മരടിൽ യോഗ ക്ലാസ്സിന്റെ മറവിൽ ലൈംഗിക പീഡനം. യുവതിയുടെ പരാതിയിന്മേൽ യുവാവിനെ അറസ്റ്റ് ചെയ്തു. നിരവത്ത് റോഡിലെ 'ബോധി ധര്‍മ്മ സ്കൂള്‍ ഓഫ് ആര്‍ട്സ്' ഉടമ മലപ്പുറം പൊന്നാനി സ്വദേശി രഞ്ജിത്ത് (39) ആണ് മരട് പൊലിസ് അറസ്റ്റ് ചെയ്തത്.

സംഭവത്തിന് ശേഷം പ്രതി നാട്ടിലേക്ക്​ പോയതായി വിവരം ലഭിച്ചതിനെ തുടര്‍ന്ന് മരട് പോലീസ് പൊന്നാനിയിലെത്തി പ്രതിയെ അറസ്റ്റ് ചെയ്യുകയായിരുന്നു.

ഇദ്ദേഹത്തിന്റെ സ്ഥാപനത്തില്‍ കരാട്ടെ പഠനത്തിനായിഎത്തിയ തിരുവനന്തപുരം സ്വദേശിനിയെ പീഡനത്തിന് ഇരയാക്കിയെന്ന പരാതിയെ തുടർന്നാണ് അറസ്റ്റ് രേഖപ്പെടുത്തിയത്.

ഇയാള്‍ മൂന്ന്​ വര്‍ഷമായി മരടില്‍ കരാട്ടെ, യോഗ എന്നിവ പഠിപ്പിക്കുന്ന സ്ഥാപനം നടത്തി വരികയാണ്. പരിശീലനത്തിനായി സ്ത്രീകളും പുരുഷന്‍മാരുമായി ധാരാളം പേരാണ് സ്ഥാപനത്തില്‍ എത്തിയിരുന്നത്.

സ്ത്രീകളെ വശീകരിക്കുന്നതിനായി ഇയാള്‍ അതിരാവിലേയും വൈകിട്ടും പ്രത്യേകം ക്ലാസുകള്‍ സജ്ജീകരിച്ചിരുന്നു. ലൈംഗിക ചൂഷണം ചെയ്യുന്നതിനായി അതിരാവിലെ മറ്റാരും വരാത്ത സമയത്ത് പരിശീലനത്തിനായി യുവതിക്ക് സമയം ക്രമീകരിക്കുകയായിരുന്നു.

നേരത്തെ ഇതേ രീതിയില്‍ തമിഴ്നാട് സ്വദേശിനിയെ ലൈഗിംക ചൂഷണത്തിന് ഇരയാക്കിയ സംഭവത്തില്‍ ഇയാളെ മരട് പോലീസ് റിമാന്‍ഡ്​ ചെയ്തിരുന്നു. ഇയാള്‍ നിരവധി സത്രീകളെ ഇതേ രീതിയില്‍ ലൈംഗിക ചൂഷണം ചെയ്തതായി പോലീസിന് വിവരം ലഭിച്ചിട്ടുണ്ട്.