ഓണാഘോഷങ്ങള്‍ക്ക് പിന്നാലെ സംസ്ഥാനത്ത് നിയന്ത്രണങ്ങള്‍ കടുപ്പിക്കുമോ? മറുപടി ബുധനാഴ്ച അറിയാം. തിങ്കളാഴ്ച നടക്കേണ്ടിയിരുന്ന കോവിഡ് അവലോകന യോഗം ബുധനാഴ്ചത്തേക്ക് മാറ്റിയത് സംസ്ഥാനത്തിന്റെ കൃത്യമായ ആശങ്ക മനസ്സിലാക്കുന്നതിന് വേണ്ടിയാണ്.

ഓണം കഴിയുന്നതോടെ കൊവിഡ് കേസുകള്‍ കുത്തനെ ഉയരുമോ എന്ന ആശങ്കയിലാണ് ആരോഗ്യപ്രവര്‍ത്തകര്‍. നിയന്ത്രണങ്ങളിലും ഇളവുകളിലും ബുധനാഴ്ച നടക്കുന്ന അവലോകന യോഗത്തില്‍ തീരുമാനമുണ്ടാകും. ടിപിആര്‍ കുതിച്ചുയരുമ്പോഴും ഗുരുതരാവസ്ഥയിലുള്ള രോഗികളുടെ എണ്ണം കൂടുന്നില്ല എന്നുള്ളതാണ് ആശ്വാസകരം. അതുകൊണ്ടുതന്നെ ആശങ്കയുടെ ആവശ്യമില്ലെന്ന് പറയുന്ന ആരോഗ്യ വിദഗ്ദ്ധരും നിരവധിയുണ്ട്.

ഓണത്തിനിടയില്‍ പരിശോധന കുറയ്ക്കുക എന്ന മാനദണ്ഡമാണ് സര്‍ക്കാര്‍ സ്വീകരിച്ചത്. ജനങ്ങളെ ആവശ്യമില്ലാതെ പരിഭ്രാന്തരാക്കേണ്ടതില്ലെന്നായിരുന്നു തീരുമാനം. ഓണം പോലൊരു ആഘോഷം നടക്കുമ്പോള്‍ നിയന്ത്രണത്തില്‍ മുക്കി ജനങ്ങളെ പ്രതിസന്ധിയിലാക്കാന്‍ സര്‍ക്കാര്‍ താത്പര്യപ്പെട്ടില്ല. നിയന്ത്രണങ്ങള്‍ പോലീസിനെ ഏല്‍പ്പിച്ചെങ്കിലും ഓണ ദിവസങ്ങളില്‍ നിയന്ത്രണങ്ങളില്‍ ഇളവ് നല്‍കാന്‍ സര്‍ക്കാര്‍ പോലീസിന് നിര്‍ദ്ദേശം നല്‍കിയിരുന്നു.

സംസ്ഥാനത്ത് ഓരോ ദിവസം കഴിയുംതോറും പരിശോധനകളും വാക്‌സീനേഷനും കുറയുകയാണ്. എന്നാല്‍ ടിപിആര്‍ കുത്തനെ ഉയരുന്നു. ഓണാഘോഷങ്ങള്‍ കഴിയും മുമ്പേ പുറത്തുവരുന്ന കണക്കുകള്‍ കേരളത്തിന് ഒട്ടും ആശാവഹമല്ല. രണ്ട് ലക്ഷത്തിന് അടുത്ത് പരിശോധനകള്‍ നടന്നിരുന്ന കേരളത്തില്‍ തിരുവോണ ദിവസം നടന്നത് വെറും 96,481 പരിശോധനകളാണ്. തിരുവോണത്തിന്റെ പിറ്റേന്ന് അതിലും കുറഞ്ഞു.



