അഫ്ഗാനിസ്ഥാനില്‍ പ്രതിഷേധിക്കാന്‍, എന്തിന് ഒന്നു ജീവിക്കാന്‍ പോലും കഴിയാത്തതിനാലാണ് പലരും ഇന്ത്യയിലേക്ക് ഒഴുകുന്നത്. എന്നാല്‍ പലപ്പോഴായി അഭയം നല്‍കിയവര്‍ക്കിട്ട് തന്നെ അഫ്ഗാന്‍ പൗരന്‍മാരുടെ പ്രതിഷേധം. ഇന്ത്യക്കാര്‍ക്കൊപ്പം അഫ്ഗാന്‍ പൗരന്മാരെയും താലിബാനില്‍ നിന്ന് രക്ഷിച്ച് രാജ്യത്തേക്ക് കൊണ്ടുവരികയാണ് ഇന്ത്യ. അതേസമയം മുന്‍പ് പലപ്പോഴായെത്തിയ അഫ്ഗാന്‍ അഭയാര്‍ത്ഥികളുടെ അപ്രതീക്ഷിത പ്രതിഷേധമാണ് ഡല്‍ഹിയില്‍ അരങ്ങേറിയത്.

വിദ്യാഭ്യാസത്തിനും ജോലിക്കും അവസരം നല്‍കുക, അല്ലെങ്കില്‍ മറ്റ് രാജ്യങ്ങളില്‍ ജീവിക്കാന്‍ വഴിയൊരുക്കുക തുടങ്ങിയ ആവശ്യങ്ങള്‍ ഉന്നയിച്ചാണ് ഡല്‍ഹിയില്‍ അഭയാര്‍ത്ഥികളുടെ പ്രശ്‌നങ്ങള്‍ കൈകാര്യംചെയ്യുന്ന യു.എന്‍ ഹൈക്കമ്മിഷനു മുന്നില്‍ സ്ത്രീകളും കുട്ടികളുമടക്കം നൂറുകണക്കിനു പേര്‍ പ്രതിഷേധിച്ചത്. ഭീകരവാദം വളര്‍ത്തുന്ന പാക്കിസ്ഥാനെതിരെയുള്ള പ്‌ളക്കാര്‍ഡുകളും അവര്‍ ഉയര്‍ത്തിയിരുന്നു.

വര്‍ഷങ്ങളായി ഡല്‍ഹിയിലും ഇന്ത്യയിലെ മറ്റു ഭാഗങ്ങളിലും കഴിയുന്ന തങ്ങള്‍ക്ക് ഇവിടെ ജോലി ചെയ്യാനോ മക്കളെ പഠിപ്പിക്കാനോ കഴിയുന്നില്ലെന്ന് അഫ്ഗാന്‍ അഭയാര്‍ത്ഥി നേതാവ് അഹമ്മദ് സിയാഗാനി പറഞ്ഞു. ഇവിടെ ഞങ്ങള്‍ ഇന്ത്യന്‍ പൗരന്‍മാരല്ല, അഭയാര്‍ത്ഥികളുമല്ല. ഇന്ത്യന്‍ വിസ ലഭിക്കാനുള്ള അഭയാര്‍ത്ഥി കാര്‍ഡും നല്‍കുന്നില്ല.

താലിബാന്‍ മടങ്ങിവന്നതോടെ, അഫ്ഗാന്‍ പൗരന്‍മാര്‍ക്ക് മതഭേദമെന്യേ ഇ വിസയ്ക്ക് അപേക്ഷിക്കാന്‍ കേന്ദ്ര സര്‍ക്കാര്‍ സൗകര്യമൊരുക്കിയിട്ടുണ്ട്. ആറു മാസക്കാലാവധിയാണ്. അതു കഴിഞ്ഞാല്‍ അവര്‍ക്കും തങ്ങളുടെ ഗതിയാകുമെന്ന് ഗനി പറയുന്നു. ഇന്ത്യയിലുള്ള 21,000 അഫ്ഗാന്‍ അഭയാര്‍ത്ഥികളില്‍ 13,000 പേര്‍ക്കും തിരിച്ചറിയല്‍ കാര്‍ഡ് പോലുമില്ല.

