അഫ്ഗാന്‍ പിടിച്ചെടുത്തെങ്കിലും കീഴടങ്ങാന്‍ തയ്യാറാകാതെ പൊരുതുകയാണ് പഞ്ച്ശീറും പ്രതിരോധ സേനയും. അന്തരിച്ച പ്രതിരോധ സേന തലവനായ അഹ്മദ് ഷാ മസൂദിന്റെ മകന്‍ അഹ്മദ് മസൂദാണ് പ്രതിരോധ സേനയെ നയിക്കുന്നത്. പഞ്ച്ശീര്‍ താഴ്‌വര ആസ്ഥാനമാക്കി ഇവര്‍ നടത്തുന്ന പ്രതിരോധം താലിബാന് തലവേദനയാണ്.

മുന്‍പ് ബാനോ, ദെഹ് സലെ, പുല്‍ഇഹെസാര്‍ എന്നീ ജില്ലകള്‍ പ്രതിരോധ സേന പിടിച്ചെടുത്തിരുന്നു. എന്നാല്‍ തിങ്കളാഴ്ച കടുത്ത പോരാട്ടത്തിലൂടെ താലിബാന്‍ ഇവിടെ നിയന്ത്രണം തിരികെ പിടിച്ചു. അന്തരാബ് മേഖലയില്‍ താലിബാനുമായി പ്രതിരോധ സേന ഇപ്പോഴും പോരാട്ടം തുടരുകയാണ്.

ബാനോ ജില്ലയില്‍ നടന്ന ഏറ്റുമുട്ടലില്‍ താലിബാന്‍ ജില്ലാ മേധാവിയും രണ്ട് സഹായികളും ഉള്‍പ്പടെ 50 താലിബാന്‍ പ്രവര്‍ത്തകരെയാണ് പ്രതിരോധ സേന വകവരുത്തിയത്. 20 പേരെയെങ്കിലും തടവിലാക്കി. അതേ സമയം ഈ പോരാട്ടത്തില്‍ പ്രതിരോധ സേനയുടെ ഒരാള്‍ മരിക്കുകയും ആറുപേര്‍ക്ക് പരിക്കേല്‍ക്കുകയും ചെയ്തു. ഓഗസ്റ്റ് 15ന് അധികാരം താലിബാന്‍ പിടിച്ച ശേഷം നടന്ന ആദ്യ ആഭ്യന്തര പ്രതിരോധമായിരുന്നു പ്രതിരോധ സേന നടത്തിയത്.

അഫ്ഗാനില്‍ സര്‍ക്കാര്‍ രൂപീകരിക്കാന്‍ ചര്‍ച്ചകള്‍ നടത്താന്‍ ആവശ്യപ്പെട്ടെങ്കിലും പഞ്ച്ശീര്‍ താഴ്‌വരയില്‍ താലിബാന്‍ കടന്നുവന്നാല്‍ ശക്തമായി തിരിച്ചടിക്കുമെന്നാണ് അഹ്മദ് മസൂദ് അറിയിച്ചത്. താലിബാന്റെ നൂറുകണക്കിന് പോരാളികള്‍ ഇവിടേക്ക് നീങ്ങിയതായാണ് താലിബാന്‍ മുന്‍പ് നല്‍കിയ വിവരം.

അതേസമയം താലിബാന്‍ പഞ്ച്ഷിറിലേക്ക് കടന്നാല്‍ കൈയുംകെട്ടി നോക്കി നില്‍ക്കില്ലെന്ന് അഹമ്മദ് മസൂദ് പറഞ്ഞു. പഞ്ച്ഷിര്‍ ആര്‍ക്ക് മുന്നിലും കീഴടങ്ങിയിട്ടില്ലെന്ന് ആവര്‍ത്തിച്ച അദ്ദേഹം താലിബാന്റെ മുന്നില്‍ തലകുനിക്കില്ലെന്നും കൂട്ടിച്ചേര്‍ത്തു. സോവിയറ്റ് വിരുദ്ധ മുജാഹിദീന്‍ കമാന്‍ഡര്‍ അഹമ്മദ് ഷാ മസൂദിന്റെ മകനായ അഹമ്മദ് മസൂദ്, തനിക്കൊരു യുദ്ധത്തിന് താല്‍പര്യമില്ലെന്നും അഭിപ്രായപ്പെട്ടു.

