ഇ ബുള്‍ ജെറ്റ് കാരണം വണ്ടികളുടെ രൂപം മാറ്റിയ എല്ലാവര്‍ക്കും പണി വരുന്നു. ഇ ബുള്‍ ജെറ്റ് സഹോദരങ്ങളുടെ അറസ്റ്റിന് പിന്നാലെ സോഷ്യല്‍ മീഡിയയിലൂടെ അതിരുവിട്ട പ്രതികരണങ്ങളുമായെത്തിയ പലരും വീഡിയോ മുക്കി. പോലീസ് നടപടി ശക്തമാക്കിയതോടെയാണ് പല വ്‌ളോഗര്‍മാരും വീഡിയോ ഡിലീറ്റ് ചെയ്തത്.

മോട്ടോര്‍ വാഹന വകുപ്പിനെ അസഭ്യം പറഞ്ഞുകൊണ്ട് ചിലര്‍ രംഗത്തെത്തിയിരുന്നു. വീഡിയോകളെല്ലാം മണിക്കൂറുകള്‍ക്കകമാണ് അക്കൗണ്ടുകളില്‍ നിന്ന് അപ്രത്യക്ഷമായത്. അതില്‍ ചിലര്‍ വിശദീകരണവുമായുമെത്തി. പൊലീസുകാരെയും മോട്ടോര്‍ വാഹന വകുപ്പ് ഉദ്യോഗസ്ഥരെയും അസഭ്യം പറഞ്ഞതിന് പിന്നാലെ കഴിഞ്ഞദിവസം കാവനാട് സ്വദേശി റിച്ചാര്‍ഡ് റിച്ചുവിനെ പൊലീസ് അറസ്റ്റ് ചെയ്തിരുന്നു.

സംഭവം വിവാദമായതോടെ വീഡിയോ റിച്ചാര്‍ഡ് ഡിലീറ്റ് ചെയ്‌തെങ്കിലും പൊലീസ് പിന്‍വാങ്ങിയില്ല. ചൊവ്വാഴ്ച രാത്രിയോടെ ഇയാളെ പിടികൂടിയിരുന്നു. 'പൊളി സാന'മെന്ന് പറഞ്ഞ് നേരത്തെ എയര്‍ ഗണ്‍ പരിചയപ്പെടുത്തിയ ആളാണ് റിച്ചാര്‍ഡ് റിച്ചു.

വാഹനങ്ങളുടെ മോഡിഫിക്കേഷനാണ് ഇപ്പോള്‍ സോഷ്യല്‍ മീഡിയയിലെ ചര്‍ച്ചാ വിഷയം. ഇതിനിടെ 'മല്ലു ട്രാവലറിന്റെ' ഒരു പഴയ വീഡിയോ വീണ്ടും സമൂഹമാദ്ധ്യമങ്ങളില്‍ വൈറലായിക്കൊണ്ടിരിക്കുകയാണ്. മോട്ടോര്‍ വാഹന വകുപ്പിനെ വെല്ലുവിളിച്ചുകൊണ്ടുള്ളതാണ് വീഡിയോ.

'വണ്ടി മോഡിഫിക്കേഷന്‍ ചെയ്യും, ഞാന്‍ ചെയ്യും. വണ്ടി പൈസയും ടാക്‌സും കൊടുത്ത് മേടിച്ചിട്ട് മോഡിഫിക്കേഷനൊന്നും എനിക്ക് അവകാശമില്ലേ? പോയി പണി നോക്കാന്‍ പറ. നാട്ടില്‍ വന്ന് പച്ചയ്ക്ക് ഞാന്‍ ചെയ്യും. ബാക്കി വരുന്നിടത്തുവച്ച് കാണാം.

