ഉദ്യോഗസ്ഥര്ക്കെതിരെ നടപടി... ലഹരിക്കേസ് അട്ടിമറിച്ച സംഭവത്തില് എക്സൈസ് ഉദ്യോഗസ്ഥര്ക്കെതിരെ നടപടി; സസ്പെന്ഷന് മുതല് സ്ഥലംമാറ്റം വരെ; എക്സൈസ് എന്ഫോഴ്സ്മെന്റ് ആന്ഡ് ആന്റി നര്കോട്ടിക് സ്പെഷല് സ്ക്വാഡ് ഇന്സ്പെക്ടര് എന്. ശങ്കറിനെ സസ്പെന്ഡ് ചെയ്തു
സിനിമയില് കാണുന്ന സ്പിരിറ്റ് ആവിയാകുന്ന പോലെ പ്രതികള് ആവിയാകുന്ന കാഴ്ചയാണ് മലയാളികള് കഴിഞ്ഞ ദിവസം കണ്ടത്. രണ്ട് പ്രതികളാണ് ആവിയായത്. സംഭവത്തിന്റെ കഥകള് ഒന്നൊന്നായി സോഷ്യല്മീഡിയ മെനഞ്ഞപ്പോള് മുങ്ങിയവര് പൊങ്ങുമെന്നുറപ്പായി. മാത്രമല്ല മുങ്ങാന് സഹായിച്ചവര്ക്കെതിരെ നടപടിയും വന്നു.
കൊച്ചി ലഹരിക്കേസ് അട്ടിമറിച്ച സംഭവത്തില് എക്സൈസ് ഉദ്യോഗസ്ഥര്ക്കെതിരെ നടപടി. മഹസര് എഴുതിയതിലും കേസ് റജിസ്റ്റര് ചെയ്തതിലും വീഴ്ച വരുത്തുകയും 2 പ്രതികളെ ഒഴിവാക്കുകയും ചെയ്ത എറണാകുളം എക്സൈസ് എന്ഫോഴ്സ്മെന്റ് ആന്ഡ് ആന്റി നര്കോട്ടിക് സ്പെഷല് സ്ക്വാഡ് ഇന്സ്പെക്ടര് എന്. ശങ്കറിനെ സസ്പെന്ഡ് ചെയ്തു. പ്രിവന്റീവ് ഓഫിസര് കെ.എസ്. പ്രമോദിനെ മലപ്പുറത്തേക്കും സിഇഒ എം.എസ്. ശിവകുമാറിനെ ആലപ്പുഴയ്ക്കും സിഇഒ എം.എ. മേല്നോട്ടച്ചുമതലയുണ്ടായിരുന്ന സ്ക്വാഡ് സര്ക്കിള് ഇന്സ്പെക്ടര് ജി.വിനോജിനെ കാസര്കോട് വെള്ളരിക്കുണ്ടിലേക്കു സ്ഥലം മാറ്റി. സ്ക്വാഡിലെ ഒരു പ്രിവന്റീവ് ഓഫിസറെയും 2 സിവില് എക്സൈസ് ഓഫിസര്മാരെയും എറണാകുളം ജില്ലയ്ക്കു പുറത്തേക്കു മാറ്റി. ഷിബുവിനെ തൃശൂരിലേക്കുമാണു മാറ്റിയത്.
അഡീഷനല് എക്സൈസ് കമ്മിഷണര് അബ്ദുല് റാഷി നല്കിയ പ്രാഥമിക റിപ്പോര്ട്ടിന്റെ അടിസ്ഥാനത്തില് എക്സൈസ് കമ്മിഷണര് എസ്. ആനന്ദകൃഷ്ണനാണു നടപടിയെടുത്തത്. വകുപ്പിന്റെ വിശ്വാസ്യതയ്ക്കു മങ്ങലേല്പിക്കാന് ഉദ്യോഗസ്ഥരുടെ പ്രവൃത്തി കാരണമായെന്ന പരാമര്ശത്തോടെയാണു നടപടി.