താലിബാന്‍ അഹമ്മദ് മസൂദിയുമായി ചര്‍ച്ചകള്‍ നടത്തിയതായും അഭ്യൂഹങ്ങളുണ്ട്. ഞായറാഴ്ച പുറത്ത് വരുന്ന റിപ്പോര്‍ട്ടുകള്‍ പ്രകാരം താലിബാന്‍ അഹമ്മദ് മസൂദിയുമായി നടത്തിയ ചര്‍ച്ച പരാജയപ്പെട്ടതായും നൂറ് കണക്കിന് താലിബാന്‍ പോരാളികള്‍ പഞ്ച്ഷിറിലേക്ക് പുറപ്പെട്ടതായും സൂചന നല്‍കുന്നുണ്ടെങ്കിലും യാതൊരു അക്രമസംഭവങ്ങളും പഞ്ച്ഷിറില്‍ ഇതുവരെ റിപ്പോര്‍ട്ട് ചെയ്തിട്ടില്ല.

എന്നാല്‍ വടക്കന്‍ അഫ്ഗാനിസ്താനിലെ മൂന്ന് ജില്ലകള്‍ താലിബാന്‍ തിരിച്ചുപിടിച്ചു. പ്രാദേശിക സേനയുമായുള്ള പോരാട്ടത്തില്‍ കഴിഞ്ഞയാഴ്ച നഷ്ടമായ മൂന്ന് ജില്ലകളാണ് താലിബാന്‍ വീണ്ടും പിടിച്ചെടുത്തത്. പഞ്ച്ഷിര്‍ താലിബാന് ഇപ്പോഴും കിട്ടാക്കനിയായി തുടരുകയാണ്. അഹമ്മദ് മസൂദിനെ പിന്തുണച്ചുള്ള പടയാണ് നിലവില്‍ പഞ്ച്ഷിറിലുള്ളത്. ബഗ്‌ലാന്‍ പ്രവിശ്യയിലെ ബനോ, ദെഹ് സലേഹ്, പുല്‍ ഇ ഹെസാര്‍ എന്നീ ജില്ലകളുടെ നിയന്ത്രണം ഏറ്റെടുത്തതായി താലിബാന്‍ വൃത്തങ്ങള്‍ തന്നെ അറിയിച്ചിട്ടുണ്ട്.

പഞ്ച്ഷിര്‍ താഴ് വരയ്ക്ക് സമീപം ബാദഖ്‌സ്താന്‍, തഖാര്‍, അന്ദറാബ് എന്നിവിടങ്ങളില്‍ പോരാളികളെ വിന്യസിച്ചതായി താലിബാന്‍ വക്താവ് സബീയുള്ള മുജാഹിദ് അറിയിച്ചു. പിരിച്ചുവിട്ട അഫ്ഗാന്‍ സൈന്യത്തിലെ ഏതാനും പട്ടാളക്കാരും ചില ഉദ്യോഗസ്ഥരും പഞ്ച്ഷിറില്‍ താലിബാനെ തടയാന്‍ കൈകോര്‍ത്തിട്ടുണ്ട്.

അതേസമയം പഞ്ച്ഷിറില്‍ താലിബാനെ പ്രതിരോധിക്കാന്‍ നേതൃത്വം നല്‍കുന്നവരുടെ കൂട്ടത്തില്‍ അഷ്‌റഫ് ഗനി ഭരണകൂടത്തിലെ ആദ്യ വൈസ് പ്രസിഡന്റ് അമറുല്ല സലായുമുണ്ട്. അഫ്ഗാന്‍ ഭരണഘടന പ്രകാരം അഷ്‌റഫ് ഗനിയുടെ അസാന്നിധ്യത്തില്‍ നിയമാനുസൃതമായ പ്രസിഡന്റ് താനാണെന്ന് അദ്ദേഹം ട്വിറ്ററില്‍ അവകാശപ്പെടുകയും ചെയ്തിരുന്നു.