വിടചൊല്ലി കലാലോകം... വേദനകളില്ലാത്ത ലോകത്തേക്ക് ശരണ്യ യാത്രയായി; ശരണ്യയ്ക്ക് കണ്ണീരോടെ വിടചൊല്ലി കലാലോകം; മന്ത്രി ആന്റണി രാജു, നടന് മണിയന് പിള്ള രാജു, ജി. സുരേഷ്കുമാര്, നന്ദു, രഞ്ജിത് തുടങ്ങിയവര് അന്ത്യാഞ്ജലിയര്പ്പിച്ചു; അന്ത്യ ചുംബനമര്പ്പിച്ച് സീമ ജി നായര്
അമ്മയുടെ പൊട്ടിക്കരച്ചിലും സീമ ജീ നായരുടെ അന്ത്യ ചുംബനവും മനസില് തട്ടിയ നിമിഷങ്ങള്ക്ക് ശേഷം സീരിയല് താരം ശരണ്യ ശശി യാത്രയായി. പോരാട്ടത്തിന്റെയും ആത്മവിശ്വാസത്തിന്റെയും പ്രതിരൂപമായ സിനിമസീരിയല് താരം ശരണ്യ ശശിക്ക് കലാലോകം വിടചൊല്ലി. ഇന്നലെ ഉച്ചയ്ക്ക് ശരണ്യയുടെ സംസ്കാരം തൈക്കാട് ശാന്തികവാടത്തില് നടന്നു. സിനിമ, സീരിയല് രംഗത്തെ അടുത്ത സുഹൃത്തുക്കളും ബന്ധുക്കളും സംസ്കാരത്തില് പങ്കെടുത്തു.
ചൊവ്വാഴ്ച രാവിലെ ചെമ്പഴന്തി അണിയൂരിലെ 'സ്നേഹസീമ'യില്നിന്ന് മൃതദേഹം തൈക്കാട് ഭാരത് ഭവനിലേക്ക് കൊണ്ടുവന്നു. ചലച്ചിത്രസാംസ്കാരിക രംഗത്തെ പ്രമുഖര് അന്ത്യാഞ്ജലിയര്പ്പിക്കാനെത്തി. മന്ത്രി ആന്റണി രാജു, നടന് മണിയന്പിള്ള രാജു, ജി. സുരേഷ്കുമാര്, നന്ദു, രഞ്ജിത് തുടങ്ങിയവര് അന്ത്യാഞ്ജലിയര്പ്പിച്ചു. പ്രതിസന്ധിഘട്ടങ്ങളില് ശരണ്യയ്ക്ക് താങ്ങായിരുന്ന നടി സീമ ജി. നായര് നെറുകയില് അന്ത്യചുംബനം നല്കിയാണ് ശരണ്യയെ യാത്രയാക്കിയത്.
ശരണ്യ തിങ്കളാഴ്ച ഉച്ചയ്ക്കാണ് തിരുവനന്തപുരത്തെ സ്വകാര്യ ആശുപത്രിയില് വച്ച് മരിച്ചത്. കൊവിഡിനെത്തുടര്ന്നുണ്ടായ ന്യുമോണിയയാണ് ആരോഗ്യനില വഷളാക്കിയത്. കൊവിഡ് നെഗറ്റീവായെങ്കിലും രക്തത്തില് സോഡിയത്തിന്റെ അളവ് കുറഞ്ഞതിനെ തുടര്ന്ന് കഴിഞ്ഞയാഴ്ചയാണ് വീണ്ടും ആശുപത്രിയില് പ്രവേശിപ്പിച്ചത്.
ശരണ്യ ശശിയുടെ വിയോഗം നടിയും അടുത്ത സുഹൃത്തുമായ സീമ ജി നായര് വളരെ വേദനയോടെയാണ് പങ്കുവച്ചത്. രോഗം സ്ഥിരീകരിച്ചതു മുതല് ശരണ്യയ്ക്ക് പിന്തുണയുമായി സീമ ജി നായര് ഒപ്പമുണ്ടായിരുന്നു. ശരണ്യയുടെ ആരോഗ്യവിവരങ്ങള് സീമയാണ് പങ്കുവയ്ക്കാറുള്ളത്. പ്രാര്ത്ഥനകള്ക്കും പരിശ്രമങ്ങള്ക്കും വിരാമം.. അവള് യാത്രയായതായി സീമ കുറിച്ചു.
