വിസ്മയ ആത്മഹത്യ ചെയ്ത സംഭവത്തില് കുറ്റപത്രം സമര്പ്പിച്ച് പോലീസ്... ആത്മഹത്യ ചെയ്യുമെന്ന് പറഞ്ഞിട്ടും കിരണ്കുമാര് പീഡനം തുടര്ന്നു....കിരണ്കുമാറിന് ജയിലില് കഴിഞ്ഞുതന്നെ വിചാരണ നേരിടേണ്ടി വരും
സ്ത്രീധന പീഡനത്തെ തുടര്ന്ന് വിസ്മയ ഭര്തൃഗൃഹത്തില് ആത്മഹത്യ ചെയ്ത സംഭവത്തില് കുറ്റപത്രം സമര്പ്പിച്ച് പൊലീസ്. ആത്മഹത്യ ചെയ്യുമെന്ന് പറഞ്ഞിട്ടും കിരണ്കുമാര് പീഡനം തുടര്ന്നുവെന്ന് ശാസ്താംകോട്ട ജുഡിഷ്യല് ഫസ്റ്റ് ക്ലാസ് മജിസ്ട്രേറ്റ് കോടതിയില് സമര്പ്പിച്ച കുറ്റപത്രത്തില് പറയുന്നു.
കൂടുതല് സ്ത്രീധനം കിട്ടുമെന്ന പ്രതീക്ഷയിലാണ് മോട്ടോര് വാഹന വകുപ്പില് എ.എം.വി.ഐ ആയിരുന്ന കിരണ്കുമാര് വിസ്മയയെ വിവാഹം കഴിച്ചത്. പക്ഷെ പ്രതീക്ഷിച്ച സ്ത്രീധനം കിട്ടാതെ വന്നതോടെ വിസ്മയയെ മാനസികമായും ശാരീരികമായും പീഡിപ്പിക്കാന് തുടങ്ങി. പ്രധാനകാരണം സ്ത്രീധനമായി കിട്ടിയ കാര് ഇഷ്ടപ്പെടാത്തതായിരുന്നു.
2020 ആഗസ്റ്റ് 29ന് കിഴക്കേകല്ലടയില്വച്ചും 2021 ജനുവരി 2ന് വിസ്മയയുടെ വീടിന് മുന്നില്വച്ചും കിരണ്കുമാര് സ്ത്രീധനവുമായി ബന്ധപ്പെട്ട അതൃപ്തി പ്രദേശവാസികള് നോക്കിനില്ക്കെ പ്രകടപ്പിച്ചു. ഇതോടെ താന് ആത്മഹത്യ ചെയ്യുമെന്ന് വിസ്മയ പറഞ്ഞിട്ടും കിരണ് വീണ്ടും പീഡിപ്പിച്ചു.
കിരണ്കുമാറിന്റെ പീഡനങ്ങളെക്കുറിച്ച് വിസ്മയ അയച്ച വാട്സ്ആപ്പ് സന്ദേശങ്ങള് ബന്ധുക്കളുടെയും കൂട്ടുകാരുടെയും ഫോണുകളില് നിന്ന് കണ്ടെടുത്തിട്ടുണ്ട്. 'രക്ഷിക്കണം' എന്ന വിസ്മയയുടെ സന്ദേശം കിരണ്കുമാറിന്റെ സഹോദരി കീര്ത്തിയുടെ ഫോണില് നിന്ന് ലഭിച്ചു. കിരണ്കുമാറില് നിന്നുള്ള പീഡനങ്ങളെക്കുറിച്ച് വിസ്മയ വിവരിച്ചിരുന്നതായി മെന്റലിസ്റ്റിന്റെ മൊഴിയുണ്ട്.
അതേസമയം, വിസ്മയയുടേത് കൊലപാതമാണെന്ന ആരോപണത്തിന് തെളിവില്ല. ദക്ഷിണമേഖല ഐ.ജി ഹര്ഷിത അട്ടല്ലൂരി, കൊല്ലം റൂറല് എസ്.പി കെ.ബി. രവി എന്നിവരുടെ നേതൃത്വത്തില് നടന്ന അന്വേഷണത്തിന്റെ കുറ്റപത്രം ശാസ്താംകോട്ട ഡിവൈ.എസ്.പി പി. രാജ്കുമാറാണ് സമര്പ്പിച്ചത്.
കഴിഞ്ഞ ജൂണ് 21ന് പുലര്ച്ചെ 3നാണ് വിസ്മയയെ കിരണ്കുമാറിന്റെ പോരുവഴി കിഴക്കുംഭാഗത്തെ വസതിയായ ചന്ദ്രഭവനത്തിലെ ശൗചാലയത്തില് തൂങ്ങിമരിച്ച നിലയില് കണ്ടെത്തിയത്.
സംഭവ ദിവസം തന്നെ അറസ്റ്റിലായ കിരണ്കുമാര് ഇപ്പോഴും ജയിലിലാണ്. 80-ാം ദിവസം കുറ്റപത്രം സമര്പ്പിച്ചതിനാല് കിരണ്കുമാറിന് ജയിലില് കഴിഞ്ഞുതന്നെ വിചാരണ നേരിടേണ്ടിവരും.
https://www.facebook.com/Malayalivartha