്കണമെന്നും മുഖ്യമന്ത്രി ആവശ്യപ്പെട്ടു. ആരോഗ്യ വകുപ്പ് മന്ത്രി വീണാ ജോര്ജ്ജ്, ചീഫ് സെക്രട്ടറി ഡോ. വിപി ജോയ്, സംസ്ഥാന പോലീസ് മേധാവി അനില്കാന്ത്, തുടങ്ങിയവരും യോഗത്തില് പങ്കെടുത്തു.
https://www.facebook.com/Malayalivartha