ഞാന്‍ ആ വണ്ടി എറണാകുളത്തേക്ക് ഓട്ടിയിട്ട് തന്നെ പോകും. ആ വണ്ടിയുടെ ഏകദേശം എഴുപത് ശതമാനത്തോളം മോഡിഫിക്കേഷനാണ്. അഞ്ച് രാജ്യങ്ങളില്‍ ഓടിയിട്ട് പിടിച്ചിട്ടില്ല.എന്നിട്ടല്ലേ, സേഫ്റ്റിയുടെ കാര്യാണേല്‍ ഇത്രയും രാജ്യങ്ങളിലോടിയിട്ടും ഒരു പ്രശ്‌നവും ഉണ്ടായിട്ടില്ല. വണ്ടി മോഡിഫൈ ചെയ്യുന്നത് മോര്‍ കംഫര്‍ട്ടിനും, മോര്‍ സേഫ്റ്റിയ്ക്കും വേണ്ടിയാണ്. വണ്ടി മോഡിഫിക്കേഷന്‍ എന്നും പറഞ്ഞ് എംവിഡി പിടിച്ചാല്‍ തീര്‍ന്നു അതോടെ, കുടുംബം വിറ്റാണെങ്കിലും ഞാന്‍ ഓനിക്കെതിരെ കേസുകൊടുക്കും.' എന്നാണ് വീഡിയോയില്‍ പറയുന്നത്.

അതേസമയം മോട്ടോര്‍ വാഹനവകുപ്പിന്റെ നോട്ടീസ് ലഭിച്ചതിന്റെ പേരില്‍ ആര്‍.ടി. ഓഫീസില്‍ കയറി അതിക്രമം കാണിക്കുകയും വീഡിയോ ഷൂട്ട് ചെയ്ത് സാമൂഹ്യ മാധ്യമങ്ങളിലൂടെ പ്രശ്‌നങ്ങളുണ്ടാക്കുകയും ചെയ്ത ഇ ബുള്‍ ജെറ്റ് വ്‌ളോഗര്‍മാരുടെ നടപടികളെ ഗതാഗതമന്ത്രി ആന്റണി രാജു ഇന്നലെ നിയമസഭയില്‍ രൂക്ഷമായ ഭാഷയില്‍ വിമര്‍ശിച്ചു.

ഇന്നലെ മുന്‍ഗതാഗതമന്ത്രി കൂടിയായ മാത്യു ടി.തോമസ് റോഡ് സുരക്ഷയുമായി ബന്ധപ്പെട്ട് സഭയില്‍ കൊണ്ടുവന്ന ശ്രദ്ധക്ഷണിക്കലിനുള്ള മറുപടിയിലാണ് മന്ത്രി ആന്റണി രാജു വ്‌ളോഗര്‍മാരെ കടന്നാക്രമിച്ചത്.

റോഡ് സുരക്ഷ ഉറപ്പാക്കുന്നതിന് മോട്ടോര്‍വാഹന ചട്ടങ്ങള്‍ നടപ്പാക്കാന്‍ ശ്രമിക്കുമ്പോള്‍ അതിനെ ബോധപൂര്‍വ്വം അട്ടിമറിക്കാന്‍ സംഘടിതമായ ശ്രമങ്ങള്‍ മറുവശത്ത് നടന്നുവരികയാണ്. ലോക്ക് ഡൗണ്‍ നിയന്ത്രണങ്ങളെയും മോട്ടോര്‍വാഹന നിയമങ്ങളെയും കാറ്റില്‍പ്പറത്തി തിരക്കഥയുടെ അടിസ്ഥാനത്തില്‍ ജനങ്ങളെ വിഡ്ഢികളാക്കുന്ന തരത്തിലുള്ള സംഭ്രമജനകമായ രംഗങ്ങള്‍ പകര്‍ത്തി പ്രചരിപ്പിച്ച് പൊതുസമൂഹത്തെ തെറ്റിധരിപ്പിക്കാനുള്ള ശ്രമങ്ങള്‍ നടന്നുവരികയാണ്. മോട്ടോര്‍വാഹന നിയമം ലംഘിക്കുന്നവര്‍ക്കെതിരെ മുഖം നോക്കാതെ നടപടികള്‍ തുടരുമെന്നും മന്ത്രി പറഞ്ഞു.