തിരയില്പ്പെട്ട മകനെ രക്ഷിക്കാന് ശ്രമിച്ച പിതാവ് കടലില് മുങ്ങിമരിച്ചു
അഴീക്കോട് മുനക്കല് ബീച്ചില് തിരയില്പ്പെട്ട മകനെ രക്ഷിക്കാന് ശ്രമിച്ച പിതാവ് കടലില് മരിച്ചു. ഇരിങ്ങാലക്കുട ക്രൈസ്റ്റ് കോളജിന് സമീപം എസ്.എന്. നഗര് സ്വദേശി പനങ്ങാട്ട് വീട്ടില് വേലായുധന്റെ മകന് ഭരതന് (50) ആണ് മരിച്ചത്.
തിങ്കളാഴ്ച വൈകീട്ട് അഞ്ച് മണിയോടെയായിരുന്നു സംഭവം. മതിലകം പുതിയകാവുള്ള സഹോദരിയുടെ വീട്ടില് ഓണമാഘോഷിക്കാന് എത്തിയതായിരുന്നു ഭരതനും കുടുംബവും. വൈകീട്ടോടെ ബന്ധുക്കളടക്കം പത്തോളം പേര് വിനോദ സഞ്ചാര കേന്ദ്രമായ അഴീക്കോട് മുനക്കലിലെത്തി. കടലില് കാര്യമായ തിരയുണ്ടായിരുന്നില്ലെങ്കിലും വെള്ളത്തിന്റെ പ്രകടമല്ലാത്ത ഉള്വലിവ് ഉണ്ടായിരുന്നു. ഇത് സംബന്ധിച്ച് തീരത്തുണ്ടായിരുന്നവര്ക്ക് മുന്നറിയിപ്പ് നല്കിയിരുന്നതായി ലൈഫ് ഗാര്ഡ് വി.സി. പ്രതാപന് പറഞ്ഞു.
തിരയില്പ്പെട്ട മൂത്ത മകന് ഹരിപ്രസാദിനെ രക്ഷിക്കാന് ഇറങ്ങിയതായിരുന്നു ഭരതനും ബന്ധുക്കളായ മറ്റു രണ്ടുപേരും. ഇതിനിടെ തിരമാലകള്ക്കിടയില്പെട്ട ഭരതനും സഹോദരിയുടെ മകന് കിരണും വെള്ളത്തില് മുങ്ങിതാഴ്ന്നു. അതേ സമയം മകനും മറ്റൊരു ബന്ധുവും സുരക്ഷിതമായി തിരിച്ച് കയറി. ലൈഫ് ഗാര്ഡുകള് ഭരതനെയും കിരണിനെയും കരക്കു കയറ്റി കൊടുങ്ങല്ലൂര് മോഡേണ് ആശുപത്രിയിലെത്തിച്ചെങ്കിലും ഭരതന് മരിച്ചിരുന്നു.
ലൈഫ് ഗാര്ഡുകളായ വി.സി. പ്രതാപന്, പി.ബി. ഉമ്മര്, മത്സ്യബന്ധന തൊഴിലാളിയായ അബു എന്നിവരാണ് രക്ഷാപ്രവര്ത്തനത്തിന് നേതൃത്വം നല്കിയത്. ഇരിങ്ങാലക്കുടയിലെ ഓട്ടോറിക്ഷ തൊഴിലാളിയാണ് ഭരതന്. ഭാര്യ: ജിനി. മക്കള്: ഹരിപ്രസാദ്, ആനന്ദ് പ്രസാദ്, അമ്ബിളി.
https://www.facebook.com/Malayalivartha