അഭയാര്‍ത്ഥികള്‍ക്ക് ഏറെ അവസരങ്ങളുള്ള കാനഡയിലോ യു.എസിലോ പോകാന്‍ അവസരം നല്‍കണമെന്ന് പ്രതിഷേധത്തിനെത്തിയ സാരിഫയും മസ്‌ലയും പറഞ്ഞു.

അഭയാര്‍ത്ഥികളുടെ ക്ഷേമമുറപ്പിക്കുന്ന യു.എന്‍ അഭയാര്‍ത്ഥി കണ്‍വെന്‍ഷന്‍ കരാറില്‍ ഇന്ത്യ അംഗമല്ല. കരാറില്‍ ഒപ്പിട്ട രാജ്യങ്ങളില്‍ നിന്നുള്ള അഭയാര്‍ത്ഥികള്‍ക്ക് ഐക്യരാഷ്ട്രസഭയുടെ തിരിച്ചറിയല്‍ കാര്‍ഡ് ലഭിക്കും. ഇതുവച്ച്, ഏത് രാജ്യത്താണോ അവിടെ പഠിക്കാനും ജോലി ചെയ്യാനും കഴിയും.

അഫ്ഗാന്‍ മുന്‍ പ്രസിഡന്റ് ഹമീദ് കര്‍സായ്, സമാധാന ചര്‍ച്ചയ്ക്ക് നേതൃത്വം നല്‍കുന്ന അബ്ദുല്ല അബ്ദുല്ല തുടങ്ങിയവരുടെ കുടുംബങ്ങള്‍ ഇന്ത്യയിലാണ്. കര്‍സായിയും നിരവധി വര്‍ഷം ഇന്ത്യയിലായിരുന്നു.

അയല്‍ രാജ്യങ്ങളിലെ മുസ്‌ളിങ്ങള്‍ ഒഴികെയുള്ള ഇന്ത്യന്‍ വംശജര്‍ക്ക് പൗരത്വം ഉറപ്പാക്കുന്ന ദേശീയ പൗരത്വ ഭേദഗതി നിയമം നടപ്പാക്കാന്‍ അഫ്ഗാനിസ്ഥാനിലെ പുതിയ സാഹചര്യം പ്രയോജനപ്പെടുമെന്ന് കേന്ദ്രസര്‍ക്കാര്‍ കരുതുന്നു. കാബൂളില്‍ കുടുങ്ങിയ ഇന്ത്യക്കാര്‍ക്ക് പുറമെ അഫ്ഗാന്‍ പൗരന്‍മാരായ സിക്ക്, ഹിന്ദു വംശജരെ കൊണ്ടുവരാനും കേന്ദ്രം മുന്‍തൂക്കം നല്‍കുന്നുണ്ട്.

അതേസമയം മരണം മുന്നില്‍ കണ്ട മണിക്കൂറുകളും ദിവസങ്ങള്‍ നീണ്ട കാത്തിരിപ്പിനുമൊടുവില്‍ അഫ്ഗാനിസ്ഥാനില്‍ നിന്ന് വീട്ടില്‍ തിരിച്ചെത്തിയ ആഹ്ലാദത്തിലാണ് തലശ്ശേരി സ്വദേശിയായ ദിദില്‍ രാജീവ്. കണ്ണൂരില്‍ വിമാനമിറങ്ങിയ ദിദില്‍ ഉച്ചയോടെയാണ് തലശ്ശേരി മാടപ്പീടികയിലെ വസതിയായ ചക്കരാലയത്തില്‍ എത്തിയത്.

അമ്മ ശാന്തിനിയും ബന്ധുക്കളുമെല്ലാം ദിദിലിന്റെ വരവും കാത്ത് വഴിക്കണ്ണുമായി ഇരിപ്പുണ്ടായിരുന്നു. കഴിഞ്ഞ ദിവസമാണ് ദിദില്‍ അടക്കമുള്ളവര്‍ ഡല്‍ഹിയില്‍ എത്തിയത്. പ്രത്യേക വിമാനത്തില്‍ ഗോവ വഴി ഇന്നലെ ഉച്ചയോടെ കണ്ണൂര്‍ വിമാനത്താവളത്തിലെത്തി.