കോണ്‍ഗ്രസില്‍നിന്നു പുറത്താക്കപ്പെട്ട മുന്‍ കെപിസിസി സെക്രട്ടറി പി.എസ്. പ്രശാന്ത് സിപിഎമ്മില്‍ ചേര്‍ന്നതോടെ കോണ്‍ഗ്രസ് ഹൈക്കമാന്‍ഡിന് കാര്യം പിടികിട്ടി. ഇനിയും അച്ചടക്കം പുറത്തെടുത്താല്‍ പാര്‍ട്ടിയില്‍ ആരും കാണില്ല. പാര്‍ട്ടി ആക്ടിങ് സെക്രട്ടറി എ.വിജയരാഘവനാണ് എകെജി സെന്ററിലെ വാര്‍ത്താ സമ്മേളനത്തിനിടെ പ്രശാന്തിന്റെ പാര്‍ട്ടി പ്രവേശന കാര്യം അറിയിച്ചത്. വാര്‍ത്താ സമ്മേളനം നടക്കുന്ന ഹാളില്‍ ജില്ലാ സെക്രട്ടറി ആനാവൂര്‍ നാഗപ്പന്‍ ഉള്‍പ്പെടെയുള്ള ജില്ലാ നേതാക്കളോടൊപ്പവും എത്തിയ പ്രശാന്തിനെ എ.വിജയരാഘവന്‍ സ്വീകരിച്ചു.

അതേസമയം ഡിസിസി പ്രസിഡന്റുമാരുടെ പട്ടിക സംബന്ധിച്ചു കോണ്‍ഗ്രസില്‍ പോരു മുറുകവേ, പ്രശ്‌നപരിഹാരത്തിനു വഴി തേടി സംസ്ഥാനത്തിന്റെ ചുമതലയുള്ള എഐസിസി ജനറല്‍ സെക്രട്ടറി താരിഖ് അന്‍വര്‍ ഈ മാസം എട്ടിനു തിരുവനന്തപുരത്തെത്തും. കെപിസിസി നേതൃത്വം പട്ടിക തയാറാക്കിയ രീതിയില്‍ അമര്‍ഷമുള്ള ഉമ്മന്‍ ചാണ്ടിയും രമേശ് ചെന്നിത്തലയുമായി അദ്ദേഹം കൂടിക്കാഴ്ച നടത്തും. പുതുതായി നിയമിതരായ ഡിസിസി പ്രസിഡന്റുമാരുടെ യോഗത്തിലും പങ്കെടുക്കും.

പ്രതിഷേധം തുടരുന്ന ഉമ്മന്‍ ചാണ്ടിയെയും ചെന്നിത്തലയെയും അനുനയിപ്പിക്കാനും ഇരുവരെയും വിശ്വാസത്തിലെടുത്ത് ഒപ്പം നിര്‍ത്താനുമുള്ള ഹൈക്കമാന്‍ഡ് ദൗത്യവുമായാണു താരിഖ് കേരളത്തിലെത്തുക. ഡിസിസി പ്രസിഡന്റുമാരുടെ കാര്യത്തിലുണ്ടായ തര്‍ക്കം ഇനി നടക്കാനിരിക്കുന്ന കെപിസിസി, ഡിസിസി ഭാരവാഹികളുടെ പുനഃസംഘടനയില്‍ ആവര്‍ത്തിക്കരുതെന്നാണു രാഹുല്‍ ഗാന്ധിയുടെ നിര്‍ദേശം. ഇരു നേതാക്കളുടെയും അഭിപ്രായങ്ങള്‍ കൂടി ഉള്‍ക്കൊണ്ടു പുനഃസംഘടന നടപ്പാക്കാനുള്ള വഴി താരിഖ് തേടും. ഇതുസംബന്ധിച്ച പ്രാഥമിക ചര്‍ച്ചകള്‍ കെപിസിസി നേതൃത്വവുമായി അദ്ദേഹം നടത്തും.

അതേസമയം, ഡിസിസി പ്രസിഡന്റുമാരെ തീരുമാനിച്ച ചര്‍ച്ചകളില്‍ താരിഖ് കാര്യക്ഷമമായി ഇടപെട്ടില്ലെന്ന പരാതി ഗ്രൂപ്പുകള്‍ക്കുണ്ട്. അദ്ദേഹത്തിനെതിരെ പാര്‍ട്ടി പ്രസിഡന്റ് സോണിയ ഗാന്ധിക്കു പരാതി അയയ്ക്കാനും ഗ്രൂപ്പുകള്‍ ആലോചിക്കുന്നു. പ്രശ്‌നങ്ങളുടെ കാരണക്കാരിലൊരാള്‍ എന്ന ആരോപണം നേരിടുന്ന താരിഖ് നേരിട്ടെത്തുമ്പോള്‍, ഗ്രൂപ്പ് പ്രതിനിധികളുടെ സമീപനം ദേശീയ, സംസ്ഥാന നേതൃത്വങ്ങള്‍ ഉറ്റുനോക്കും.

അതേസമയം മുന്‍ പ്രതിപക്ഷ നേതാവ് രമേശ് ചെന്നിത്തലയുടേത് കടന്ന പ്രതികരണമെന്ന് കെപിസിസി വര്‍ക്കിങ് പ്രസിഡന്റ് ടി.സിദ്ദിഖ്. സംയമനം പാലിക്കുന്നതിനുപകരം ആരും എരിതീയില്‍ എണ്ണയൊഴിക്കരുത്. പാര്‍ട്ടിയിലെ ഐക്യം തകര്‍ക്കുന്ന പ്രസ്താവനകള്‍ ഒഴിവാക്കണമായിരുന്നുവെന്നും സിദ്ദിഖ് ടിവി ചാനല്‍ പരിപാടിയില്‍ പറഞ്ഞു.

എ ഗ്രൂപ്പ് നോമിനിയെ ഒഴിവാക്കി കോഴിക്കോട് ഡിസിസി പ്രസിഡന്റായി പ്രവീണ്‍കുമാറിനെ നിയമിച്ചതിനുപിന്നില്‍ തന്റെ പ്രധാന പങ്കുമുണ്ട്. പലരെയും പോലെ താനും തുണച്ചത് പ്രവീണിനെയാണ്. ഗ്രൂപ്പല്ല പരിഗണിച്ചത്. ജില്ലയില്‍ പാര്‍ട്ടിയെ നയിക്കാന്‍ കരുത്തുറ്റയാള്‍ പ്രവീണാണെന്ന ബോധ്യത്തിന്റെ അടിസ്ഥാനത്തിലായിരുന്നു പിന്തുണ.

തന്റെ കെപിസിസി വര്‍ക്കിങ് പ്രസിഡന്റ് സ്ഥാനം ഗ്രൂപ്പ് നിയമനമല്ല. മലബാര്‍ രാഷ്ട്രീയംകൂടി പരിഗണിച്ച് കേന്ദ്രനേതൃത്വം കൂടിയാലോചിച്ചാണ് ഇക്കാര്യത്തില്‍ തീരുമാനമെടുത്തത്. എ.കെ.ആന്റണിയും രാഹുല്‍ ഗാന്ധിയും അടക്കം ആ ചര്‍ച്ചയില്‍ പങ്കെടുത്തു. വര്‍ക്കിങ് പ്രസിഡന്റ് ആയിക്കഴിഞ്ഞപ്പോള്‍ കനത്ത ആക്രമണമാണ് പാര്‍ട്ടിയില്‍നിന്നു നേരിട്ടതെന്നും സിദ്ദിഖ് പറഞ്ഞു.