കറുത്ത ഞായറാഴ്ചയുടെ മൂകമായ പകല്, മഴ മങ്ങിയ കരച്ചിലായി വീണ വഴിയിലൂടെ അവന്റെ മൃതദേഹവുമായി ആംബുലന്സ്.... പൊലീസ് വിജനമാക്കിവെച്ച വഴികള് അവന് കണ്ണീര്പൂക്കള് അര്പ്പിച്ചു...!! അകലങ്ങളില് നിന്ന് ആരൊക്കയോ അവന്റെ അവസാന യാത്രാരംഗങ്ങള് ഒപ്പിയെടുക്കുന്നു; ഈ നിപ മരണം അവസാനത്തേതായിരിക്കണേ എന്ന പ്രാര്ഥനയോടെ.... മകനേ.. നീ ഈ തീരത്ത് ഒരു പുഞ്ചിരിയായുറങ്ങൂ...!!
ചാറ്റല് മഴ നനയാതിരിക്കാന് നീല മേലാപ്പിന് ചുവട്ടില് അവനായൊരുങ്ങിയ ഖബറിടം രാവിലെ മുതല് കാത്തു നില്പാണ്. ഓമനത്തം മാറാത്ത പിഞ്ചുമോന്റെ ചലനമറ്റ ശരീരം ഏറ്റുവാങ്ങാന്... പൊലീസും മാധ്യമ പ്രവര്ത്തകരും അവിടവിടെ വട്ടം കൂടി നില്ക്കുന്നു. ഓര്മകളില് 2018ലെ നിപകാലം മിന്നി മറിയുന്നു.
കണ്ണംപറമ്പ് പള്ളിയുടെ മിനാരങ്ങളും അറബിക്കടലിലെ തിരമാലകളും ഈ നാടിന് വേണ്ടി പ്രാര്ഥിക്കും പോലെ.... ഈ കളിചിരി മാറാത്ത മകന്റെ ജീവനെടുത്ത കൊലയാളി വൈറസ് ഈയൊരു മരണത്തില് അവസാനിക്കണേ എന്ന പ്രാര്ഥന, ഈ നിപ മരണം അവസാനത്തേതായിരിക്കണേ എന്ന പ്രാര്ഥന...
കറുത്ത ഞായറാഴ്ചയുടെ മൂകമായ പകല്. മഴ മങ്ങിയ കരച്ചിലായി വീണ വഴിയിലൂടെ അവന്റെ മൃതദേഹവുമായി ആംബുലന്സ് കുതിച്ചു വന്നു. പൊലീസ് വിജനമാക്കിവെച്ച വഴികള് അവന് കണ്ണീര്പൂക്കള് അര്പ്പിച്ചു.
കണ്ണംപറമ്പ് ശ്മശാനത്തിന്റെ കവാടത്തിലേക്ക് കയറി ആംബുലന്സ്. അകലങ്ങളില് നിന്ന് ആരൊക്കയോ അവന്റെ അവസാന യാത്രാരംഗങ്ങള് ഒപ്പിയെടുക്കുന്നു. മാലാഖമാരെ പോലെ പി. പി.ഇ കിറ്റ് ധരിച്ച ആരോഗ്യപ്രവര്ത്തകര് അവന്റെ അന്ത്യപരിപാലനങ്ങളില് മൊഴുകുന്നു.
2018 ലെ നിപ ദുരന്തത്തില് മരിച്ചയാളുടെ ഖബറിനരികിലേക്ക് അവന്റെ പിഞ്ചുദേഹം ആരോഗ്യപ്രവര്ത്തകര് ആദരപൂര്വം എത്തിച്ചു. അതിന് അടുത്ത് വിരലിലെണ്ണാവുന്ന ബന്ധുക്കള് അകലം പാലിച്ച് പൊന്നുമോനായി മയ്യിത്ത് നിസ്കരിച്ചു. 12.15 ഓടെ അവനെ മണ്ണിനടിയിലൊളിപ്പിച്ച് അവര് കൈകൂപ്പി.
അച്ചടക്കം പാലിച്ച് നിരയൊപ്പിച്ച് കിടക്കുന്ന മീസാന് കല്ലുകള് ഹാഷിമിന് സലാം ചൊല്ലുന്ന പോലെ. അകലെ കണ്ണീരൊഴുക്കി നിന്ന മനുഷ്യന്മാര് കരളുരുകി പ്രാര്ഥിച്ചു.
കടല് വിങ്ങുന്ന കരയെ ആശ്വസിപ്പിച്ചു..... അവന് മരിച്ച ഉടന് സാമൂഹിക മാധ്യമത്തില് ഒഴുകിയ ചിത്രം അറബിക്കടലിന്റെ തീരത്തോട് ചേര്ന്ന് നേര്ത്ത പുഞ്ചിരിയുമായിരിക്കുന്നതായിരുന്നു. ആ പുഞ്ചിരി ഇനിയും ഈ അറബിക്കടലിന്റെ ഓരം ചേര്ന്നു കിടന്നോട്ടെ.... ഓര്മകളില് അവന് പ്രാര്ഥനായി മാറട്ടെ...
https://www.facebook.com/Malayalivartha