തലച്ചോറില് ട്യൂമര് ബാധിച്ചതിനെ തുടര്ന്ന് 2012 മുതല് ചികിത്സയിലായിരുന്നു ശരണ്യ. കഴിഞ്ഞ ഒന്പത് വര്ഷത്തിനിടെ പതിനൊന്നോളം ശസ്ത്രക്രിയകള് ചെയ്തു. ചികിത്സാ കാലയളവിലും ഏതാനും സീരിയലുകളിലും വേഷമിട്ടിരുന്നു. ശരീരം ദുര്ബലമായി. ഭാരവും വര്ദ്ധിച്ചതോടെ ശരണ്യ അഭിനയത്തോട് വിട പറഞ്ഞു.
കോവിഡ് ബാധിച്ച് മാസങ്ങള്ക്ക് മുന്പാണ് ശരണ്യയെ ആശുപത്രിയില് പ്രവേശിപ്പിച്ചത്. പിന്നീട് കോവിഡ് മാറിയെങ്കിലും ന്യുമോണിയ പിടികൂടി. ഏറെ നാളത്തെ ചികിത്സയ്ക്ക് ശേഷം ന്യുമോണിയയില്നിന്ന് മുക്തയായ ശരണ്യ വീട്ടില് തിരിച്ചെത്തി. പിന്നീട് രക്തത്തില് സോഡിയത്തിന്റെ അളവ് കുറഞ്ഞതിനെ തുടര്ന്ന് വീണ്ടും ആശുപത്രിയില് പ്രവേശിപ്പിക്കുകയായിരുന്നു.
കണ്ണൂര് പഴയങ്ങാടി സ്വദേശിയായ ശരണ്യ, കണ്ണൂരിലെ ജവഹര്ലാല് നവോദയ വിദ്യാലയത്തിലെ വിദ്യാര്ഥിയായിരുന്നു. നര്ത്തകി കൂടിയായ ശരണ്യ, ബാലചന്ദ്രമേനോന് സംവിധാനം ചെയ്ത സൂര്യോദയം എന്ന ദൂരദര്ശന് സീരിയയിലൂടെയാണ് അഭിനയരംഗത്ത് തുടക്കമിടുന്നത്. പിന്നീട് ഒട്ടനവധി ടെലിവിഷന് സീരിയലുകളില് അഭിനയിച്ചു. മലയാളത്തിനു പുറമേ തമിഴ് (ദൈവം തന്ത വീട്) തെലുങ്ക് സീരിയലുകളിലും അഭിനയിച്ചു.
സീരിയലുകള്ക്ക് പുറമേ ചാക്കോ രണ്ടാമന്, തലപ്പാവ്, ഛോട്ടാ മുംബൈ തുടങ്ങിയ സിനിമകളിലും വേഷമിട്ടു. തലപ്പാവില് ലാലിന്റെ കഥാപാത്രത്തിന്റെ മകളുടെ വേഷമാണ് ശരണ്യ അവതരിപ്പിച്ചത്. മധുപാല് സംവിധാനം ചെയ്ത ഈ ചിത്രത്തിലെ ശരണ്യയുടെ വേഷം ഏറെ ശ്രദ്ധ നേടിയിരുന്നു. അന്വര് റഷീദ് സംവിധാനം ചെയ്ത ഛോട്ടാ മുംബൈയില് മോഹന്ലാലിന്റെ വാസ്കോ ഡ ഗാമ എന്ന കഥാപാത്രത്തിന്റെ സഹോദരിയുടെ വേഷമാണ് ശരണ്യ ചെയ്തത്.
f
https://www.facebook.com/Malayalivartha
