ബീച്ച്‌​ തുറക്കുന്ന വിഷയത്തില്‍ ആകെ ആശയക്കുഴപ്പം. സംസ്​ഥാനത്ത് തിങ്കളാഴ്​ച മുതല്‍ ബീച്ചുകള്‍ തുറക്കുമെന്ന്​ ​ ടൂറിസം മന്ത്രി പി.എ. മുഹമ്മദ്​ റിയാസി​ന്‍റെ അറിയിപ്പ്​ വന്നെങ്കിലും കോഴിക്കോട്​ ബീച്ച്‌​ തുറക്കണമോ വേണ്ടയോ എന്ന കാര്യത്തില്‍ ആശയക്കുഴപ്പം.

തിങ്കളാഴ്​ച ആദ്യം ആരെയും ബീച്ചില്‍ പ്രവേശിക്കാന്‍ അനുവദിച്ചില്ല. വൈകുന്നേരം അഞ്ചരയോടെ നിരവധി പേര്‍ ബീച്ചില്‍ പ്രവേശിച്ചു. പൊലീസ്​ തടഞ്ഞതുമില്ല. പിന്നീട്​ 6.45ഓടെ എല്ലാവരെയും പൊലീസ്​ ബീച്ചില്‍ നിന്ന്​ ഒഴിപ്പിച്ചു.

കോഴിക്കോട്​ ബീച്ചില്‍ തല്‍ക്കാലം ആളുകളെ പ്രവശിപ്പിക്കേണ്ടെന്നാണ്​ തീരുമാനമെന്ന്​ കഴിഞ്ഞ ദിവസം ചേര്‍ന്ന ഉദ്യോഗസ്​ഥരുടെ യോഗം തീരുമാനിച്ചിരുന്നു. പക്ഷെ, ഇതു സംബന്ധിച്ച്‌​ ഉത്തരവിറങ്ങിയിട്ടില്ല. വിഷയം സംബന്ധിച്ച്‌​ കലക്​ടറോട്​ ചോദിക്കണമെന്നാണ്​ ഡി.ടി.പി.സി അധികൃതരും ദുരന്തനിവാരണ വകുപ്പ്​ അധികൃതരും പറയുന്നത്​.

അതേസമയം, കലക്​ടറെ ഫോണില്‍ കിട്ടാത്ത സാഹചര്യമാണ്​. പൊലീസിനും ഇതു സംബന്ധിച്ച്‌​ കൃത്യമായ ധാരണയില്ല എന്നാണ്​ മനസ്സിലാവുന്നത്​. അതു ​കൊണ്ടാണ്​ പൊലീസ്​ വ്യത്യസ്​ത സമയങ്ങളില്‍ വെവ്വേറെ തീരുമാനങ്ങള്‍ നടപ്പാക്കുന്നത്​.

കോഴിക്കോട്​ ബീച്ച്‌​ കോടികള്‍ ചെലവഴിച്ച്‌​ നവീകരിച്ച്‌​ ഉദ്​ഘാടനം നടത്തിയത്​ കഴിഞ്ഞ മാസമാണ്​. ഭട്ട്​ റോഡ്​ ബീച്ചും കോഴിക്കോട് സൗത്ത്​ ബീച്ചിലെ കോര്‍ണിഷും ​കോര്‍പറേഷന്‍ ഓഫിസിന്​ മുന്നിലെ വിശ്രമത്തറയും നവീകരിച്ചിട്ടുണ്ട്​. സരോവരം കഴിഞ്ഞ ദിവസം തുറന്നു ​കൊടുത്തിട്ടുണ്ട്​. ഇതിനകത്തെ ബയോ പാര്‍ക്കിലാവ​ട്ടെ ശാരീരിക അകലം ഒട്ടും പാലിക്കാതെയാണ്​ സന്ദര്‍ശകരുടെ ഇരിപ്പ്​.