ടി.പി.ചന്ദ്രശേഖരന്റെ ഭാര്യയും എ എല്‍ എ യുമായ കെ.കെ.രമയും യു ഡി എഫും തമ്മില്‍ തെറ്റുമോ? ടി.പി. കേസ് ഒതുക്കി തീര്‍ത്ത മുന്‍ ആഭ്യന്തര മന്ത്രി തിരുവഞ്ചൂര്‍ രാധാക്യഷ്ണന്‍ നിയമസഭയില്‍ നടത്തിയ ചില പരാമര്‍ശങ്ങളാണ് കെ.കെ രമയെ ചൊടിപ്പിച്ചത്. നിയമസഭയായതിനാല്‍ രമ മറുപടി പറഞ്ഞില്ലെന്നേയുള്ളു. തിരുവഞ്ചൂരിനെ പരസ്യമായി വിമര്‍ശിക്കാന്‍ കെ രമ ശ്രമിക്കാതിരുന്നത് അവരുടെ സംസ്‌കാരം കൊണ്ടു മാത്രമാണ്.

ടി.പി ചന്ദ്രശേഖരന്‍ വധക്കേസില്‍ കെ.കെ രമയും മുഖ്യമന്ത്രിയും തമ്മില്‍ നിയമസഭയില്‍ നടന്നത് പൊരിഞ്ഞ വാദപ്രതിവാദമാണ്. കേസിലെ പ്രതികള്‍ക്ക് പോലീസിന്റെ ഭാഗത്തുനിന്ന് സഹായം കിട്ടിയിട്ടുണ്ടെന്നും ഇത്തരം സംഭവങ്ങള്‍ ഒഴിവാക്കാന്‍ നടപടിയുണ്ടോയെന്നും വടകര എംഎല്‍എ ചോദ്യോത്തര വേളയില്‍ മുഖ്യമന്ത്രിയോട് ചോദിച്ചു.

എന്നാല്‍ ടിപി കേസ് അന്വേഷിച്ചത് ആരാണെന്ന് അംഗത്തിന് അറിയാമല്ലോ എന്നായിരുന്നു മുഖ്യമന്ത്രിയുടെ മറുപടി. യുഡിഎഫുകാര്‍ കഴിയാവുന്ന തരത്തിലെല്ലാം അന്വേഷണം നടത്തിയ കേസാണിത്. ഈ അന്വേഷണത്തില്‍ വീഴ്ചയുണ്ടോ എന്നാണോ അംഗം ഉദ്ദേശിച്ചതെന്നും മുഖ്യമന്ത്രി മറുചോദ്യം ഉന്നയിച്ചു.

മുഖ്യമന്ത്രിയുടെ മറുപടി അന്നത്തെ ആഭ്യന്തര മന്ത്രിയായിരുന്ന തിരുവഞ്ചൂര്‍ രാധാകൃഷ്ണന്‍ ഏറ്റെടുത്തു. ടിപി കേസ് അന്വേഷണം ഏറെക്കുറേ കൃത്യമായിരുന്നുവെന്ന് മുഖ്യമന്ത്രി അംഗീകരിച്ചതിനെ സ്വാഗതം ചെയ്യുന്നതായും ഇത് അഭിനന്ദനാര്‍ഹമാണെന്നും തിരുവഞ്ചൂര്‍ സഭയില്‍ പറഞ്ഞു. ഇതാണ് കെ.കെ.രമയെ ചൊടിപ്പിച്ചത്.

സംഘടിത കുറ്റകൃത്യം തടയാനുള്ള നിയമനിര്‍മാണത്തിനുള്ള നീക്കം വിവാദമാകുകയും ഇത് ചീഫ് സെക്രട്ടറി തലത്തിലുള്ള സമിതി പരിശോധിക്കുകയുമാണ്. ഇതുമായി ബന്ധപ്പെട്ട ചോദ്യമാണ് കെകെ രമ ഉന്നയിച്ചത്.

പല സംഘടിത കുറ്റകൃത്യങ്ങളിലും ഡിജിപി തലംവരെയുള്ള ഉന്നത പോലീസ് ഉദ്യോഗസ്ഥര്‍ക്ക് കുറ്റവാളികളുമായി അവിശുദ്ധ കൂട്ടുകെട്ടുണ്ടെന്ന് രമ പറഞ്ഞു. ടി പി വധക്കേസ് പ്രതികളെ സംരക്ഷിക്കുന്നതിനും ഇവര്‍ക്ക് മറ്റു കുറ്റകൃത്യങ്ങളില്‍ സഹായം എത്തിക്കുന്നതിനും പോലീസ് സേനയിലെ പലരും ഉള്‍പ്പെട്ടിരുന്നു. സ്വര്‍ണക്കള്ളക്കടത്ത് കേസ് പ്രതികള്‍ക്കും ഇത്തരം നിയമവിരുദ്ധ സഹായം ലഭിച്ചിട്ടുണ്ട്. കുറ്റകൃത്യങ്ങള്‍ തടയാനും അന്വേഷണത്തിനും നിയമങ്ങള്‍ നിലവിലുണ്ടായിട്ടും അവ ഉപയോഗപ്പെടുത്തുന്നതില്‍ ആഭ്യന്തര വകുപ്പിനുണ്ടായ പരാജയമാണോ ഇത്തരമൊരു ജനവിരുദ്ധ നിയമത്തിന് സര്‍ക്കാരിനെ പ്രേരിപ്പിച്ചതെന്നും രമ ചോദിച്ചു.



ടി.പി.കേസില്‍ സി പി എമ്മും കോണ്‍ഗ്രസും തമ്മില്‍ നടന്ന ഒത്തുകളി എല്ലാവര്‍ക്കും അറിയാവുന്ന കാര്യമാണ്. സോളാര്‍ വഴി തടയല്‍ സമരം ഒതുക്കുന്നതിന് വേണ്ടി ടി.പി.കേസില്‍ അന്നത്തെ സര്‍ക്കാര്‍ വിട്ടുവീഴ്ച ചെയ്തു.കാലാന്തരത്തില്‍ കെ.കെ.രമ വലതു മുന്നണിക്ക് ഒപ്പമെത്തിയെങ്കിലും താന്‍ അനുഭവിച്ച തിക്താനുഭവങ്ങള്‍ മറക്കില്ല.

തിരുവഞ്ചൂരിന്റെ കള്ളകളികളെ കുറിച്ച് രമക്ക് നന്നായറിയാം. ഉമ്മന്‍ ചാണ്ടിയുടെ കാപട്യവും നന്നായറിയാം. എന്നാല്‍ മുന്നണി മര്യാദയുടെ പേരില്‍ രമക്ക് അക്കാര്യം തുറന്ന് പറയാന്‍ കഴിയില്ല. ടി.പി.കേസാണ് ഉമ്മന്‍ ചാണ്ടി സര്‍ക്കാരിന്റെ തുറുപ്പുചീട്ടായത്. എന്നിട്ടും യു ഡി എഫ് ടി.പി.യെ മാനിക്കാത്തതില്‍ രമക്ക് വിദ്വേഷമുണ്ട്.

ടി പി യുടെ പേരില്‍ തിരുവഞ്ചൂര്‍ രാധാകൃഷ്ണന്‍, പിണറായി വിജയനെ പ്രകീര്‍ത്തി ച്ചതിലാണ് രമ ക്ക് സങ്കടം. കോണ്‍ഗ്രസിന്റെ പ്രമുഖ നേതാക്കളെ രമ തന്റെ പ്രതിഷേധം അറിയിക്കുമെന്നാണ് റിപ്പോര്‍ട്ട്.