അഞ്ച് ശതമാനത്തിലേക്ക് എങ്കിലും ടിപിആര്‍ കുറയ്ക്കണമെന്ന് ലക്ഷ്യമിട്ടിരുന്നിടത്ത് ടിപിആര്‍ കുതിച്ചുയര്‍ന്നത് 17.73 ശതമാനത്തിലേക്കാണ്. 30,000 ല്‍ താഴെ മാത്രമാണ് തിരുവോണദിവസം നല്‍കിയ വാക്‌സീന്‍. ഓണത്തിനുണ്ടായ തിരക്കും ഇതിലൂടെയുള്ള വ്യാപനവും മൂലം ഇനിയുള്ള ദിവസങ്ങളില്‍ കണക്കുകള്‍ ഉയരാനിടയുണ്ട്.

അതേസമയം ആശ്വാസത്തിന്റേതായ ചില വിവരങ്ങളുമുണ്ട്. 1,78,000 ത്തിലേറെ ആക്ടീവ് കേസുകളുള്ളപ്പോഴും 73 ശതമാനത്തോളം ഐസിയു കിടക്കകള്‍ ഒഴിഞ്ഞുകിടക്കുകയാണ്. രോഗവ്യാപനത്തിടയിലും ഗുരുതരമായി രോഗം ബാധിക്കുന്നവരുടെ എണ്ണം കൂടുന്നില്ലെന്നാണ് ഇത് സൂചിപ്പിക്കുന്നത്. ഇത് ആശ്വാസകരമാണ്.

ഏതായാലും നിലവിലെ ഇളവുകള്‍ വെട്ടിച്ചുരുക്കുമെന്ന കാര്യത്തില്‍ സംശയമില്ല.റ്റി പി ആര്‍ ഉയര്‍ന്നു നില്‍ക്കുന്നത് കേരളത്തിലെ കോവിഡ് സ്ഥിതി വഷളാണെന്ന പ്രതീതിയുണ്ടാക്കും. രാജ്യത്തെ മറ്റ് സംസ്ഥാനങ്ങള്‍ കോവിഡില്‍ നിന്നും അതിവേഗം മുക്തി നേടുമ്പോഴാണ് കേരളത്തില്‍ കോവിഡ് ഉയര്‍ന്നു നില്‍ക്കുന്നത്.

പക്ഷേ വാക്‌സിനേഷന്റെ കാര്യത്തില്‍ വരും ദിവസങ്ങളില്‍ വന്‍ കുതിപ്പുണ്ടാകുമെന്നാണ് കരുതുന്നത്. സര്‍ക്കാര്‍ മേഖലയിലും സ്വകാര്യ മേഖലയിലും വാക്‌സിനേഷന്റെ എണ്ണം വര്‍ധിപ്പിക്കും. കേരളത്തില്‍ ഇപ്പോഴുള്ള രോഗം ഗുരുതരമാകുന്നില്ല എന്ന സമാധാനമാണ് സര്‍ക്കാരിനുള്ളത്. വരും ദിവസങ്ങളില്‍ രോഗ തീവ്രത കുറഞ്ഞു വരുമെന്നും സര്‍ക്കാര്‍ കരുതുന്നു. അതേ സമയം പ്രതീക്ഷകളെയെല്ലാം തകിടം മറിച്ചു കൊണ്ട് രോഗം കുതിച്ചുയരുമോ എന്ന സംശയവും സര്‍ക്കാരിന് ഇല്ലാതില്ല. അതിനാലാണ് നിയന്ത്രണങ്ങള്‍ കടുപ്പിക്കുമെന്ന സാധ്യത പൂര്‍ണമായും തള്ളാത്തത്.

ഇപ്പോഴത്തെ സ്ഥിതി സര്‍ക്കാര്‍ വിശദമായി പരിശോധിക്കുന്നുണ്ട്. അതിന് ആവശ്യമായ വിദഗ്ദ്ധരുടെ സേവനവും സര്‍ക്കാരിന് ലഭിക്കുന്നുണ്ട്. വിദഗദ്ധരുടെ തീരുമാനമനുസരിച്ചായിരിക്കും മുഖ്യമന്ത്രി ബുധനാഴ്ച തീരുമാനമെടുക്കുക.