നടപടിക്രമങ്ങളില് ഉദ്യോഗസ്ഥര്ക്കു വീഴ്ചയുണ്ടായെന്ന കുറ്റപ്പെടുത്തല് മാത്രമാണ് അന്വേഷണ റിപ്പോര്ട്ടിലുള്ളത്. മനഃപൂര്വം കേസ് അട്ടിമറിക്കാനുള്ള ശ്രമം നടത്തിയില്ലെന്നു റിപ്പോര്ട്ടില് പറയുന്നു. ഒരു കേസിനെത്തുടര്ന്ന്, അതേ സ്ഥലത്തു നടത്തിയ റിക്കവറി മറ്റൊരു കേസായി റജിസ്റ്റര് ചെയ്തതിന്റെ നിയമസാധുത പരിശോധിക്കണമെന്നും റിപ്പോര്ട്ട് ശുപാര്ശ ചെയ്യുന്നു. വിശദമായ അന്വേഷണം വേണമെന്ന് എക്സൈസ് വകുപ്പ് നിര്ദേശിച്ചിട്ടുണ്ട്.
കാക്കനാട്ടെ ഫ്ലാറ്റില്നിന്ന് കസ്റ്റംസ് പ്രിവന്റീവ് വിഭാഗവും എക്സൈസ് എന്ഫോഴ്സ്മെന്റ് സ്ക്വാഡും ചേര്ന്നാണ് 84 ഗ്രാം എംഡിഎംഎയുമായി ഏഴംഗ സംഘത്തെ പിടികൂടിയത്. കേസ് റജിസ്റ്റര് ചെയ്യാനായി പ്രതികളെയും തൊണ്ടിമുതലും എറണാകുളത്തെ സ്ക്വാഡിനു കൈമാറി. പ്രതികളെ ചോദ്യം ചെയ്തപ്പോള് ലഭിച്ച വിവരത്തിന്റെ അടിസ്ഥാനത്തില് അന്നു തന്നെ ഇതേ ഫ്ലാറ്റില് പരിശോധന നടത്തി 1.115 കിലോഗ്രാം എംഡിഎംഎ കൂടി ഇന്സ്പെക്ടര് ശങ്കറിന്റെ നേതൃത്വത്തില് എറണാകുളത്തെ സ്ക്വാഡ് പിടികൂടി. എന്നാല് രണ്ടാമത്തെ കേസ് പ്രതികളും സാക്ഷികളുമില്ലാത്ത അണ് ഡിറ്റക്റ്റഡ് കേസായി എഴുതുകയും 2 പ്രതികളെ ആദ്യ കേസില്നിന്ന് ഒഴിവാക്കുകയും ചെയ്തു. മാന്കൊമ്പ് ഉള്പ്പെടെ ഫ്ലാറ്റില്നിന്നു കണ്ടെത്തിയ പല വസ്തുക്കളും മഹസറില് ചേര്ത്തതുമില്ല.
7 വീഴ്ചകളാണ് ചൂണ്ടിക്കാട്ടുന്നത്. 2 പ്രതികളെ ചോദ്യം ചെയ്യാതെ വിട്ടയച്ചു. പിടിച്ച പണം കൃത്യമായി തിട്ടപ്പെടുത്തി സൂക്ഷിച്ചില്ല. 7 പ്രതികളില്നിന്നായി 9 ഫോണുകള് പിടിച്ചെടുത്തെങ്കിലും അഞ്ചെണ്ണം പരിശോധിക്കാതെ വിട്ടുകൊടുത്തു. പിടിച്ചെടുത്ത മാന്കൊമ്പ് മഹസറില് രേഖപ്പെടുത്തിയില്ല. ഫ്ലാറ്റിലുണ്ടായിരുന്ന, പ്രതികളുടെ ലാപ്ടോപ് പിടിച്ചെടുത്തില്ല. ആദ്യ കേസ് റജിസ്റ്റര് ചെയ്ത ഉടന് ഫ്ലാറ്റില്നിന്ന് മുഴുവന് ലഹരിയും കണ്ടെടുക്കാന് ശ്രമിച്ചില്ല. അതീവ ശ്രദ്ധയോടെയും നിയമം പാലിച്ചും കേസ് അന്വേഷിക്കണമെന്ന ജോയിന്റ് എക്സൈസ് കമ്മിഷണറുടെ നിര്ദേശം പാലിച്ചില്ല.
https://www.facebook.com/Malayalivartha
